曹仁超2006-06-27投資者日記 富與官爭係大忌

曹仁超2006-06-27投資者日記 富與官爭係大忌

　　6月26日，周一。恒生指數跌4點，收15804.81；成交額二百零二億一千四百七十一萬七千多元。期指微微低水，升20點，收15800點。鞍鋼（347）升2.3％，見六元八角；馬鋼（323）升1.1％，見二元三角五仙，因佢地本身擁有鐵礦石礦源，唔受呢次鐵礦石入口加價19％影響。

　　相信本周四聯儲局將公布自2004年6月以來第十七次加息，利率將見五厘二五。上述影響已被市場消化，問題在於8月8日係咪再加息。上周由亞洲區證券市場流走嘅資金估計達十一億美元，比較過去五星期平均每周有二十四億至二十一億美元流走，可以講流走速度已減慢，但仍然係流走，而非流入。

恒指失守15200點機會唔大

　　亞洲區經濟雖然已減少依賴出口，但無法擺脫出口帶動模式嘅經濟，因此亦無法擺脫美國經濟嘅影響。以香港為例，顯然對出口依賴已大減，但經濟盛衰仍由資產值升降所帶動，而香港資產值升降無法擺脫資金流入流出嘅影響，結果香港經濟繼續被美國牽着鼻子走。過去香港企業純利升幅高峰期分別喺1981、95至97年，以及2000及05年，估計今年企業純利升幅唔及去年，今年7至9月香港股市將為上述改變而作調整。換言之，5月8日至6月13日恒指大跌後，踏入今年第三季相信進入整固期。個別股份互有升降，整個股市窄幅波動。恒指上阻力16000點、下支持15200點。

　　5月至今，恒地（012）股價跌幅已相當，較資產淨值已有25％折讓，進入值得持有期，可利用未來每次出現拋售吸納。新地（016）較資產值有24％折讓，亦到咗可以考慮吸納嘅水平。換言之，Sell in May者踏入7、8月份，可利用每次股市拋售吸納。技術上睇，恒指15200點失守機會唔大。

　　如何喺股票與黃金之間選擇？上周五金礦股已略破下降通道【圖一】，估計金價由七百三十美元回落到五百四十二美元，調整已完成，上周五收市五百八十美
元，較高價回落20％，但較去年6月四百三十美元升35％。反之，標普五百指數下降通道仍完整【圖二】。從呢點睇，黃金再次進入收集期，股票仍可等一等。

中央政府唔會太重手

　　「十一．五」開局之年，中國經濟未出現冷卻，1至5月固定資產投資二萬五千四百四十三億元人民幣，較去年同期升30.3％，係兩年內最高增幅。5月份L增長19.1％，貸款升16％（5月份新增貸款係去年同期嘅兩倍），外傳第二輪宏觀調控快出台。中國經濟雖然問題多多，但仍係高增長、低通脹格局，相信中央政府唔會過分重手，以免「傷筋斷骨」。第二次調控相信仍係微調為主，例如提高市場進入標準、清理整頓在建及擬建專案；對傳統產業實施改造及提升效率；鼓
勵兼併及重組；加強信貸、土地、建設、環保等政策協調。中國L對GDP比率已達180％，遠高於世界其他國家，一唔小心，可引發惡性通脹或樓市泡沫。讓中國經濟進入軟着陸期，可避免重蹈1994、95及96年經濟過熱後1997及98年急降溫嘅情況。流動資金過剩及產能過剩，大家都有眼睇，依家人行溫吞水式貨幣收緊政策，並不能真正解決問題，而係將問題愈積愈大。產能過剩造成產品大量往外走，變成外貿大量盈餘，回流貨幣又被銀行信貸制度放大，變成流動資金過剩。如今時今日加息，必吸引更多資金流入，造成流動資金進一步過剩；如人民幣升值過急，又將令產品出口有困難，可引發內部通縮，走上九十年代日本之
路。。

