四改三重量不重質

2006-10-06
四改三重量不重質



　　10月5日，周四。恒生指數升278.46，收17907.67；成交四百三十三億六千八百多萬元。10月期指高水，升307點，收17979點。聯 儲局主席貝南奇估計，美國樓市將出現調整，令下半年經濟增長率減少一個百分點，同時影響明年GDP增長；上述消息令明年3月利率降至五厘機會上升至 60％。油價回升，令南方航空（1055）股價跌3.2％，收二元三角九仙，另一理由係瑞信集團將該公司評級降至落後大市。

　　任新郎預測，人民幣六個月內同港元率睇齊機會高達50％；不過，即使以人民幣同港元出現一兌一計，升幅仍然唔大。

明年3月減息機會大

　　今年6月13日恒生指數跌穿二百五十天線日，唔少人呱呱叫熊市重臨……，至今恒生指數由15204點上升至17902點，升幅已達17.74％，但仍有人唔同意本港股市行業盛衰早已取代牛熊市，奈何！

　　聯儲局副主席科恩認同美國樓價進入軟陸期，代表十七次加息已足夠，並唔認為通脹率會惡化，上述亦係我老曹今年第三季睇法。美國CPI相信已今年 第三季見頂，其後利率係向下炒而非向上炒（即炒幾時減息）！分析界估計，今年10月減息機會只有2％，12月減息機會亦只有8％；不過，明年1月減息機會 40％，3月份為60％，即明年3月才出現減息機會較大。

　　9月份香港房屋銷售大增62％，達十一個月高點。住宅樓成交共二百八十九億七千萬元，較去年同期升62％；買賣戶數九千八百一十一戶，升38％（較今年8月升40％）。上述消息令新地（016）股價升2.4％、長實（001）升1.6％。

　　道指見11727.34，打破2000年高點；三十隻成分股中，有十三隻創新高。表現最出色有Altria，股價較2000年上升四倍， Caterpillar、United Technologies及波音公司升幅亦超過一倍，落後股如柯達、AIG、輝瑞、英特爾、AT&T則較2000年高價低50％或以上！

　　黃金同石油2000年至今大升，金價今年5月見七百三十五美元後回落，油價7月14日見七十八點四美元後回落。OPEC努力令油價六十至七十美元之間上落，部分成員國已開始減產。過去OPEC既冇能力阻止油價上升，呢次又係咪有能力阻止油價回落？

　　依家投資者只有10％曾經歷過七十年代金市。金價由1974年12月二百美元跌至1976年中一百零四美元，跌幅接近50％才再上升；呢次金價調整 幅度有幾大？唔好估，只要等。隨美國樓價進入軟陸期，相信商品價格亦進入中期調整，通脹率升幅將逐步放緩，估計明年第二季最低。

　　周三油價一度低至五十七點七五美元，為2月16日以來最低，較7月14日七十八點四美元高價回落23％才反彈，收市五十九點四一美元。科威特石油部長 宣布支持減產；沙地阿拉伯雖然唔乃奇自動減產計劃，為表支持，亦宣布每日減產二十萬桶。周三油價回升，主因係尼日利亞爆發暴力衝突，武裝人員攻佔尼日利亞 東南一帶產油區，影響意大利石油公司Eni SpA。不過，上周美國原油存量上升三百三十萬桶，至三億一千八百一十萬桶；汽油存量上升一百二十萬桶，至二億一千五百一十萬桶，較去年同期高9.6％； 經提煉油存貨上升二十萬桶，至一億五千一百五十萬桶，較一年前多18％。

　　黃金方面，至9月26日止歐洲央行共售出三百九十三噸，同原先計劃10月1日前出售五百噸仍差20％以上。現水平歐洲央行亦唔急於出售手上黃金。

銅價跌穿敏感三角形

　　今年上半年新成立能源及商品基金數目，超過2004及05年兩年加起來總和，情況同1980年上半年十分相似，講來講去都係中國因素、印度因素刺 激。上述因素唔係今年上半年突然出現，而係一直存在；當去年航運費下跌時已變相告訴大家，中國開始抗拒鐵礦砂價格上升，而其他原材料格價上升，亦令中國開 始減慢原材料入口了。

　　過去過分睇好能源價格而冇及時7月份離開者開始面對壓力；其次，第三季沽售能源股及資源股資金正向其他行業進軍，令其他行業股價上升。展望第四季 資金仍從能源股及資源股項目流出，繼續流向其他項目，未來每次油價反彈都應視作減持能源股及資源股時刻，因為油價已今年7月14日七十八點四美元見頂， 資源股同能源股由過去向上炒轉為向下炒。周三銅價跌穿敏感三角形下支持【圖】，各位應小心。

　　市場與經濟都離唔開boom & bust，油價既可以六年上升685％，自然亦可以出現大幅回落，1980年係咁，1991年係咁，2006年亦應該會係咁。市場無錯對，只有方向！大 摩羅奇係依家少數睇淡商品價格者，其他分析員仍偏向睇好，到底呢一次係咪又係少數贏大多數？

道指升幅集中大藍籌

　　道指雖然創新高（扣除通脹率仍較2000年低20％）。2001年全球一度擔心日本式衰退美國登陸，格蛇將利率由六厘半降至一厘，以及殊仔提出大幅 退稅，將上述憂慮擊退，其後全球都面對資金泛濫。過去六年美國樓價升幅超過50％，財富效應一直支持美國消費市場，令全球經濟保持增長！為阻止美國CPI 大幅上升，聯儲局2004年6月起又將利率一步步推高至今年7月五厘二五，令美國樓價今年8月停止上升，但經濟仍然保持興旺。1982年至今聯儲局每次都 能成功阻止bust出現，包括1984、91、94、97及2001年；美國過去二十四年已成功製造booms without a bust，一如只有白天而冇黑夜，似乎完全違反奧地利經濟學派所謂「規則」。1913年聯儲局被創造出來，1971年美國廢除金本位制度，令聯儲局干預經 濟能力大增，終於八十年代至今創造另一經濟奇（連續二十四年繁榮冇衰退）！

　　美國8月份樓價較一年前跌1.7％，係1995年5月以來首次，令8月8日及9月20日聯儲局兩次公開利率協議皆停止加息，分析界預測明年第一季尾將 開始減息！低利率加上低能源價格，可支持美國GDP明年保持2.5％或以上增長……。由於未來利率睇跌，加上CPI增長率受控制，令債券價格睇漲（我老曹 9月初公開研討會已提出上述睇法）。雖然GDP增長率放緩，但冇衰退威脅，令股市繼續上升，形成8、9月（甚至10月）債券同股票價格齊升局面，十年 期債券孳息率由6月30日五厘二二跌至四厘五五（即債券價格上升14.7％）。現水平債券息率較2004年6月聯邦基金利率一厘之時更低；長債利率下跌有 助美國樓市軟陸，大大減低樓市對經濟影響。美國2004年5月至今年6月有30-35％樓按採用ARM（即首兩年樓按利率四厘二五、第三年六厘二五、 第四年起按市場利率計），由此可見供樓壓力漸漸浮現，投資者已由樓市退出轉投股市。

　　雖然道指創新高，但標普五百指數仍較2000年高點低12.5％，代表呢次道指出現新高，升幅集中在少數大藍籌身上。

　　索羅斯最喜歡講：「風險來自無知！」1997年8月後，點解本港樓市產生咁多負資產人士？最大理由係「無知」！唔少人唔明白1984年7月至1997年7月呢十三年本港樓價反覆上升背後理由，亦唔知道「八萬五」房屋政策威力。如你了解箇中道理，點解唔逃避風險？

　　索羅斯亦同我老曹一樣，十分喜歡概念；將一個概念化作投資核心。例如2001年起睇好資源價格成為呢幾年投資核心概念，今年5月起才改變上述睇法。 其次索羅斯亦喜歡止蝕盤（佢甚至將止蝕位訂在5％；我老曹將止蝕位訂在10％或以上，最多15％）。索羅斯傳奇係佢能將一個十分簡單概念嵌入一連串投 資策略內，而將利潤大幅擴大，呢點係我老曹應該學習地方，即是一旦贏便贏得大、一旦輸便輸得少。

　　索羅斯唔主張分散投資，反而喜歡集中攻擊一點！今天索羅斯個人財富達七十二億美元，2006年《福布斯》雜誌估計佢係全球第七十一位富人！佢 1969年與羅傑斯（Jim Rogers）合創量子基金，1969年如各位在量子基金上投資一千美元，今天已變成六百萬美元（同期標普五百上升340％，即一千美元變成三萬四千美 元）；量子基金年增長率達28％！

索羅斯係偷師對象

　　好多人以為索羅斯係賭徒，其實剛剛相反。佢投資十大原則：
一、保本為投資首要項目。
二、討厭冒險。
三、建立個人投資哲學。
四、佢認為冇兩個成功投資策 略係相同。
五、學習建立個人選股（或外）系統，唔盲目投資。
六、分散投資係一般基金經理工作，其他人唔使學。
七、努力避稅但不可逃稅。
八、只投資自己 了解項目。
九、制訂個人投資標準，因為冇一個人係萬能。
十、努力鑽研並且找尋別人未留意項目。

　　熟讀唐詩三百首，唔識吟詩亦曉偷！索羅斯絕對係我地學習及偷師對象。索羅斯在今年提點大家，小心嬰兒潮危機（Baby Boom Crisis）。隨戰後嬰兒進入退休期，將引發一連串經濟變化，其中有危有機。

　　每當談及貧富懸殊問題，便有聲音要求政府向富人抽稅、向窮人提供補貼或保障。我地似乎忘記毛澤東時代中國共產黨將富人財產充公去分配畀窮人，結果係 點？六十年代中國出現大饑荒！1978年鄧小平政策係乜？先讓部分人富起來。毛澤東政策行二十八年，中國經濟係點？鄧小平政策行二十八年，中國今天經 濟又會點？

　　金錢三大功能：儲蓄、投資與消費。最原始資本自儲蓄，只曉儲蓄不曉投資，只能以平均五厘息計，如二十歲開始儲蓄到六十歲，本利和亦只有七倍，如扣除 每年平均通脹率4.5％，今天六萬元購買力相等於1966年一萬元，即實質收益好少。因此，有資本後，必須進入第二階段，例如索羅斯將資本每年升值 28％，如果你亦可以，一萬元本金四十年後變成六千萬元！當然，金錢最終目的係消費，到底一萬元好使抑或六千萬元好用？（讀者一定以為我老曹傻，咁問 題都會問？）

　　毛澤東所犯經濟上錯誤，就係將富人手上一百萬元充公分畀一千個窮人消費，社會上富人少、窮人多，最後富人被消滅掉，整個社會只有愈來愈窮。鄧小平 做法係讓有能力人將一萬元留起來作投資，二十八年後變成一千萬元（以年率28％速度上升），社會上漸漸富有人多了，佢地為賺更多錢，便提供大量就 業機會畀其他人，整個國家亦富起來。