　　2001年中國外貿出口總值二千六百六十一億美元，去年七千六百二十億美元，年均增長30.61％，相信今年中國外貿增長率面臨調整。2001年7月1日中國新外貿法實施，個體工商戶可名正言順直接出口，係造成出口業高速成長嘅其中一個理由；其次係長三角地區興起。到今年中國外貿發展逐漸進入高成本期，勞動成本及資源成本壓力逐步上升；加上面對國際市場日益增加嘅壓力，增長空間漸漸收窄。最近兩年因環保及資源壓力，今年起國家逐步取消出口商品優惠，減少外資失衡現象，都將令中國外貿出口增長率進入回落期。過去中國出口以數量擴張及低價競爭，產量世界第一，但所獲利潤十分少。未來出口低成本嘅優勢逐步減少，轉為科技、品牌取勝，唔再以量取勝，改為着重品質。

中國城市化仍需二十五年

　　中國經濟喺1870年前一直係世界第一，主要係中國一直存在巨國效應，形成過去二千年喺貿易上嘅優勢。只係中國錯過咗全球工業革命呢個潮流，令過去一百五十年經濟走下坡。1978年改革開放後，中國經濟一步步融入世界自由貿易體系內，巨國效應又漸漸返嚟。中國十三億人口所形成嘅規模效益，令任何產品喺中國生產時成本上皆佔優勢，出口增加令資金流入、利率下降，令經濟更高速增長。過去工業革命後中國喺貿易上出現逆差，令白銀流失引發通縮，百業走向蕭條，鴉片戰爭嘅結果係進一步開放中國市場，更多白銀流失，造成惡性循環；反之，美國1971年取消黃金兌美元政策，則避免咗上述情況喺美國出現。

　　未來中國勞動成本將增加，出口產品成本亦上升，但巨國效應令競爭力仍十分良好，外貿順差唔會減少，資金流入造成低利率嘅狀況，可繼續保持中國經濟繁榮落去。除上述外，中國仲有一個優點，就係城市化增長率達每年1.44％，如要達到80％，城市化仍需要二十五年，即未來二十五年中國經濟仍將反覆向上。

　　羅傑斯（七十年代同索羅斯成立量子基金）現年六十三歲；佢去年才開始投資中國股票。佢認為，未來應睇好嘅行業包括：
一、旅遊業；
二、農業；
三、能源事業；
四、航空業。
估計未來上述行業股份表現將優於大市（今年上海綜合指數升39％，深圳綜合指數升50％，成為全球八十個股市中表現最出色嘅十大股市之一）。5月份內地股市成交額較4月升80％。佢認為，內地地產股受壓，短期內唔應該投資內地地產股。1999年起佢開始投資能源股及黃金，可以講大獲全勝。佢曾揸電單車走遍全中國，了解中國行情。佢未來睇好嘅農產品有棉花、咖啡、小麥、大豆及糖。本月24日佢喺北京大學「第二屆國際能源及金屬戰略論壇」上講及投資之道，就係「做足功課」。

　　佢認為，八十年代開始係債券牛市，但到2003年已結束並進入熊市，因此唔好再沾手債券。喺西方，八十年代股票亦係牛市，但2000年牛市已結束。反之，中國股票熊市在去年底結束，如果唔想投資商品，可以投資中國股票，未來二十年中國經濟都係繁榮嘅。佢認為，石油牛市始於1999年，估計2012年才結束；黃金牛市2001年開始，估計2014年才結束，估計到時金價將超過一千美元一盎斯。

　　Boston Consulting Group研究歐洲同日本公司業務，有90％增長嚟自中國業務。

　　如果你到中國，請到上海睇睇嗰D高樓大廈，你會以為自己嚟紐約。請到北京感受一下塞車之苦，或者去睇睇三峽工程，保證令人下巴跌下來，眼睛瞳孔亦放大！中國近年基建發展之速，令整個中國好似一個大地盤；令八十年代台灣「十大建設」好似玩泥沙！過去中國只歡迎直接投資，唔歡迎間接投資，令內地股票市場未發展起嚟，似足八十年代台灣。隨着2007年來臨，金融市場開放，中國股票市場遲早出現另一次boom！投資內地股市唔易，但投資紅籌國企股一D困難都冇。事實上，過去三年紅籌、國企股表現亦唔錯。

　　依家內地企業欲「走出去」，但外國資金欲「走進來」。中國企業「走出去」，主要購買天然資源（其他方面投資成績欠佳），由澳洲嘅天然氣、南韓嘅發電廠及煉油設施，以至巴西嘅鐵礦石、加拿大嘅油砂，依家已到咗邊度有天然資源、邊度便有中國投資者嘅地步。至於外資「走進來」最有興趣係內地金融業、保險業，只係政府仍有一定限制，不然唔少內地銀行及保險公司早成為外資收購對象。

　　八十年代部分港人曾拒絕將工廠內移，今天已後悔莫及；九十年代唔肯投資長三角嘅台灣廠商，亦面對同樣問題。二十一世紀忽視紅籌、國企者，今天亦唔知應該點算！1980至97年香港經濟係內地經濟嘅引擎，帶動中國經濟增長；1997年後中國經濟成為香港經濟嘅引擎，帶動香港經濟保持繁榮，相信未來十年仍然係咁。愈嚟愈多香港企業純利主要來源再唔係香港而係內地，唔少製造業已轉型做內銷，香港大房地產公司嘅投資亦將重心由香港移入中國內地。中國經濟正進入轉型期，由製造業及出口業帶動轉為內部消費帶動，情況有如八十年代香港。未來內地嘅吸引力唔再係嚟自工業股，而係嚟自金融業。

深10條出台效果良好

　　世界變得好快，IBM領導層睇唔到個人電腦革命，結果過去二十多年道指上升四倍，IBM股價下降77％。蘭克斯洛睇唔到小影印機嘅威力，整個影印市場被日本公司取代。Sears睇唔到中國廉價貨入侵，將美國百貨業一哥地位拱手讓予沃爾瑪。通用汽車及福特汽車睇唔到高油價嘅威力，令整個汽車市場被日本車侵佔。

　　潮起潮落，世界天天在變，你跟得上嗎？內地及香港加起來有超過一千四百間國企上市，其中三分二冇投資價值，上市後唔少已跌破招股價，如何從中挑選三分一有增長力嘅國企？極之考基金經理及投資者眼光。

　　6月20日深圳對地產發布「深10條」地方細則，業界對九十平方米以下住房須佔總面積70％以上提交意見，希望改為一百三十五平方米以下住房佔總面積70％以上。

　　「深10條」明確要求全市土地出讓淨收益10％用於興建廉租住房，由於唔使地價，即每年有十億元人民幣可用於興建廉租住房，以每平方米建築成本二千五百元計，十億元可建四十萬平方米；以每套廉租住房四十平方米計，每年可產生一萬套。依家深圳商品房供應係九萬套，廉租屋興建影響力唔細，令九十平方米以下商品房面對激烈競爭。如改為一百三十五平方米以下，可令商品房集中發展大單位，政府集中發展細單位。

　　北京、南京等城市「37號文件」出台後，一百五十平方米以上商品房已漲價（而非跌價）。「深10條」出台後，效果較其他城市好，大、中、小單位售價輕微下降。

　　德思勒總經理劉中華認為，九十平方米不單止係中國樓市政策，亦有長遠意義。歐洲點解咁好環境仍要開小車？就係政府對產業趨勢調控嘅結果。作為普通家庭，九十平方米（約一千呎）已夠住，只有美國、澳洲、加拿大等富裕國家，普通家庭才住一百三十五平方米（一千五百呎）。如全國都以九十平方米以下住房為主，可節省唔少土地作更佳用途。佢認為地產商唔好再同政府搞對抗喇。