　　劫富濟貧結果必令社會日漸貧窮。基於種種因素，社會上總有20-25％人口需要照顧，可能係因為不幸（例如老、弱、傷、殘），或工作能力不及別人（例 如自幼家貧，失去求學機會）或其他因素（例如性格上不進取，好逸惡勞），呢D人需要政府提供照顧，以達致和諧社會，以免出現有人冇飯食、冇屋住、冇書讀、 病冇錢醫等人間慘劇。此乃為何社會必須提供一定福利作為保障理由；但絕對不可有均富想法！

　　政府責任係提供一個公平競爭環境，只要肯努力，定有出頭天，而唔係一味劫富濟貧，不然便打擊創富欲望，結果唔係均富而係均貧。過去香港政府實施政 策就係提供只要肯努力、定有出頭天環境，令香港自七十年代開始經濟起飛；其後提供各種福利，已為超過25％人口提供照顧，甚至濫用情況日漸嚴重。如再推 出銷售稅、最低工資等，特區政府政策便一步步走向劫富濟貧之路。

全球大學生質素下降

　　今天無論歐洲、加拿大及部分亞洲地區，都為大學改制，由四年改為三年，理由係依家經濟環境需要大量大學生，但大學一時之間無法大量增加，「四改三」後 可令大學生供應量短期內增加25％，而毋須同時增加大學經費，聽落似乎有D滑稽，但實情的確如此。大學不但「四改三」，同時收生資格亦放鬆，以便更多年輕 人可進入大學。

　　不過，美國四百五十多間大學卻對「四改三」制度有所保留，調查結果只有37％大學同意，22％堅持唔改。Downsizing不但商界進行，連大學亦無法避免，結果全球大學生人數增加25%，但質素可能下降，此乃全球現象：一味追求「量」而忽略「質」。

　　今年起係首批戰後出生嬰兒踏入六十歲（即退休年齡），未來將有愈來愈多接受較良好教育工作人口退休。雖然大學「四改三」，但剛畢業大學生能否取代 工作經驗豐富戰後嬰兒職位？專家警告，2010到2020年全球因為有經驗工作人口大量退休而無法補上，可能引發經濟危機！其中最缺乏係有經驗護 士，全球將面對護士荒；家全球護士平均年齡五十歲，十年後大量退休！理由係護士工作甚至較醫生辛苦，但薪金卻低許多，形成入行人少。上述只係其中一 項，擔心不出十年，全球將面對人才荒，到時會否影響經濟?!

　　嘉里建設（683）、佑威國際（627）、九方科技（8129）停牌。

　　智富能源（1051）更改董事會會議日期。

June 29, 06曹仁超 投資者日記 - 互聯網加速周期完成

June 29, 06曹仁超 投資者日記 - 互聯網加速周期完成2006-6-29 09:57 AM

6月28日，周三。恒生指數跌32.04，收15742.66；成交二百一十三億一千九百多萬元。6月期指跌32點，收15755點；7月期指跌47點，收15789點。恒指連續第四個交易天下跌，係去年10月以來連續下跌日數最長紀錄（去年10月6日曾連跌五天）。周二美股回落1.09％，道指三十隻成分股中有二十六隻回落；股市內上升股份一千六百五十多隻，下跌股份四千六百多隻。相信6月29日之後才可制定中長線投資策略。今年5月既非2000年亦非1987年，只係熊市二期剛開始；經濟、股市都在扯扯去，好似進入回聲谷或迷陣圖，D財經演員只係一再重複毫無新意見解，背台詞而
已，不聽也罷。

　　今天OECD國家80％人口已上網，令資訊傳遞快如閃電，例如商品價格變化，即時有十億人口知道，資金流向最遲一星期亦大部分人都知道。羅傑斯認為，商品周期一般需時十六至十八年，但考慮及上述因素，可能呢次只需五年半至六年已完成亦唔奇。今天全人類80％都可閱讀及睇電視，文盲成為極少數，一切都變得好快。跌市有如下跌中利刀，誰去捕捉誰便受傷，已成為人人皆知常識，結果5月8日至6月13日跌市已好少人再去接刀，6月13日回升亦太多人知係
反彈，因博反彈人太少，令股市彈唔起。6月快完，7月又如何？

美息見5.5厘無可避免

　　通用汽車周一宣布三萬五千個時薪勞工同意食肥雞餐，提早退休，股價周二跌6.6％。杜邦化工回落2.7％，因法國股東拋售。納指成分股晶片生產商Marvell Technology跌15.9％，理由係宣布以六億美元收購英特爾部分生產項目。金價跌三點三美元，見五百八十四點四美元，但油價仍頑強地抗拒回落，反升十二美仙，見七十一點九二美元，變相話你聽6月29日加息四分一厘係唔夠。

　　美國5月份二手樓銷售降1.2％，達年率六百六十七萬間；6月份信心指數升上105.7，睇落美元利率見五厘半已無可避免，即第十七次加息後，仲有第十八次加息行動。六個月期國庫券孳息已升上五厘三一八，代表漸多人相信8月8日再加息。以CPI增長率4.2％睇，需要六厘二五利率才可控制它；但如以核心通脹3.2％睇，利率五厘二五已足夠。加息止於五厘二五至六厘二五之間邊一點？則由貝南奇決定。如止於五厘二五，通脹率有排唔回落；如加至六厘二五，通脹率好快回落，但一唔小心經濟增長率放緩速度太快，便會令股市、樓市受壓。

　　美林繼續睇好礦務股，認為仍係牛市。雖然銅價已回落20％、鋁回落21％，但估計未來三個月礦務股下跌機會只有30％，應趁低吸納。不過，摩根大通則睇淡，建議逢高沽。

　　1980年開始經濟環球化及互聯網化。中國、印度、東歐、前蘇聯等國家重返世界經濟體系，產生通縮壓力。幸好1980年起利率由高峰回落，令金融資產升值產生新需求，吸納新增生產力。2000起中國拚命加強固定資產投資，帶動全球天然原材料漲價。雖然美元利率由2004年6月起止跌回升，但CPI仍然向上。假設中國「十一．五」規劃能落實，中國經濟轉型成功，唔再過分依賴出口貿易、固定資產投資去帶動GDP增長，改為由內部消費、服務業取代，明年全球經濟發展便開始糾正過去不平衡，一個GDP增長率比較緩慢客觀環境將明年出現。當利率企於五厘以上，而標普五百指數息率只有一厘七五，股市一定受壓而下調。至於金價，估計五百四十美元至六百二十美元之間上落，無大作為。基於上述假設，股市利用短期超賣所產生支持力，唔知可以捱到幾耐？

　　通貨膨脹（CPI增長率）呢頭怪獸1980年已被雪茄伏制服，代價係1982年經濟大衰退。1983年起至今通脹偶爾發發脾氣，但已復七十年代威風。九十年代日本、1997年香港一唔小心，更曾出現通縮（通縮對上似乎已係戰前事，卻九十年代重臨）。做生意70％成本同薪金有關，1980年起約三十億人口重返世界經濟體系，令薪金升幅OECD國家受到限制（香港亦由1997年起停止加薪！），透過外判將工序轉移到低薪國家。2000年因中國大搞基建，刺激天然原材料漲價，CPI升幅亦有限，只係對沖基金貨幣氾濫下興波作浪。5月份開始美、歐、日齊齊收緊銀根，未來一段日子原材料價格漸漸受控，然後讓供應逐步上升，直至有一天重新出現供過於求為止。

寧願米貴上高樓

　　換言之，貝南奇責任係既防通脹亦防通縮（資產升值潮結束後，往往係資產跌價潮）。如只睇CPI，未來利率應見六厘二五，但咁做可能引發未來通縮，理論上以五厘半最合適。只係貝南奇點樣抗拒急於求成誘惑？將係最大考驗。作為小投資者，只有等、等、等！上周聯邦信貸已減少四十六億美元，即5月10日加息至五厘後已漸漸產生壓力。L增長率正急速放緩，理論上利率見五厘半已足夠，毋須見六厘二五。不過，我老曹唔係貝南奇，決定權佢手中。

　　過去我老曹曾講過通脹有兩種：
一種係人人皆知CPI上升。
第二種係金融資產升值，所謂「米貴上高樓」。
點解米貴反而可以上酒樓食飯？就係因為另一通脹（金融資產）升幅更大；1967至97年香港CPI平均每年升5％，同期恒生指數平均每年升20％，此乃1967至97年香港物價愈愈貴，但港人生活愈愈好理由。金融資產升值推動工資及樓價上升，升幅往往大於物價（CPI）。1997年後過去九年，香港CPI平均年增長率不足2％，但社會漸分裂成為20╱80，理由係1997年8月至今金融資產值平均每年下降1％，樓價平均每年降5％，有人利用高潮沽貨、低潮入貨，令財富不斷上升；但一般人往往高潮搶貨、低潮出貨，財富不斷減少；平均每個贏家背後有四個輸家！Trading已取代holding，大部分人trading表現欠佳。例如1998至2000年，有幾多人捕捉到TMT股熱潮？2003年至今年5月，又有幾多人趕上天然資源升值呢條船？

人行6月16日宣布提高商業銀行存款準備金率0.5％，7月5日執行。下半年加息與否，主要睇貸款增速係咪下降而定。提高存款準備金率可在短期內收緊流動資金，卻非防止流動資金氾濫根本解決方法。率低估令外貿出現過大順差，升值預期令大量資金流入，才係貨幣增速過快之底因。4、5月美國、歐洲及日本已採取收縮政策，造成流動資金減少、資產估值下降，係5月8日環球股市下跌理由。股市連續三年牛市或將終結，進入周期性熊市，狂熱開始消退。由於美國投資回報率唔高，資金被分配到新興市場及商品領域，以獲取更佳收益，過去曾帶動呢D股市及商品成倍上漲，亦係5月8日以跌幅較大根源。小心美國、歐洲及日本通脹壓力，可能逼使央行進一步減少流動性資金，令資產估值進一步縮水。

全球股市進入腌悶期

　　2000至02年周期性熊市抽乾IT行業過剩資金，今年5月起正在抽走新興市場及商品市場過剩資金。股市經5月8日至6月13日急跌後，全球股市進入腌悶期，大家度等候美國、歐洲同日本央行進一步行動。

　　OPEC過去幾年賺好多蚊年，令未來出售石油賺取外欲望下降。一旦油價回落，佢地將削減出口去維持高油價，令通脹率保持高企。而中國過去兩年正通過減少或取消出口扣稅去提升產品出口價。兩股力量可令明年前維持美國CPI上升及利率一升再升。過去資產升值誇大地產股、資源股及金融股純利，未來將作糾正。

　　今年中國唔想再做資源消耗大國。依家中國對鐵礦砂、銅、鋁等對外依存度超過70％，石油40％、天然氣60％。面對產能過剩，過去粗放增長方式遲早改變，一旦改變，亦將減少中國對天然原材料入口依存度。

　　保爾森6月27日到財政部上班。佢主張低稅率，並對美國財赤持樂觀態度，亦希望改革美國社會保障及醫療福利，以及主張人民幣加快升值。前財長斯諾花九牛二虎之力游說中國政府加快人民幣升值不果，而保爾森同意人民幣升值前中國必須改革金融體制，開放境內金融市場，然後才令人民幣價自由浮動。依家內地銀行有大量不良資產要處理，中國境內銀行唔係冇賺錢能力，而係缺乏有效管治，令純利大部分被不良貸款吃掉。保爾森出任財長，理論上有利中國境內銀行改革，不利人民幣短期升值。

　　國際結算銀行經理Malcolm Knight認為，過去二十至三十年低通脹、高增長時代唔可能永遠存在，到某一點，各中央銀行必須執行利率政策，以避免滯脹出現（即高利率、低增長），似乎在暗示美國加息期仍未結束。

　　日本銀行4月份開始抽資，令日圓由118升至109日圓才回落，到6月初見112日圓。過去三星期日本銀行停止抽資，日圓一度回落到116.7日圓，如下周開始日本銀行又再抽資，日圓會否再升上110日圓？上周土耳其里拉兌美元回落13％，周一印度盧比跌3.7％，南非蘭特跌3％。　　日本銀行有三大責任：QE（quantitative easing）、ZIRP（zero interest rate policy），以及FX
stabilization，亦即維持寬鬆貨幣政策、零利率政策及率穩定政策。上述會否7月份逐步取消？有待觀察。

莫斯科成全球最貴城市

　　日本短觀將於7月3日發表，估計日本大企業將增加投資9％（較3月份升三倍），包括NEC、豐田汽車等公司，信心係近七年內最好。日本十年期債券孳息率一度見一厘九一五，係6月6日以來最高。十五位分析員中，有九位估計7月份結束零利率政策。

　　畢非德善舉令人尊敬，但一般人最有興趣都係佢點樣將1963年一萬美元四十年內變成三千萬美元（同期標普五百指數只上升五十倍）。佢解釋話係適當時刻投資優質股，然後長期持有。近年巴郡手上現金愈愈多，係咪今天優質股愈愈少，或是依家係唔適合投資時刻？

　　四十年內投資升值三千倍即平均每年升值22％，的確唔易，尤其係資本愈愈大。用一萬元賺二千二百元好易，但以一億元賺二千二百萬元便唔易，何況銀碼大至四百四十億美元（三千四百多億港元）！要佢每年保持增長22％，即一年要賺九十六億八千萬美元（七百五十五億港元），你話難唔難？

　　莫斯科已成為全球最貴城市，到底有幾貴？我老曹畀大家一D概念：兩房一廳月租二千六百五十美元（約二萬多元港幣），出外飲杯咖啡二點九美元（約二十三元港幣），買份報紙一點八五美元（十四元五角港幣），食個漢堡包連薯條三點一二美元（二十元港幣）。南韓首爾排名第二，東京已跌至第三，香港第四，倫敦第五。

曹仁超2006-06-26投資者日記 第十八次加息機會高

曹仁超2006-06-26投資者日記 第十八次加息機會高

　　6月25日，周日。香港少見嘅藍天白雲呢幾天再現，我老曹心情亦開朗好多。不過，上周股市反彈十分短癮，主因係股市冇乜動力（momentum），恒生指數只喺15200至16000點之間游弋。在此環境下，一般人以少做少錯為守則，除非你有內幕消息（但上述做法係犯法嘅，因此擁有內幕消息嘅人士，唔會講你知，講你知有內幕消息者十之八九係假消息）。如果你想賭，可以賭波、賭馬甚至過澳門賭，上落終歸有限；金融市場才係賭身家地方，隨時一鋪清袋。由於6 月13日美股RSI低於30，MACD進入超賣區，引發股市反彈，到今天止，呢次反彈仍十分短癮。

農產品唔受加息影響

　　利率改變，要六個月後（甚至更長）才生效。如6月29日將利率推高至五厘二五，令短期息率再次高出美國核心通脹率二厘，可令明年首季美國核心通脹率受控制，但聯儲局有冇耐性？會否喺8月8日再加息？5月12日起美元已止跌回升，並6月5日形成雙底反彈，理由係同二百天線距離太遠。由於4月份美滙指數五十天線已跌穿二百天線，確認美元進入熊市，6月5日嘅回升只係反彈，估計可維持到7月或8月，美滙指數相信喺88.5附近再遇阻力。黃金、白銀及工業用金屬例如銅、鎳等，今年5月起進入調整期，取而代之係農產品例如小麥等，相信新一輪漲價潮由農產品帶動，例如棉花同橙汁等。上述商品唔受加息因素影響，而最關鍵係天氣。

　　美元短期上升周期6月已開始，可維持幾耐仍木宰羊。上述改變令商品價格受控制、新興股票市場股價回落，令出口股再度被睇好，起碼短期係咁。

　　今年5月如你冇喺股市及金市獲利回吐，可能已砸頭埋牆；如你依家揸住現金，不妨等6月29日之後再算。4月份美國耐用品訂單減少4.8％，睇嚟美國經濟已開始軟着陸。由於油價仍企喺七十美元一桶之上，放寬銀根在可見將來唔會出現。5月份係咪同牛講拜拜，同熊打交道？美股由2002年10月、港股由2003年3月進入小牛市，到今年5月雙方都有Ｄ疲態。熊已被吵醒，開始由洞穴中爬出來；新興市場股市由5月8日至今已跌20％，小熊市一期似乎已開始，至6月13日完成，然後係上落市，但大方向係反覆向下。未來將係耐性嘅考驗，過早入市者未必着數。如根據四年周期理論，今年5月開始進入回落期（過去美國中期選舉，道指平均回落8.4％，標普五百指數回落13.4％）。5月份道指見高位時，只有7.02％股份創新高，17％股份早已回落20％，通用汽車更回落40％，上述乃大市改變大方向嘅訊號。

　　美國十年期債券出現1984年5月以來最長嘅一次跌市。上周五出現連續第八個交易天回落，孳息率見五厘二二嘅四年高位。市場除咗相信6月29日加息四分一厘，愈嚟愈多人相信8月8日再加息，人數已達85％（上周仍然係五五波），並估計8月8日十年期債券孳息率可見五厘四。美元升至八星期高位，成1.25美元兌1歐羅及1美元兌116.57日圓。換言之，聯儲局不但有第十七次加息行動，第十八次加息機會更達85％。摩根大通分析員估計，新興股市將進一步受壓，南非蘭特已跌至三十三個月最低位，冰島、土耳奇、紐西蘭元等跌幅亦唔細。

　　日本十年期債券孳息率見一厘八七，估計7月份取消零利率後，可見二厘至二厘一。

　　MSCI亞太區股市上周跌0.6％，見121.23；5月8日至今跌幅15.4％。

樓市交投回升屬低價出貨

　　5月份香港銀行批出新住宅按揭貸款較4月升19.7％，達一百三十七億港元；二手樓貸款升12.9％，達一百億元，代表5月香港樓市交投回升，但相信係低價出貨。

　　至今為止，我老曹仍唔清楚6月14日道指10698點係拋售高潮抑或跌市中途島，上述分析結果可令你未來十二個月變得更富有或較貧窮。技術上睇，道指5月10日至今仍係一浪低於一浪；標普五百指數喺6月14日更創今年新低才反彈；納指五十天線已低於二百天線，出現死亡交叉；股市訊號繼續係有反彈冇上升。股市舊領袖（商品股、新興市場股及二線股）已回落超過20％，代表熊市已開始，股市新領袖一如三位博士，仍在依賴伯利恆之星引領，尋找「新生王」。依家處境係舊浪已進入退潮，新浪卻未開始。五窮六絕已肯定、7月能否翻身？則木宰羊。　　5月10日加息後，股市已感到痛，6月29日如再加息，會否喺傷口上擦鹽？另一方面，每片黑雲都鑲有銀邊，睇來睇去，未來經濟只係增長率放緩，而非陷入衰退，因此前景亦不應睇得太灰。踏入下半年業績公布期，今年上半年企業純利仍有增長。換言之，7月唔係冇賺錢機會，只係需要努力Ｄ去發掘！我老曹嘅責任係努力令你更富有，方法係捕捉每次潮流嘅改變。當然，不如意事十常八九，雖然大潮流方向冇睇錯，但喺轉捩點方面掌握仍唔係咁準，呢方面仍在努力提升中。人誰無錯？過去睇啱，唔代表將來一定睇啱，反之亦然。每一次都係新體驗及新挑戰，投資呢一行吸引力便是每天都有新事物要分析，往往令人唔知老之將至。

　　做我地呢一行，能知過去容易，預測將來卻難。唔少人用盡種種方法，結果仍係時啱時唔啱。近年錯得最離譜就係波浪理論派，由1990年起一直預測美國經濟衰退，但至今仍未實現。必須承認，我地呢一行只係能知過去，至於預測將來，至今為止冇一個人可做到，不過當有訊號出現時，小心Ｄ係必須嘅。任何人告訴你佢能知未來，請立即離開佢，因為佢唔係騙子就係白癡，因為先知早喺二千年前已死晒，自耶穌誕生後，世上再冇先知。

1997年後行業衰多盛少

　　八十年代初期，中國經濟由封閉式走向開放式，引發出口同入口需求，中國經濟由八、九十年代資金流入式經濟，漸漸變成今天資金雙向流動。香港經濟由八十年代以盛衰循環為主，轉化為個別行業各有各精采。今天香港經濟本身愈嚟愈穩定，唔會出現過熱亦唔會過冷，但個別行業升降卻極之驚人。有人認為呢個係對沖基金運作嘅結果，亦有人認為行業性盛衰取代整體經濟繁榮與衰退，才令對沖基金急速成長，到底有雞先抑或有蛋先？我老曹對呢項爭論冇興趣，只知上述現象1997年後已成主流。唔少人只知1997年8月後香港經濟不前，其實早喺1997年前，唔少行業已進入惡性競爭期。例如電腦硬件生產商自1984年起邊際利潤走下坡，至今超過二十年，情況未改善；至於飲食業（尤其酒樓），1987年起便走下坡；報業自1994年起走下坡；航空業1997年起走下坡；半導體生產業2000年起走下坡；甚至房地產項目中，寫字樓亦早喺1994年走，1997年回落嘅只係住宅樓價。今年係咪商品股見頂及國際性跨國銀行股見頂（本地業務為主嘅銀行股，唔少早在1997年見頂）？未來邊Ｄ行業進入繁榮期？我老曹正在努力找尋中。