　　著名嘅肯特兄弟父親以賭起家，其兒子亦以賭失去財富。二十多歲時HL（肯特兩兄弟嘅父親）喺沙蟹賭局上贏咗一筆大錢，其後投資德州石油再賺一筆，兩兄弟喺石油市場嘅冒險，亦令財富不斷上升。1970至73年佢兩兄弟持有二十萬盎斯白銀而大大賺一筆，1974年計劃白銀供應。當年白銀產量二億四千五百萬盎斯、需求四億五千萬盎斯，肯特兄弟計劃購入五千五百萬盎斯，估計市場上共有七億盎斯白銀，但可以出售者不足二億盎斯。1979年肯特與沙地拍檔共同購入
四千三百萬盎斯及決定收貨，令銀價由八美元一盎斯喺短短兩個月升至十六美元，因為COMEX及CBOT白銀存量只有一億二千萬盎斯。到1979年，CBOT宣布改變遊戲規則，宣布唔准任何投資者持有三百萬盎斯以上白銀合約，並大幅提升孖展，持有三百萬盎斯以上合約者必須喺1980年2月前平倉。肯特兄弟控告CBOT董事，事後發現唔少董事拋空白銀。肯特唔認輸，繼續吸納四千萬盎斯，並將之存喺瑞士，另再買入九千萬盎斯3月期貨，銀價由三十四點四五美元再升至
1980年1月五十美元。COMEX宣布改規則，所有持一千萬盎斯者必須套現及停止買入（只能沽出）；加上全球持有白銀嘅小投資者被高價吸引大量沽售，首次出現散戶打贏大戶嘅局面，而且前聯儲局主席雪茄伏大幅度加息，亦令肯特兄弟負擔大增，銀價狂瀉至三十五美元。肯特兄弟仍唔肯認輸，進一步購入，但已財力不繼，當銀價跌至十美元時，佢地出現負資產十億美元；佢地遇上咗滑鐵盧。

　　窮不與富敵，富不與官爭。肯特兄弟所犯大忌就係同兩間期交所鬥，站喺政府立場當然支持期交所……。以今天內地房地產局面，地產商會否犯肯特兄弟相同嘅錯誤？

好仔不論爺田地

　　5月金價升至七百三十美元，相信令聯儲局老羞成怒，此乃我老曹叫揸金者大量獲利回吐嘅理由。當聯儲局主席反擊，擔心貝南奇將過分積極地加息。6月29日加息四分一厘後8月8日再加！事實上，今天通脹壓力同七十年代比較十分小兒科，如聯儲局喺加息方面過分進取，第三季金融市場睇落都幾煩！有懷疑揸現金乃我老曹一貫策略。今天經濟環境瞬息萬變，機構投資者早已變成機動部隊，隨時出現「遲來三日馬家娘」嘅局面。呢次投資者有幾多人做咗「梁山伯」而後悔莫及？

　　現年七十五歲嘅畢非德，呢位全球第二富決定將自己約值四百四十億美元身家嘅其中85％捐畀世界首富蓋茨成立嘅Bill and Melinda Gates Foundation及另外四個基金，並由今年7月起開始逐步轉移。其中三百零七億一千萬美元進入世界最大私人基金（1995年成立），由蓋茨太太
Melinda成立，目的係幫助全球貧窮孩子上學及照顧全球有病冇錢醫嘅人。畢非德嘅已故太太Susan分得一百萬股巴郡B股，兩兒子Howard及NoVo（Peter）及一個女兒Sooz各分得三十五萬股，以市價三千零七十一美元一股計，子女各分得十億美元，肯定可過富人生活。2004年畢非德太太逝世，令佢決定退休，並喺今年作出上述決定。