　　資產升值後，必然帶嚟資產值回落期。香港樓價由1984年起步至1997年上升十三年，調整50％亦需六年半時間；到2003年第三季，時間上已脗合，此乃2003年第二季我老曹叫大家買豪宅嘅理由。見底後必反彈，但唔代表另一上升周期開始，其他行業亦一樣。例如香港酒樓七十年代開始愈開愈多，至1987年達到高潮，1987年10月股災後，香港酒樓業便開始走下坡，過去二十年內亦有起有跌，但跌嘅日子長、起嘅日子短，今天香港酒樓數目較1987年減少一半或以上。再以報業為例，1994年前大部分報館皆欣欣向榮，1994年後卻需要喺萎縮中嘅空間爭取生存機會，邊際利潤大幅回落，甚至進入惡性競爭，最後進入寡頭經濟，即只由幾份大報紙壟斷市場，其餘報館唔係艱苦經營便係被淘汰出局。不但報業如此，其他行業如電影業亦早已走下坡，而且速度更為嚇人，連出現寡頭經濟嘅機會都冇，變成野貓式經營（例如有好劇本便埋班開戲，不然便散Band），連影后都要到電台兼職做DJ，同六十年代電影業比較真係差天共地。香港電影業七十年代開始自從無線電視普及已走下坡，其後出咗個李小龍，曾令電影業一度強力反彈，自李小龍逝世後，電影公司便買少見少。仲有旅行社亦早喺八十年代開始走下坡。我老曹出嚟社會做事快四十年了，睇住唔少行業性盛衰，1997年前盛嘅行業多、衰嘅行業少，1997年後卻係衰嘅行業多、盛嘅行業少。

　　今年下半年又在敲門，未來展望如何？大前提係香港GDP增長率今年第二季起放緩，但通脹率第三季仍上升，要到第四季才放緩，加上7月份日本銀行可能放棄零利率政策。索羅斯話，過去數月日本中央銀行已從市場抽走二千億美元，引發新興股市5月份起急跌，上述資金不但唔會重新投入市場，恐怕日本7月份起仲會進一步抽走資金。過去三十年日本央行有三次貨幣供應出現負增長：第一次1981年、第二次1992年、第三次2000年；今年4月係第四次。前三次都令日經平均指數大跌，相信呢次亦唔例外。過去日本貨幣政策對世界經濟影響唔大，但2001年起日本實施零利率政策，成為唔少對沖基金嘅資金提供者，形成呢次日本銀行抽資影響力咁大。何況今年4月起嘅抽資行動係環球性，美國、歐洲甚至中國都加入（估計英國亦好快加入），目標係對付高油價，但油價仍頑強地抗跌，睇落呢次環球性中央銀行抽資行動，距離結束日子仍遠。

　　我老曹相信，1999年（或2001年）開始嘅原材料上升周期今年5月結束，呢點由銅價近日下調可證明。但CPI上升速度今年第三季才見頂，令利率上升周期極可能維持到8月8日或以
後；經濟放緩期今年第二季或第三季才開始，明年才結束。黃金反覆上升期由2001年開始，今年5月結束，上阻力七百三十美元，下支持五百四十二美元，喺可見將來估計都喺呢個框框內玩上落市。本周四美國將加息四分一厘兼美元進一步上升，能否將金價喺7月份內逼降至五百四十二美元形成雙底？並唔清楚。

　　奧地利已故畫家克林姆（Gustav Klimt）1907年所畫嘅《黃金畫作》（Adele Bloch-Bauer
I）6月18日以一億三千五百萬美元（十億五千萬港元）賣出，不但超越2004年5月畢加索嘅《拿煙斗的少年》售價一億四百萬美元，折合八億一千萬港元，同時超過1990年5月日本商人以一億一千萬美元（八億五千八百萬港元，加上通脹因素計）購入梵谷（Van Gogh）嘅《向日葵》。日本股市喺1990年1月回落，房地產1990年6月回落，2004年5月環球股市曾一度回落。呢次《黃金畫作》以超高價賣出，美國金融市場及樓市未來的確有Ｄ令人擔心。

盈大北京地產項目受負面影響

　　巴黎係個好地方，例如每周兩次街邊小販售賣嘅蔬果，都係剛由田上摘回來，路邊嘅小型音樂會令人感覺舒暢，河畔旁嘅漫步令人有重返戀愛時期感覺，路旁嘅午餐令人有游閒感覺，同香港熙熙攘攘、匆匆忙忙、分秒必爭嘅情景比較，給人另一種生活感覺。到咗巴黎，真係可以完全忘記金融市場的波動、衍生市場嘅拚命……。但喺巴黎生活，費用絕不便宜，一個路邊午餐隨時要你三十至五十歐羅（淨係食pizza亦要十歐羅）。換言之，欲享受巴黎嘅浪漫，你必須喺香港金融市場投資成功才可負擔，非一般打工仔可以負擔得起。法國人比較熱情，唔似英國人嘅「撲克」面孔，初見面已可一起午餐兼吹水，天南地北講餐懵（一般都識英文），但亦到此為止，上述只係霧水友誼，絕不可靠。

　　父親節前，我老曹兩個女兒決定每人送件衫畀我。我老曹兩年前答應太太每月減一磅，至今體重已輕咗二十六磅，形成衣服唔合穿，目標係再減五、六磅才停止。不過，點解減肥過程中為何要添新衣呢？由於衣不稱身，兩個女兒認為我老曹愈嚟愈似倒霉嘅寫稿佬，唔似成功嘅投資者！唔知係咪年紀大咗，我老曹早已失去扮靚興趣，最後拗唔過女兒才添咗兩件新衣。唔知其他父親係咪一如我老曹，好怕去百貨公司揀衣服。我老曹感覺係揀衫較揀股票更難，反之女性卻好喜歡喺商場內留連，隨時可花半天時間仍未夠喉，而喺選股票方面卻不願浪費超過十分鐘。我老曹經常笑自己太太係Penny Wise, Pound Stupid！（小錢精明，大錢糊塗），唔知其他女性係咪亦係咁。

　　北京6月25日消息，電盈（008）日前提議將旗下電訊資產出售，未獲中國網通（906）同意，已影響盈科大衍（432）喺北京開發房地產項目嘅計劃，包括北京朝陽區建設呼家樓電話局（該地產屬中國網通集團所有）；其次係一個價值十億元人民幣嘅豪宅項目；電盈佔盈大61％股權。冇中國網通協助，令盈大喺北京地產項目上受負面影響並唔奇怪，投資者宜小心。

曹仁超2006-06-24投資者日記 賺錢唯有與群眾諗法唔同

曹仁超2006-06-24投資者日記 賺錢唯有與群眾諗法唔同

　　6月23日，周五。恒生指數跌17.89收15808.81；成交一百八十四萬四千多元。6月期指收15780點，低水。電盈（008）跌4.4％，見五元五角，因為第二大股東網通（906）反對改變現狀。電視廣播（511）升6.8％，見四十九元五角，因《明報》報道電盈打算收購。電視廣播去年營業額四十一億七千六百多萬元，較2004年上升9.4％，獲利十一億八千萬元，上升64.1％，其中一億四千八百多萬元來自出售金融資產。每股獲利二元六角九仙，O十八點四倍，去年廣告收入二十六億八千多萬元，只升3.2％，可見此一市場未來增長空間十分有限。去年純利八億五千九百多萬元，來自電視廣告純利較2004年升65.46％，主因是去年香港經濟復甦，令廣告收入升3.2％（或二億二千九百多萬元）。電視業喺開支上比較固定，純利升降極受廣告收入影響。無線電視營運開支大約十五億元一年，超過上述數目便是集團來自廣告收益溢利，至於O十八倍以上值唔值得博？各位自己諗啦！小心又係另一次貴買而須他日賤賣。依家電視廣播股權由邵氏兄弟（080）持有，係邵氏兄弟最重要收入來源。邵氏兄弟其他業務則得啖笑，如出售TVB後真係冇嘢搞，邵爵士會好悶。相信今天唔少前電話公司股東仍後悔2000年冇趁市好出售香港電訊股份而接受電盈收購，變成今天嘅局面。

　　投資者自1997年至今可以話面對多次大上大落，先有亞洲金融風暴，然後又來TMT股熱潮，隨之係科網股泡沫爆破、「九．一一慘劇」、英隆事件、沙士疫症。2003年3月起開始自由行、CEPA及炒商品股熱，可以話過去十年既有大生亦有大死，既有機會賺到盤滿缽滿亦有機會一鋪清袋。有些投資當時睇落無限商機，結果陰溝翻船；有D投資似乎山窮水盡，轉眼又柳暗花明。過去十年地球愈轉愈快，真係十年人事幾番新。1997年至今投資市場訊號很清晰，如果你要
賺大錢，必須與群眾諗法唔同。當佢地樂觀時退出、悲觀時入市，不要怕與別不同，此乃賺錢方法。建立自己嘅目標及計算自己承擔風險能力；如果你嘅目標只係賺取 10％利潤，小心結果係損失慘重及戀上失敗項目。你應該搵那些有機會賺取50-100％項目及唔好忘記把止蝕盤訂喺虧損10-15％水平！

　　恒生指數15200點到底係牛市嘅腳抑或跌市中途島？暫時未清晰。二百五十天線移動平均數仍在上升中代表投資者情緒仍然樂觀。必須見到五十天移動平均數低於二百五十天線才確認熊市，只係上述訊號出現時已太遲。值得注意嘅係，納指上周五十天線已跌穿二百天線【圖】（外國習慣用二百天），即納指已確認熊市。不過，標普五百指數及道指尚未出現上述情況。恒指亦未出現五十天線低於二百五十天線。

銀行股已出現頭肩頂

　　過去十年成功市場分析員都係嗰D着重個別行業分析者而非只睇大市方向者。投資係一項唔易賺錢嘅項目，以恒生指數計，今年上半年跑輸定期存款利息（1997年7月1日至今快九年了，恒生指數長期跑輸銀行定期存款回報）！1929年有人問洛克菲勒後市點睇？佢嘅回答係：後市永遠波動！1997年7月1日時相信冇人諗過未來九年港股並冇提供回報只提供波幅（除非係精於選股才可賺錢），情況已較房地產好，1997年7月1日至今除豪宅外，全部都跌價。

　　2006年5月後股市點睇？VIX（Volatility Index）自2003年5月起一直回落，但2006年5月起卻急升，即2006年5月起投資股票風險大幅上升。

　　從走勢表現睇銀行股已出現頭肩頂，代表銀行風光嘅日子已成過去。各位認為最安全已嘅地方，事後發現可能係最危險嘅地方。

　　新興市場連續五星期面對淨沽出（即沽出大於買入），至6月21日止被抽走資金一百五十四億美元（上周抽走二十億美元）。今年首四個月淨流入（流入減流出）三百二十九億美元，其中一百五十四億美元已被抽走。全球有一萬五千個基金，控制資金超過七萬億美元，投資項目唔少涉及新興市場投資，5月8日至今MSCI新興市場指數跌20％。基金喺新興市場嘅投資減少25％（5月10日最高峰時揸三千零四十八億美元）部分理由係減持，更大理由係所持股份跌價。影響較大有東歐、中東、非洲及拉丁美洲。

　　
2003年3月起，資金大量流入新興市場，2006年5月起又從新興市場流走。資金流入令新興市場出現一片繁榮，資金流走後又會點？2003年至今年4月能源股同資源股出色表現會否喺今年5月結束？呢方面意見依家好分歧，尤其係油價方面，唔少人仍相信油價遲早見一百美元一桶，亦有人認為可回落至五十五美元一桶，睇好者強調中國因素同印度因素，睇淡者認為油價咁高，需求正在放緩中。我老曹並非石油專家，只有做旁觀者。油價係一切通脹之本，如油價升，其他商品回落亦只係調整；如油價跌，可確認今年5月起商品價格見頂。

　　根據TIPS債券表現，未來通脹率應受Contained，因此呢次銀根收緊應該好溫和，估計利率上升止於五厘二五至五厘半。一旦油價受控制後便停止上漲，加息趨勢便停止。換言之，利率上升期極有可能今年8月8日便結束。

　　經濟學唔係物理學或化學，冇定律可言。嚴格而言唔係科學，阿當斯密喺格拉斯哥大學教心理學，佢地巨著《原富論》討論群眾心理多於科學分析。例如恐懼與貪念、希望與嫉妒、仁慈與瑣碎、愛與恨及旁觀主義，都可以對經濟造成影響。美其名為自由市場，任何人喺法律範圍內可做任何事，佢地嘅行為事後決定成功與失敗。理論上，市場愈自由，代表每個人獲更公平待遇，因此政府不得偏幫任何人、任何財團甚至任何行業。

　　現代科技改變咗人類溝通方式、投資方式及貿易方式。例如世界盃已取代香港人睇精工對南華，沙士疫症曾令香港經濟陷入低潮。人與人之間已變得這麽近又那麽遠，5月9日由原材料價調整開始，喺五星期內對金融市場又可造成咁大破壞。利率、通脹、股市、外滙、商品價格、衍生工具及分析員言論影響都無遠弗屆，只要貝南奇喺美國講一句話，全球經濟可以出現大波動；5月8日至6月13日所帶嚟嘅經濟破壞甚至去年泰國海嘯至今仍未回補及唔知幾時補回。

投資法國物業稅負重

　　2004年起我老曹開始減持倫敦物業，當時曾經考慮將資金轉投巴黎房地產，但因為自己唔識法文而放棄。同倫敦比較，巴黎物業便宜一半，近三年每年升值10％左右（2004年前升幅有限），但法國稅率都幾重。例如要付增值稅（TVA）係物業淨買價19.6％，或可選擇付TTC係總買價嘅16.4％。如喺二十年內將物業出售，政府可退回TVA或TTC；如超過二十年，政府便唔再退回。契約費用政府收樓價2－3％（睇樓價高低而定），如做按揭，銀行收樓價1.5％作為手續費，如要翻譯成英文，代價二百五十歐羅。最高可按樓價80％（包括TVA），還款期最長二十五年！如出租，一般租約可長至九到十一年。租金收入25％係稅（但可扣除利息開支、會計費、保險費及地稅），買傢俬可分十年扣稅，物業減除土地成本後價值可分二十五年扣稅。依家一房一廳單位（約四百五十方呎），一般售價二十五萬歐羅（約二百四十萬港元），租金回報率五厘左右，按揭利率三厘七五。付20％首期（80％按揭）仍有錢落袋。

　　如非歐盟居民喺出售物業時抽33％資金增值稅，按年遞減至十五年後為零（即持有十五年以上，甚至非歐盟區居民亦不用付資本增值稅）。

　　由於巴黎嚴格限制重建，因此大部分都係幾十年前舊樓，樓高七至九層，只有新區才有大廈式建築物，反而唔及舊樓值錢（交通比較冇咁方便）及以新移民為主。過去三年巴黎樓價已升值30％，如扣除各種稅項開支、手續費等，仍冇幾多錢落袋。同英國唔同，英國地產法例同香港接近一樣，尤其係非英國居民（唔使付增值稅）。租金收入可以喺利息開支中全部扣除（接近唔使畀稅），物業買賣政府收費好平，律師費亦便宜，最貴係物業代理佣金，一般係樓價4－6％，由買賣雙方各佔一半（如樓市旺時可完全由買方承擔，如樓市淡時亦可完全由賣方承擔）。

　　巴黎同倫敦唔同地方係倫敦樓價只要升10％，便開始有錢賺；巴黎樓價要升30％，才打和。

　　中國增加商業銀行存款準備金至8％，業內人士認為因大量期票到期；加上外滙存款不斷流入，增加存款準備金並唔意味流動資金會抽緊，尤其係近期新股重新認購更加大銀行間資金波動。去年人行發行一年以內短期品種債券，今後八個月內平均每月有三千二百九十八億五千萬元票據到期，以4月份銀行總存款三十二萬二千八百億計，即每月可為商業銀行提供1％流動資金。換言之，7月5日增加存款準備金未必能抽緊內地銀根。

　　首部規範企業投資嘅規章快出台，將嚴格規定三類企業必須上報審核：一、包括資產負債券為65％以上企業。二、非主業投資超過總投資5％企業。三、非主業資產超過總資產5％企業。相信「中央企業投資管理暫行辦法」出台後，可減少公司從事非本業項目，大大降低企業嘅投資風險。國資委主任李榮融曾表示，唔少國企喺證券或貸款上非主業領域投資損失，一直係導致企業虧損重要原因之一，例如南方航空（1055）母公司炒股票造成巨大虧損。此一例一出，代表政府唔鼓勵企業多元化發展。

內地地產代理進入冬季

　　「國六條」出台後，再加十五項細則，開發商開始沉默，6月20日深圳國土局頒布了全國首個地方房地產調控落實細則之後，廣州市國土局出手向三十四家單位追繳土地出讓金，發出閒置土地回收公示，宣布收回二十五宗面積總計三十二公頃閒置土地，要求未入房屋管理系統嘅四十七個專案必須7月30日之前換證上網。北京市建委和規委亦根據「國六條」相關內定制定實施細則方案已報市政府，不日公布。上海樓市亦靜待地方細則出台。呢次國六條後地政府紛紛出手，睇嚟內地樓市又再下調。唔少代理行已掛出招租或轉讓告示，睇落內地地產代理開始進入冬季，唔排除實力有限嘅小型開發商及地產代理被市場淘汰出局。從呢次地產商選擇沉默睇，證明呢次調控有威嚇力！

　　中國十三億人口，真正有消費力者只佔15％，約一億九千五百萬，相等於美國人口40％。大部分四十五歲左右係改革開放下受惠者，又以居住喺沿海省市為主，記得1998年有人話十三億中國人口每人每天飲一支可口可樂，可口可樂便發達，因此推介可樂股份，八年後可樂股價卻一跌50％。原來中國有一半人口係負擔唔起日日飲可口可樂，中國唔係美國，到咗今天，好少中國人每天飲一支可樂！

外資很難建立連鎖店

　　喺內地推銷消費品，發現中國係各處鄉村各處例。每個省市都有本身文化及習俗。美式連鎖店經營方式喺中國行唔通；甚至珠三角消費模式同長三角唔同，喺中國好難建立全國性連鎖店。今天相信有五十萬香港人住喺珠三角，有五十萬台灣人住喺上海一帶，只係呢點，已令兩地有好多地方唔同。

　　國家統計局綜合司宣布，今年1月至5月全國工業實現利潤六千二百九十四億元，較去年同期上升25.5％，升幅大者有石油、有色金屬、電力、部分重化工業及交通運輸設備製造業。

　　前後五輪，整整七個月談判，結果仍係中國接受鐵礦石價格漲19％！最大買家反而一再被敲竹槓！歸根到底係中國鋼產無序增產，又忽視對鐵礦石海外投資；反觀日本上世紀五十年代末期已開始投資國際鐵礦石，喺巴西、澳洲都有直接或間接控股公司，鐵礦石加價，荷包跌落肚兜，嚟自上述公司純利對沖進口多付外滙，反觀中國最近才學會咁做，形成喺原材料上都被別國敲竹槓，銅係咁，鐵係咁，石油係咁，結果中國以高價入口原材料，低價將產品出口！自己做死，別人笑死。

曹仁超2006-06-23投資者日記 散戶唯有二仔底

曹仁超2006-06-23投資者日記 散戶唯有二仔底

　　　6月22日，周四。恒指升167.43，收15826.70；成交二百三十六億四千五百多萬元。6月期指高水，升208點，收15832點。後市展望，相信恒指仍在框框內上落，起碼在下周三聯儲局開會前仍然係咁。

　　油價相信係令聯儲局成員寢食不安嘅因素。兩星期前國會拉咗格蛇出嚟講話，格蛇並唔擔心消費問題甚至美國樓市，但最擔心係油價，佢擔心零售汽油價，不但令通脹率上升，同時吸走美國人嘅購買力。喺高利率壓力下，各國經濟增長率將放緩（最遲明年出現），環球負擔高油價，結果不但影響經濟增長，同時令美國貿赤惡化，影響市場對美元信心。例如美國汽車銷量去年已走下坡，估計今年第四季GDP增長放緩，並因石油入口而令貿赤惡化。

　　美國原油儲存已達八年高水平，6月16日止存量三億四千七百一十萬桶，係1998年5月29日以來新高，但油價上升軌至今仍十分完整。

利率上升直至油價受控

　　從格蛇兩周前嘅講話，相信聯儲局將致力扭轉上述趨勢。何況5月份通脹率4.2％（核心通脹率2.4％）【圖一】，相信呢次利率上升周期要到油價受控制為止。

　　國航（753）以三十二億三千萬元將中航興業（1110）私有化，每股出價二元八角，以增持國泰（293）；國航已持有68％中航興業，中航以手上港龍股權交換國泰航空7.3％股權。國航將中航興業私有化後，除增持國泰外，同時亦佔澳門航空51％；另一方面，國泰亦增持國航，由10％上升到20％。

　　大摩今天提升東航（670）評級，由underweight升至equal weight，亦唔排除外國航空公司趁東方航空股價偏低而入股，外傳新加坡航空公司已表示有上述意思，去年1月至今東航股價回落37％，理由包括高油價及激烈競爭。此外，該行同時提升南方航空（1055）評級，亦由underweight至equal weight，理由係今年內南方航空股價已失去四分一市值，以資產淨值計，吸引力甚至超過東方航空。南航股價大跌理由係母公司喺股票市場輸錢，而兩位南方航空高層行政人員涉嫌利用公司資金從事上述投資，依家正等候起訴。航空股係咪否極泰來？仲未清楚，但過去幾年內地航空股表現的確幾令人失望。