　　中國富人捐錢文化仍未建立，過去把太多家財留畀下一代，結果為中國製造最多二世祖。好仔唔論爺田地，好女唔論嫁粧衣，希望更多中國人能喺呢方面向畢非德學習。「老吾老以及人之老，幼吾幼以及人之幼」，點解今天中國嘅老人同孤兒問題仍然搞成咁？反觀西方社會，慈善事業點解咁發達？實在令中國人汗顏。真正嘅富豪唔係擁有私人飛機或有女明星做朋友，而係有一天將自己財產85％捐出去！完成捐獻後，畢非德佔巴郡股權將由31％降至5％。

　　財富最大功能係令自己生活愉快，其次係幫助別人獲得愉快生活，你做得到咩？

　　光亞（8061）、中新集團（563）、泰達生物（8189）、中國玻璃（3300）、浙江玻璃（739）、朗迪國際（1142）、星晨集團（542）、利豐雅高印刷（623）停牌。

　　■中華國際（1064）7月5日；凱聯國際酒店（105）、星光集團（403）、天德地產（266）6日；鷹馳實業（147）7日公布業績。

投資者日記曹仁超2006-06-20 成交大減開始抖暑

投資者日記曹仁超2006-06-20 成交大減開始抖暑

曹Sir - 投資者日記

　　6月19日，週一。恆生指數跌73.79，收15768.86；成交大幅減少至一百六十四億六千四百萬元。6月期指跌91點，收15747點。人行提升商業銀行儲備金，令建行（939）股價跌2.2％，見三元三角；中國銀行（3988）跌1.5％，見三元三角七點五仙。

投資失敗理由系怕閒

　　今年暑假，無論地產經紀或股票經紀都要抖暑，因為樓市及股市踏入7月相信會好靜。股市惡性拋售6月13日理論上完成，上週完成挾淡倉後，本週冇嘢搞。至於樓市，早喺5月份起已開始靜，因為香港利率已略高於CPI增長率二釐，加上一連串數據公布，人們決定都系睇世界盃舒服D。

　　英女皇喺八十歲生辰時話，任何人都會老，能夠做嘅事系令自己儘量長壽！英女皇嘅吸引力便是無所事事，人地批評佢嘅女兒，佢唔表示意見；人地批評佢嘅兒子，她同樣唔表示意見。畢非德認為，投資失敗理由系怕閒（ShyofLaziness）！佢一生人都在等，等候入貨時刻，等候合適對象出現……。投資唔系打足球，唔使跑嚟跑去，反而應學習英女皇嗰份休閒。幾多人喺股市走出走入，結果得到乜嘢？本週開始，我地開始學習享受休閒。

　　鐵礦石談判方面，可能系中國首次成為價格制定者。全球多家鋼鐵生產商已同意巴西淡水河谷公司加價19％嘅要求，只有中國態度一直強硬，聽講雙方可能達成協議，最後只加價10％。

　　上海銅價今天帶頭下跌，令倫敦3月期銅一度下挫一百六十美元或2.3％，成六千八百二十美元一噸，跌幅大於上海1.6％。理由系人行提高商業銀行存款準備金0.5％，至8％。倫敦銅價自上月創新高後，至今已回落31％。

　　跌市或延續至第四季

　　東方航空（670）客運量連續第十六個月上升，5月達二百八十七萬人次，較去年同期升82％；客座利用率亦升四點一個百分點，至68.4％。國際航空運輸協會估計，2009年之前中國客運市場年均增長率可達9.6％，高於世界平均水平。

　　5月份香港失業率降至4.9％，系近五年新低。今年首季消費較去年同期升4.5％，系一年嚟升幅最大嘅一季。

　　分析界認為，2000年1月14日道指見11750點，有如1966年2月9日道指見995點，系超級大牛市結束。今年5月10日道指見11670點，相等於1971年4月見950.82；其後到1971年4月回落至11月嘅797點，跌幅16.18％；再由1971年11月低點升至1973年1月1051.7新高，之後才再大跌。如1971年道指走勢有參考價值，今年5月10日開始嘅跌市可能一直延長到今年第四季，然後上升，及至2008年年底、09年年初道指創新高後，才再大幅回落。雖然過去歷史唔保證喺將來重演，但1971年道指走勢實在有一定參考價值【圖】。