　　電盈（008）股價再升9.6％，見五元七角，但開市七分鐘後便再停牌；SUNDAY（866）升9.6％，見五角六仙後，開市九分鐘後亦再停牌。公司將決定接受邊個收購電盈手上電訊及now TV業務。

　　環球對沖基金控制嘅蚊年多達一萬四千億美元（上述未計佢地嘅借貸能力），由此可見佢地睇好或睇淡所產生嘅volatility。香港任何一隻二線股只要被其中一、兩隻基金睇中，股價可以升到你唔信；反之，一旦由寵兒變為棄嬰，股價亦可以跌到七個一皮。如果唔學習佢地嘅語言而盲目投資，隨時喺股市浴血。例如5月8日至6月13日佢地嘅unwind行動，令港股好似整個塌下來；散戶力量相對於對沖基金實在太渺小了！散戶投資策略睇落只有「二仔底」（死跟），當佢地拋售股份時最好避開、佢地吸納股份時可以照跟，一旦佢地停止吸納便沽出獲利。

　　互惠基金晒士雖然較對沖基金大，但佢地唔係經常買賣股份（喺美國，互惠基金只佔總成交15％，對沖基金卻佔70％，散戶佔15％）。香港散戶買賣佔大市總成交比重雖然已下降，但同美國比仍算偏高。互惠基金對市場嘅影響力在於中長線，唔似對沖基金一旦拋售，可令恒指喺五星期內回落12％。

　　拋售係咪喺6月13日完成？通常需要事後而非事前可知。由5月8日恒指17328點回落到6月13日15204點，跌幅達12.25％，唔少投資者已感覺到痛，大市開始派止痛餅。6月結在即，做D櫥窗粉飾，相信6月29日加息四分一厘已在股市反映。2003年3月開始上升嘅領袖股（例如資源股）已變得太昂貴，需要抖一抖，新嘅股市領袖相信好快出現。喺新舊領袖交替期，股市只有炒上炒落。投資者情緒由5月初睇恒指破18000點改為6月中擔心恒指跌至13000點，可見香港一般「分析員」嘅水準如何！做分析，首先要戒便係瞎猜，而要追隨趨勢；不要悲觀亦不要樂觀，因為睇好睇淡都只係主觀願望。股市出現超買便要回落、超賣便要反彈；留意牛╱熊比率（bull╱bear ratio），避免自己情緒過分受市場氣氛影響而偏淡或偏好。生活要感性，但投資要理性。

　　根據三線分析法，去年10月至今美股羅素二千指數（代表整個股市）第三條上升軌支持點喺675點【圖二】。如此關守住，後市仍冇問題；反之，如675點失守，咁2002年10月開始嘅小牛市可能步向死亡。上述乃形態分析鼻祖John Magee分辨牛、熊市嘅方法。用三線分析法睇，美股牛市已十分危殆，但未死亡。如用移動平均數（通常係用作確認其他技術指標，因為移動平均數反應比較慢），喺牛市中，五十天移動平均數及十天移動平均數應喺二百五十天線之上波動；反之，喺熊市中，五十天移動平均數及十天移動平均數應喺二百五十天線之下波動，但二百五十天線唔係牛熊分界線，跌穿二百五十天線唔係乜嘢訊號（直至五十天線及十天線都跌穿為止，不過當呢D訊號都出現時，牛市早已死亡，因此好少人用移動平均數去分辨牛、熊市。似懂非懂嘅人最危險！

日本經濟擴張期持續

　　隨着人口老化，高收益項目日漸抬頭，例如近期ELN大部分可提供雙位數字利率，近日好受歡迎。6月13日投資者開始又到處找尋可投資嘅項目，而唔再理會6月29日加息，理由係未來通脹壓力唔大，估計息率將止於五厘二五或五厘半，上述息率理論上只會令未來經濟增長率放緩而唔會引發衰退。部分行業例如地產代理喺利率步向五厘時已受壓，香港樓價須下調10－15％（唔少早已下調10％，即未來下跌空間只有5％）。去年過分進取嘅投資者已嘗過燒手指之痛，但呢次
唔係另一次1997至2003年事件嘅重演。

　　日本5月份外貿盈餘自2004年12月起首次出現上升，主要係汽車出口美國上升，電子產品出口中國上升，令外貿盈餘上升35.2％，至三千八百四十八億八千萬日圓（約三十四億美元）。出口上升18.9％，入口上升17.9％，上述環境令日本銀行喺7月14日加息機會大增。5月份日本出口美國升20.6％，出口中國升29.4％，出口歐洲升16.2％，出口亞洲地區升15.9％。由於油價上升，自去年1月起日本外貿盈餘一直在減少，今年5月係首次回升。戰後日本最長一次經濟擴張期係1965至70年，共五十七個月；呢次經濟擴張期已達五十一個月，唔排除超過上一次（如今年11月前日本GDP一直保持增長嘅話）。

　　中國7月1日起進一步降低汽車等商品進口關稅。一千cc以下小轎車入口稅由13.8％至6.4％，降至10％；對菲律賓二千八百三十八個稅項商品實施東盟自由貿易區框架協定；對香港三十七個稅目商品進入內地實施零關稅；並對澳門二十四個稅目商品進入內地實施零關稅。

鋼鐵業醞釀新一輪跌價潮

　　外傳本月底中國可能公布限制外資投資國內房地產，以免帶嚟過多外滙進入中國，引發地產泡沫。國家外管局可能使用一些技術性限制措施，如收緊交易結算模式，加強對房地產企業接受海外資金或海外上市監管。此舉不但可緩解內地房產價格上升所面臨嘅壓力，亦有助放慢外滙儲備增長速度。市場揣測中國將允許人民幣加快升值步伐（過去一年人民幣已升值1.4％）。

　　今年首五個月中國鋼鐵市場普遍出現強勁反彈，寶鋼公司已三次提高產品價格，中國鋼鐵業係咪否極泰來？今年首五個月中國固定資產投資增長率高達30％，以中國標準衡量速度仍然好高，因此而產生嘅鋼鐵需求仍殷。其次，今年首五個月中國已由鋼鐵淨進口國改為淨出口國，淨出口量達五百萬噸。鐵礦石加價19％後，對大型鋼鐵製造商而言冇問題，但許多利潤率較低嘅生產商卻面對壓力；加上中國政府表明態度唔允許外資企業（特別係大型知名企業）收購中國鋼鐵製造商控制權，只可佔少數股東股權，睇嚟中國鋼鐵廠淘汰賽仍未停止。中國接受鐵礦石加價19％後，每噸鋼材成本大約增加一百多元；另一方面，國際海運價格下跌，卻可沖淡新增成本。去年中國進口鐵礦石二億七千五百萬噸，佔全球總鐵礦石國際海運貿易量43％，加價後入口鐵礦石成本與國內生產鐵礦石售價接近，估計入口量將減少，令海運需求略減，不利航運業。展望未來，鋼鐵供應仍供過於求，一旦中國固定資產投資增長率放緩，新一輪鋼鐵跌價潮又開始。不負責任盲目擴張嘅代價，可令唔少鋼鐵廠因虧損而倒閉，請不要flood the market！

　　從呢次談判中，證明中國雖然入口量大，雖然有話事權，但冇定價權。呢次喺包括談判技巧、組織方面、策略運用等，仍然有需要學習嘅地方。例如冇採用「開缺口」策略（反而被對方逐個擊破。例如巴西淡水河谷最先與德國蒂森克虜伯鋼鐵達成協議，然後到其他鋼鐵廠，最後中國發現自己已被孤立）；冇聯合其他鋼鐵企業喺談判中共同進退，例如冇同日本鋼鐵企業訂下共同進退協議。喺談判過程中，缺少說理，並冇運用資料去說服對方，例如國內鋼鐵售價下滑及幾多鋼鐵廠蝕本等作為談判技巧，缺乏說理能力，到最後發現自己被孤立，便匆匆順從對方條件；加上中國冇鐵礦石期貨市場，無法為價格對沖。呢次塞翁失馬當係買個教訓，何況係第一次。未來須談判嘅事仲有好多，呢次當吸取教訓。自由市場談判既講實力又講技巧，唔似從前國有時代硬綁綁，因為都係國家蚊年，同自己痛癢無關。

　　中國去年石油消耗量達三億二千萬噸，其中45％依賴進口，估計到2010年入口依賴度升至55％。以每年進口十億桶計，每上漲一美元，中國須多付十億美元，喺如何建立穩健石油來源及控制石油成本上，中國需要學習嘅地方更多。一味靠「走出去」收購，只會買貴貨，而且外國早已用中國能源威脅論作為藉口，隨時阻止中國收購其國家嘅能源資產！

沉迷投機如金融慢性自殺

　　中國人口係美國四點四倍，能源消耗93％係國內生產，而全球最大能源消耗國係美國，但中國反被指摘為能源威脅國家。睇嚟中國喺能源策略上必須好好思考一下。

　　印度向中國學習，一下子批出一百六十四個新經濟特區（係咪多咗D？），利用稅務優惠、寬鬆勞工法、良好基建作為吸引賣點，條件係產品必須出口而非內銷。印度政府估計，未來三年可吸引二百二十億美元資金流入，創造就業及改善印度貿赤，喺經濟特區發展建築物者，有十年稅務優惠，租用者有五年稅務優惠（另五年稅務減半）。印度希望透過出口增加去改善貿赤，相信印度將成為另一廉價產品生產基地。

　　根據芝加哥心理學家Brett
Steenbarger研究traders心理結果，發現好多trader並非真正追求利潤，而係尋求刺激。一如唔少人玩過山車、笨豬跳、跳樓機道理一樣，佢地過度投機，理由係尋求刺激，同揸快車及濫用藥物嘅理由接近，漸漸成為習慣而不能自拔。另一位心理學家AlexanderElder更把呢類人列為中年人嘅危機：通常五十歲、受大學教育、已婚及有份收入幾好嘅職業，因為感到生活沉悶而想打破悶局。有D人發展婚外情，有D人留馬尾，有D人揸快車，更多人到股票市場尋找刺激，承擔超過自己能承擔嘅風險—賺大錢可帶來莫名其妙嘅興奮，即使蝕大本亦可打破自己沉悶嘅生活……。呢類
trader由於太情緒化，往往喺最唔應該入市時入市，最唔應該沽售時沽售，結果有如揸快車或濫用藥物─悲劇收場。其實投資係幾沉悶嘅事，完全唔刺激，包括須嚴守紀律。為追求刺激而做trading，有如揸冇剎車掣嘅快車，結果往往車毀人亡。經過5、6月跌市後，又唔知幾多trader損失慘重。你有冇中年人危機，去追求high嘅感覺？投機有如濫用藥物，必定愈踩愈深不能自拔。請記住，千萬不可動用超過本金5％作投機，不然你在玩金融慢性自殺。投機唔係玩過山車或笨豬跳，係可以出事嘅行為，唔好以為只有五十歲才會染上，有D人到咗三十歲已經係咁，小心。