　　美國樓市感受加息壓力

　　本週trader努力搵出上週股市低點，即恆指6月13日15204點及黃金低點五百四十二美元等，呢個底到底有幾可靠？

　　週二美國公布5月份新屋建造及批准數字，根據ThomsonFirstCall統計，分析員估計5月份新屋建造系年率一百八十六萬間，批准數字系年率
一百九十六萬一千間。經過十六次加息（相信月底出現第十七次），美國房地產終於感受到壓力。根據美國商業部資料，4月未售出房屋高達四個月供應量，另有十二萬八千間新屋在建造中，系歷史上新高。七十一個大城市中，40％單一家庭住宅售價被視為極之偏高。

　　5月份CPI上升0.4％（核心通脹0.3％），令五年、十年、三十年期債券孳息率紛紛高出五釐。股市自5月10日起回落，令金融市場投資者如果唔系變得悲觀就系無心戀戰，經上週末強烈反彈後，跌市繼續。

　　本週四公布5月份領先指數估計回落0.4％（4月份回落0.1％）。美國克利夫蘭聯邦儲備銀行行長SandraPianalto將發言，此乃6月28、29日公開利率協議前最後一位聯儲銀行行長髮言，對股市有一定影響。

　　上週日本銀行宣布維持零利率，令日圓滙價進一步回軟。十五位分析員中，有九位相信7月份日本銀行將加息，49％日本民意認為日本銀行行長福井俊彥應辭職，13％認為唔使。睇嚟日圓滙價喺6月份繼續受壓，新元素系北韓可能試驗飛彈及發展核武（1998年北韓試驗長程導彈飛越日本上空，落喺太平洋，其後只試驗短程導彈。呢次將系第二次試驗長程導彈）。

　　5月當七十六歲老人家都問我老曹應否將10％儲蓄用嚟買金時，我老曹知道金價無可避免將出現大調整。當時柏克萊環球推出白銀ETF，至今已回落26％。ETF至今已有二十多年歷史，令投資者更方便買賣商品。當冇去過印度嘅人都加入投資印度基金行列之時，我老曹知道印度股市亦逃唔出下跌嘅命運。

　　世界盃、惡劣天氣，加上下週暑假開始，相信股市好快靜下來，進入冇方向感期。上週末三個交易天上升，估計只系挾淡倉。喺跌市中唔少人乘機空倉，上週五完成平倉後，本週股市又再回軟。不過，經過上週挾淡倉後，淡友氣燄收斂。後市恆指15200點暫時有得守，估計好淡雙方喺呢個水平出現爭持機會好大。

　　印度股市雖然已回落，但德銀亞洲、美林亞太區、摩根大通、野村仍認為偏高，即使回落25％仍唔夠（印度股市由5月10日至今回落22％），目前O十五點二倍（5月10日O二十點五倍），相較MSCI新興指數O只有十二點二倍，印度股市仍然太貴。5月11日至今海外投資者淨拋售二十四億美元股票（即拋售大於買入），今年1至4月淨買入五十億美元股票。野村證券策略員SeanDarby認為，印度股市7000點才合理，即較上週五仍可跌多29％。怡富資產管理公司持相反睇法，GraceTam認為，印度長線增長十分好，並認為已可吸納。霸菱資產管理HayesMiller亦認為，印度股市開始尋底。

　　國企、紅籌股面對人行7月5日起增加商業銀行存款儲備比率至8％（2004年4月以嚟首次），估計可吸收唔少過剩資金，代表銀根抽緊。今年首五個月內地房地產投資仍升21.8％（首四個月升21.3％），5月份房地產投資不但冇減少反而上升。

　　內地游資過剩皆因人民幣偏低

　　人行4月增加貸款利率零點二七釐，似乎未能限制貸款增長；5月政府一連串稅務措施增加房地產交易成本亦失效。至於7月5日抽緊銀根後又如何？睇嚇點！歸根到底，問題喺人民幣滙價偏低引發國際游資湧入，造成銀行流動資金過剩，信貸膨脹。

　　由1842年南京條約將香港割讓畀英國開始，中國成為西方列強眼中嘅肥肉，要瓜分而後快；加上滿清政府無能，過去百多年中國人受盡西方侮辱。建立新中國已成為大部分有識之士嘅共同願望；第一次有組織對抗系洪秀全搞嘅太平天國，利用宗教力量威脅滿清政府政權，可惜洪秀全等人未成事已爭權；加上滿清政府獲西方國家財力及武器上支持，好快將太平天國平定了。不過，滿清政府依然唔長進，更任由西方列強喺中國予取予攜；最後喺孫中山領導下推翻滿清政府，除之而來卻系軍閥割據，到後來日本入侵，國民政府未企穩便要先應付大軍閥，然後領導國民八年抗戰。國民政府未上軌道先腐敗，最後由毛澤東領導下嘅中國共產黨將蔣介石領導下喺國民黨趕去台灣。1949年新中國成立，並以蘇聯為藍本，建立社會主義制度下嘅中國，強調「自力更生」。可惜毛澤東喜歡唔按經濟規率辦事，六十年代更發動文化大革命，將本來已經十分脆弱嘅中國經濟，進一步搞到一窮二白。

　　由1842年起至1976年呢一百三十四年，作為中國人真系好苦。由西方列強瓜分中國，到太平天國、八國聯軍入侵、大軍閥割據，到八年抗戰、國共之爭、文化大革命，中國人喺外國人面前真系抬唔起頭來！七十年代初期我老曹首次到華爾街「朝聖」，美國人叫我「Japs!」 （Japanese），佢地認為穿西裝住得起高級酒店嘅亞洲人一定系日本人。當年我老曹感覺真系想喊！

　　全球商品跌價利好中國

　　1978年鄧小平提出改革開放政策，最先系「三來一補」，深圳成為香港輕工業加工基地；到2003年中國加入WTO成為世貿成員。不足三十年光景，中國經濟迅速由農業社會轉型為工業社會。依家中國農民雖然仍佔總人口50％，但以中國人口咁多，上述改變亦算驚人成就。要迅速工業化，產品必須有市場，唔似西方國家過去以軍事力量佔據市場及原材料來源，中國只有利用價廉物美去開拓市場。所謂和平崛起，主要仍系OEM（代加工）喺國際市場上賺取微薄加工費。工
業化亦需要原材料，初期中國本土仍可供應，隨著需求一再上升，便只有依賴入口。2001年開始引發全球原材料漲價，今天中國三分一原油依賴入口、過半鐵礦石依賴入口；四十五種原材料中，只有九種可以自給自足。去年中國喺全球工業原材料用量增長中所佔比重令人矚目：鋁佔全球增長率50％、鐵礦石佔84％、鋼材佔108％、水泥佔115％、鋅佔120％、銅佔307％、鎳308％，呢D趨勢可持續落去咩？上述情況七十年代曾喺日本出現，日本響石油危機後決定走
向高科技，唔再依賴OEM，發展自己品牌，並以高新科技作為日本產品競爭力嘅後盾。今年中國「十一．五」規劃亦指明中國欲走呢條路線，只系由OEM業務走向高新科技，仍有一大段痛苦日子，亞洲四小龍中亦只有南韓成功。至於香港嘅科技園、數碼港、工業園……到底為香港帶來乜嘢科技？