　　衛科創業（8172）五股合為一股，周五生效。
　　SUNDAY、電訊盈科、湖南有色（2626）、錦恒汽車安全（8293）、華多利（1139）停牌。
　　中國水務（855）停牌，宣布發行可換股債券。
　　■成功控股（288）、莊士中國（298）、寶德科技（8236）7月3日；景福集團（280）4日；新昌營造（404）7日；興利科技（114）14日公布業績。

曹仁超2006-06-22投資者日記 部分股份出現抗跌力

曹仁超2006-06-22投資者日記 部分股份出現抗跌力

　　6月21日，周三。恒生指數升50.38，收15639.36；成交二百一十三億五百多萬元。6月期指低水，收15624點，升24點。電盈（008）可能出售電訊業務同now電視，2000年爭崩頭搶番嚟嘅項目，今天卻要出售；買家除咗嚟自澳洲麥格理銀行外，亦有嚟自美國嘅新橋。佔電盈
20％嘅第二大股東中國網通（906）已表示反對。過去李察李亦曾將SkyTV股權賣畀澳洲報業集團梅鐸。梅鐸千方百計欲打入中國衛星電視市場，至今亦只有長嘆一聲，最近更將鳳凰衛視（8002）部分股權沽之哉。外資如欲利用電盈手上嘅電訊業務及now進軍內地，可能又係另一個「中國夢」。其實，不但內地電視市場難以攻入，內地電訊市場雖然今年年底開放，但欲攻入去亦唔易。

李察李在商言商冇錯

　　我老曹記得，中電（002）亦曾賣部分股權畀中信泰富（267）作為攻入中國電力市場之引領人，最後決定向中信泰富購回中電股份註銷算數。國泰航空（293）亦曾發行新股畀中信泰富，希望協助打入中國航空市場，結果一樣寸步難行，最近透過收購港龍，亦係希望進一步打開內地航空市場。如果只睇香港固網、無線電話市場及有線電視市場已進入過度激烈競爭時代，純商業角度睇，如有人出價吸引，賣出又何妨？今天喺香港最賺錢生意項目仍然係房地產及銀行，唔係
做電訊生意（市場開放便進入惡性競爭），亦唔係做有線電視生意（相信市場已近飽和），如李察李日後集中火力做房地產，在商言商冇錯！只係2000年以高價爭番嚟嘅電訊生意，今天卻要賤價出售。香港法律並冇限制外資擁有香港電訊業務，中國政府亦唔會介入此事。

　　中聯通（762）升2.2％，見六元八角五仙，韓國SK電信將手上三年期可換股債券轉為聯通普通股後，佔聯通6.7％股權。

　　中國石油交易所開始模擬運行，有五十五家交易商將參加交易；中國開始買賣石油期貨矣。

　　恒隆地產（101）宣布，有意投資二百五十億元入內地十個項目，分布六至八個城市，但唔包括上海，樓面一千五百萬方呎。日後集團嚟自內地租金收入將由今年佔總租金收入30％，進一步升至佔一半或以上。香港地產資金繼續流入國內房地產。

　　金價正在尋底（或者喺五百四十二美元已經搵到，但未肯定），將來金價或可見一千美元，但由今天到將來之間卻有唔知幾多個明天，明天金價怎麽樣則木宰羊。

　　股市有如靚女，不但天天新款，加上略帶高傲性格，令男士們紛紛為她着迷，但又猜不透佢心裏諗乜嘢。佢嘅一顰一笑可令男性樂透半天或愁眉不展。至於股市評論員，都係事後講嚟頭頭是道，但事前卻唔會提出警告，佢地永遠喺事後才發現真理。股市有如喺水星，評論員好似生活喺火星，由於大家軌道唔同，所以永遠唔了解對方。股市升降係將投資者嘅情緒放大：佢地往往興高采烈地入市，然後又哀傷地離開，本周股市相信便在日好日淡中度過。今天做長線投資仍太奢侈，做短線投機又太混賬，真係不知如何是好。每次金融危機過後，都破壞咗中產階產嘅財富，卻令富者更富。1997年7月如此、2000年3月係咁，今年5月亦一樣。

　　今天失業率的確好低，但薪金亦同樣地低。至於高薪工作崗位，似乎喺香港消失咗。

　　TIPS債券（Treasury Inflation Protected Securities Bond）已回落，代表未來通脹壓力下降中。十年期TIPS債券孳息率一度由二厘〇五升至二厘五一，今天又跌至一厘九九。可惜聯儲局唔會睇呢D數據，只睇CPI（及核心CPI）呢類數字，真係擔心貝南奇將利率推得太高而傷及中產階級。此乃制度上嘅缺陷，好無奈。希望日後聯儲局官員多D前瞻性、少D睇落後數據，有助改善日後加息╱減息決定。

恒指15200點重建基礎

　　如睇TIPS債券，恒指喺15200點水平開始重建基礎。

　　研究股市幾時反彈，係好浪費時間嘅行為。走勢分析最大缺點係「如果咁、就咁」。有D形態分析好有用，因為係反映群眾情緒，透過猜測群眾反應去預測股價變化。隨着走勢分析普及，群眾情緒再唔似從前咁，令走勢陷阱一再出現。其中比較可靠只餘下上升軌、頭肩頂呢類最基本嘅趨勢線。最高出錯率喺RSI方面，其可信性已漸漸下降（因太多人使用）。例如今年4月股市先急升、5月開始便急挫，而且成交急增，令唔少人措手不及。唔少基金經理只有拋售期指套住既得利潤，
如此一來便加速股市下跌速度。拋售高潮喺6月13日完成，基金經理便將拋空期指平倉，引發上周尾股市反彈。進入今周，相信為6月結做櫥窗粉飾，有D股份繼
續沽售，有D股份增加持有量，形成個別發展，後市喺15200至16000點上落【圖】。換言之，本周開始部分股份已出現抗跌力，亦有部分股份繼續回落。
一般人喺上述環境下都係少做少錯、唔做唔錯，到7月3日再算，到時或有似樣反彈亦唔奇。

　　日本十年期債券孳息率升上一厘八四八，距離七年高點即今年5月15日嘅二厘〇一仲差DD，主因係日本央行行長福井俊彥暗示零利率政策不久將來會取消。估計年底前日圓利率見半厘，即下半年日本有兩次加息機會。日本政府係美元債券最大持有者，共持有六千三百九十二億美元（中國只持有三千二百三十億美元）。日本政府喺2004年8月持有六千九百九十億美元債券，其後曾一度減持，一直冇再增持美元債券。2004年8月至今美元債券利率升幅有限，有賴中國政府長期吸納。今年下半年日本抽緊銀根，代表日本政府喺可見將來都唔會增持美元債券；至於中國，恐怕吸納美元債券嘅胃口亦在下降中。換言之，美國長息恐怕進入上升周期！

　　浮動利率貸款（Adjustable-rate-mortgages,ARMs）唔同固定利率貸款，利率隨時可調整。2003年6月美國三十年期息率六厘五四，ARMs三厘七六，因此買樓者都選用ARMs而唔用固定利率貸款。今年5月三十年期固定利率貸款只係六厘六，較2003年六厘五四微升；但ARMs已見五厘六三。估計未來六個月將有一萬億美元ARMs貸款面對利率高於固定利率貸款，估計唔少美國房屋貸款者將由ARMs轉為固定利率。對未來美國樓市影響會點？

今日寵兒明日棄嬰

　　貝南奇返工已超過四個月，蜜月期早喺今年5月10日結束。通脹率上升、經濟增長率放緩，有大量格蛇留下嘅蘇州屎要清理。貝南奇係通脹目標派，為將CPI升幅局限1至2％，利率要有幾高？佢明白今天一再加息，經濟亦只會放緩增長而唔會衰退，同時可獲得通脹戰士嘅美名（上述由格蛇用十八年半時間建立），冇人會因經濟增長率放緩而怪貝南奇；反之，如通脹率升幅惡化，卻會算喺佢頭上。換言之，貝南奇過度加息嘅誘因好大。6月5日貝南奇演說時話：佢會不
惜一切去壓制通脹率。各位宜小心。今年首五個月美國CPI升幅已達5.2％，核心通脹率升幅3.2％。假設利率升至五厘半或以上，即利率高於核心通脹率二厘或以上，通脹率可漸受控制，但經濟增長便放緩。假設利率只見五厘二五，又擔心未夠力阻止通脹率上升。換言之，8月8日係咪加息？好考功夫。

　　如果你一如我老曹喺股票市場打滾三十八年，便知道今天嘅寵兒隨時成為明天嘅棄嬰呢個道理。有D寵兒可維持好耐（例如數年），有D只維持幾個月。作為分析員，就係喺商品（或股票）未成寵兒前將佢搵出嚟，喺它未成棄嬰前放棄。油價過去六年上升六倍、銅價過去三年上升四倍，都為事先已投資能源股及銅礦股者帶嚟巨大利潤。銅有機會變成棄嬰，至於油價仍在頑強抵抗。2000年3月警察「吹雞」，開始拉「互聯網小販」；走得快好世界，冇走到者就係咁先。今年5月警察又再「吹雞」，呢次所拉嘅對象改為商品股，亦係走得快好世界，唔肯走者已被綁住，無法脫身。誰又係明天嘅寵兒？誰又係明天嘅棄嬰？情況有如釣魚，有人大有收穫，有人一無所得。

　　科技與貿易改變咗全世界。過去人類日出而作、日入而息，所謂循環周期係指春夏秋冬，好有秩序。今天經濟周期複雜好多，同時亦長好多。1980年起工業
周期改變咗珠三角洲嘅面貌、1990年起再改變長三角嘅面貌，原材料需求2000年起又改變咗澳洲、加拿大、俄羅斯及巴西。油價上升曾令七十年代中東面貌
全面改變；八十年代及九十年代油價回落，又令中東國家出現經濟困難；2000年起中東國家又再意氣風發。今年5月起原材料價格回落係咪另一退潮？

中國將減少進口鐵礦石

　　鐵礦石談判中，中方輸咗，決定接受主要生產商必和必拓（BHP）公司所提出嘅價格，較上年度上升19％。睇嚟中方喺談判中仍無法行使話事權。雖然鐵礦
石漲價19％，但鋼價相信升幅唔大，令鋼鐵企業利潤出現大幅下降。加價19％後，中國鋼企須為呢次漲價多付六十億至七十億美元，明年多付一百億元。