　　5月10日開始全球商品價格急跌，對中國經濟而言系一個好消息。中國喺重新平衡經濟增長與發展方面，雖然強調向消費傾斜，但趨勢仍唔明顯。擔心GDP增長率放緩速度太快，迫使中國領導層延長其投資及出口為導向嘅增長戰略，形成依家拉鋸局面。中國去年不但成為全球最大銅、鎳及鋅耗用國，而且增長率極之驚人。中國政府明白上述升幅唔可能長期維持，點樣喺經濟轉型中保持高增長（例如年率7.5％）並唔容易。今年首季中國GDP升10.3％，令唔少基本金屬價
格出現近乎拋物線嘅增長，代表投機者並唔相信中國可平衡經濟。新五年計劃未見真正落實，點樣令經濟同時出現此消（高耗能粗放型加工產品放緩）彼長（零售、貿易、批發、國內運輸、物流等行業增長），而令GDP未來五年保持7.5％年率上升？喺日本、南韓等，轉型過程中亦曾出現青黃不接期。中國喺原材料需求增長今年首季相信已達最高峰，第二季開始進入增長放緩期，未來幾年更顯著下降至低增長！只有咁樣才能緩解工業原材料市場目前所承受嘅價格壓力。

　　中國經濟增長今年不但面對能源及商品價格大升嘅影響，同時亦面對環境約束。過去二十八年有三億農民轉到城市安家就業，令城市人口上升一倍，為城市提供大量廉價勞動力嘅同時，亦令城市面對環境壓力，如未來增長模式不變，2015年中國要消耗三十一億噸煤，石油進口依存度達65％。中國根本上無法向其他國家進口足夠能源及原材料，而本身環境污染亦成為大問題，燒煤所造成嘅酸雨2003年令中國經濟損失達一千一百億元人民幣，90％河流受污染、75％湖泊出
現負營養化。酸雨已影響全國三分一種植面積，全國大城市60％空氣未及二級標準；全球十大污染城市，中國佔六個！依家中國須每年投放二千六百億元人民幣
（相當GDP1％）去控制污染，但情況未見改善。

　　泰國金融風暴後否極泰來

　　中國走日本之路已無選擇權。日本自1978年起全國耗油量開始下降，至今日本耗油量仍低於1978年，令油價由1980年四十五美元一桶降至一度低於十美元！以一美元GDP計，美國耗油量系日本一倍，中國系日本八倍，即美國同中國節約用油方面仍有很大餘地。非不能也，實不為也！

　　天津市濱海新區被國家批准為改革試點區，發展高新科技，令中國加工業為主嘅模式轉型到高新科技；浦東則協助長三角由加工產業走向金融服務業，以迎接2008年中國金融開放時代來臨。中國經濟會否轉型成功？過程系咪順利？會否出現青黃不接期？中國政府正努力推動轉型，我地嘅投資邏輯思維應否隨著「十一．五」規劃而改變?!

　　1997年亞洲金融風暴後，被擱置嘅曼谷建築物近年已紛紛建為酒店或寫字樓。上週五星級、五百四十三個房間嘅希爾頓酒店開幕（上述項目早喺十年前動工興建，因亞洲金融風暴而停建，今天終於落成。新業主系新加坡郭氏家族，過去兩年郭氏家族動用二億美元購入泰國四個項目，上述是其中一個）。郭氏另一項目系四十二層高嘅ExchangeTower，當年已建成90％才放棄，今年6月可完成。

　　其他有WorldTradeCenter，響2002年12月由泰國最大嘅商場建築商以二億三千四百萬美元購入及改建。

　　1997年亞洲金融風暴令泰國股市回落55％，泰銖滙價大幅下滑，1998年泰國GDP萎縮10.5％。泰國股市1998年9月起回升，至今上升三倍；泰銖1998年1月起回升，至今上升45％。雖然2000年再一次回落，2003年又復甦。去年泰國吸引一千二百萬遊客，估計今年再升36％。

　　潮起潮落1997年至今泰國一如香港，不知幾多人喺1997年後變得一無所有，但同時為另一批冒險家提供機會！浪淘沙，不知淘盡多少英雄好漢，又有多少人能以平靜心情，笑看朗日清風。

　　■民生國際（938）、江山控股（295）、林麥集團（915）6月28日；中港照相（1123）、嘉利國際（1050）、葉氏化工集團（408）29日公布業績。