　　鐵鋼石每噸漲價19％（約七至八美元），同期運費下降八至十美元，對鋼廠而言成本可以拉平。依家中國鋼廠平均噸鋼利潤只有一百五十元人民幣，未來中國
鋼鐵廠只有繼續薄利多銷。鐵礦石加價19％後，進口價已同中國現貨價基本上一致（現貨價格去年12月至今下降5.35％），估計進口量會減少；今年1月中
國進口二千六百五十八萬噸，5月已降至二千四百五十七萬噸，相信下半年進一步減少。去年鐵礦石漲價71.5％，已令中國鋼鐵業多付三百九十七億元人民幣。
中國嘅問題係：產能過剩、能源緊張。包括鋼鐵業在內已出現明顯過剩，導致整個行業利潤繼續下降。能源價格今年升幅已超過15％，睇嚟中國至今未有妥善方
法。

　　經濟與政治通常手牽手。當政治出問題之時，經濟必然走下坡，反之亦然。1997至2003年到底係經濟影響特區政府抑或政治影響香港經濟？人們心中有數。經濟盛衰50％受外在因素影響，50％係本土因素。1997至2003年香港可以講外在因素同內在因素都不利，類似情況日後應唔會再重演。

　　根據美林證券資料，去年全球擁有一百萬美元以上資金（唔計自住物業）嘅人數八百七十萬人，較1996年四百五十萬人上升近倍。其中升幅最快係中東地區，增加三十萬人。擁有三千萬美元以上者全球人口八萬五千四百人，其中65％有投資新興市場，30％有海外置業。

　　北美洲百萬富翁人數二百九十萬、歐洲二百八十萬、亞洲二百四十萬、拉丁美洲三十萬、非洲十萬。世界過去十年的確富者愈富，至於係咪同時貧者愈貧便木宰羊。

　　SUNDAY（866）、電盈停牌。
　　信用卡防盜（1051）6月22日改名智富能源。
　　■明報企業（685）、萬華媒體（426）6月30日；維他奶（345）7月6日公布業績。

投資者日記曹仁超2006-06-21 另類資金流失

投資者日記曹仁超2006-06-21 另類資金流失

　　6月20日，週二。恆生指數跌159.89，收15608.97；成交二百二十八億元。6月期指低水，跌147點，收15600點。港股正下試15200點支持。

　　江西銅業（358）跌5.6％，見五元九角，因紐約期銅跌4.1％；中海油（883）跌2.56％，見五元七角；中聯通（762）跌2.19％，見六
元七角；恆隆地產（101）跌3.57％，見十三元五角；電盈（008）升8.3％，見五元二角，創2003年11月7日以來最大單日昇幅；中遠太平洋
（1199）升3.24％，見十五元九角五仙。

　　投資者手頭資金充足

　　外圍股市方面，台股重挫3.3％、南韓跌2％、日經跌1.5％，港股只跌1％，仍系跌幅較細嘅地區；MSCI新興市場指數跌1.5％。

　　如商品價格自5月份起真正回落，股市唔似有大跌機會，估計每次低於二百五十天移動平均線5％左右都系入貨機會，最大理由系投資者手上資金仍相當充足。從呢點睇，短期恆指支持點仲系15200點水平。

　　當股市出現高峰，或遲或早跌回低谷（whatgoesupwillfalldown）！但下跌速度如何、形態如何，又往往非我地可以估計。如要從趨勢中獲利，唔好估，只要追隨便可，因此5月沽貨者，6月無事可為。

　　5月份美國房屋建築由十三個月低點回升至年率一百九十五萬七千間（4月份一百八十六萬三千間），新批准減少2.1％，上述消息證明美國經濟仍十分繁榮，估計可令美股出現反彈。週三港股上升，後市展望股市將出現日好日淡。

　　我老曹系黃金長期好友，但二十一世紀同七十年代真系唔同。七十年代通脹（CPI）系推動金價上升嘅元凶，二十一世紀便唔太肯定。今天美國經濟擔心通縮大於通脹（不然2003年6月亦毋須減息至一釐），只系利率減幅太大，引發短暫通脹上升，估計聯邦基金利率重返五釐二五至五釐半之後，通脹率又再慢慢回落，此乃5月份將黃金獲利回吐嘅理由。

　　全球信貸系統突然減速

　　有D數據令人擔心，例如日本5月份N十二個月平均增長率12.4％（4月份12.7％）；英國數字亦幾令人擔心，4月份新債仍升19.4％，5月份突然轉為負45.5％（5月份英國人開始減債！），令金融時報指數由高位回落，礦務股平均跌25％，銀行股跌9.1％，地產股跌17.2％。7月5日起，連
中國亦加入抽緊銀根行動。大摩羅奇去年鋁需求增長率50％嚟自中國，鐵礦石需求增長84％嚟自中國……，一旦中國抽緊銀根，商品價格後市點睇？羅奇認為，中國對原材料需求增長率已過高潮，加上聯儲局為對抗TMT股泡沫爆破而濫發貨幣六年半，今年4月起突然減慢貨幣增長率，5月份便引發全球商品價格下跌潮。

　　PrudentBearFunds嘅DavidTice話，過去六年全球信貸系統正全速進行，雙位數字貨幣增長令經濟欣欣向榮，資金價格升值，包括香港、歐洲、英國、中國、俄羅斯、印度、澳洲、日本、東南亞及南美洲……。當商品價格4月份起出現拋物線上升，突然全球信貸系統都把速度減慢，投資者唔人仰馬翻才怪！整件事都系全球政府嘅財金官員由最初擔心通縮到今天擔心通脹所造成，佢地大量增加信貸後突然叫「停」，問你死未？

　　過去六星期股市表現嚇死唔少投資者，上週尾市出現反彈後，本週跌市又再開始，嗰D冇躲入避難所者又要面對風吹雨打，尤其系新興市場股、金礦股、科技股，冇利用反彈市脫身者又周身蟻。技術上睇，5月8日至6月13日急跌已完成（部分系拋空），上週尾段出現挾淡倉，本週開始進入緩慢下跌期。鐘擺由5月8日開始又向另一方向擺動。

　　金價週一開始又回落，主因系上週五伊朗總統立場轉為緩和，氣氛在好轉中。伊朗同時系全球第四大產油國，如核問題順利解決，有助油價回落。商品中，以油價企得最硬，至今仍喺高價牛皮，二百五十天線支持喺六十三點八四美元【圖】，喺油價未低過六十四美元前，相信聯儲局加息立場唔會停止。美滙指數5月份回升。鎳價由5月26日至今跌幅超過20％，銅價亦出現回落。商品價格系咪進入短期調整，亦視油價去向而定。

　　投資成功必須追隨趨勢（Beingontherightsideofmarket），而唔系收息。股票唔系買嚟收息嘅，而系買嚟賺價，此乃股票同債券最大分別。投資就系找尋趨勢、追隨趨勢，有智慧不如趁勢。我老曹手上財富較一般人多DD，理由系入行問題。我老曹1967年離開學校時，第一份工系到聯業紡織公司做練習生（當年紡織業系香港最大工業），做咗六個月因捱唔住工廠內嘅酷熱（當年工廠仍未有冷氣系統）、噪音（一百二十架織布機同時開動）及輪班制（二十四小時分三班制，早班系女性，午班同晚班系男性），結果1968年轉行做股票（因同學中有一位親戚，買咗個股票經紀牌，要搵個識英文嘅人幫佢，如此這般，我老曹便入咗證券呢一行。假設我老曹今天仍從事紡織業，過去四十年任你點努力，成績仍然有限（因為男怕入錯行）。「三分努力、七分天意」，如果你連三分努力都唔肯付出，便唔好怪個天；反之，如果你付出七分努力仍冇成就，此乃天意，因為謀事在人，成事在天。如果連「東南西北」都分唔清，卻希望喺投資市
場獲利，天下間何來如此便宜嘅事?!例如你搞得清資金流向系乜咩？

　　資金流失未必影響同業拆息

　　資金流向分幾種。

一、由一個國家流向另一國家或地區。1997年亞洲金融風暴，資金由亞洲區流失，造成該區貨幣貶值及利率上升（香港因實施聯滙制度，所以只見利率上升），1997年前許多人都唔識資金流向，今天已成為普通常識。

二、VIX（VolatilityIndex）擴闊及收窄，亦影響資金流向。自從衍生市場發達後，兼且資金成本低廉，大銀行或證券商大量發行窩輪（warrant），通常認購價較普通股股價高10-15％，並同時向客戶發ELN。喺低利率時代，佢地只須付客戶五、六釐息，客戶便肯認購ELN。響一段日子內，如股價不低於認購價，客戶便可賺息；如低於認購價（發行時定價，一般較市價低5％）便要收股票。銀行或大證券商利潤便系嚟自發輪產生嘅溢價（例如10-15％）扣除ELN認購價（低於市價5％）。換言之，無論窩輪系咪行使，銀行都可賺取其中差價（約5-10％）。如市場波幅細、利率低，窩輪及ELN皆容易發行，銀行便需要從市場吸走部分股份作發輪及發ELN之用，形成資金流入股市；反之，一旦VIX上升及利率增加，令發輪及發ELN成本上升，銀行及大證券商便唔易向市場推出窩輪及向客戶推介ELN。隨著窩輪溢價下降，銀行及大證券商便接入窩輪，沽出手上股份，咁叫做unwind行動。此舉對股市而言系另類資金流失，但因為資金冇離開一個地方（或國家），因此唔影響銀行同業拆放，無法響利率市場反映。5月10日開始嘅資金流失，就系因為VIX突然上升引發一連串unwind行動，唔明白衍生市場操作者，一味睇住銀行同業拆息冇升便以為資金冇流失，結果損失慘重！本港冇VIX，因為期權市場唔夠活躍，因此只有參考美國VIX。如投資者對前景有信心，認購及認沽期權溢價低，令VIX低企，一旦對前景冇信心便令認購及認沽期權溢價上升，令VIX上升，因此觀察VIX可知「內部」資金流向，即資金由股市流出或流入。值得小心嘅系，本週一美股VIX又再上升，即unwind行動繼續。請唔好再用1997年資金流向嘅工具（睇利率升降）去分析今年LV（Longvolatility）改變。今天系打世界盃嘅時代，唔再系精工對南華！喺怪責國際大鱷來港搵食之時，香港投資界自己亦應該檢討，點解分析技巧未達國際水平。

　　散戶睇好大戶睇淡

　　技術上睇，沽售壓力仍存在，但已較5月10日前減少。美股標普五百（迷你裝）期指上週二起增加三十三萬二千張睇好合約，代表上週二至上週五入市博反彈
者都系小投資者而非大戶（大戶唔會玩迷你裝期指），今次散戶到底可撐幾耐？木宰羊。反之，大炒家（MerchantTrader）上週增加六萬張新空倉期
指合約（系近十年內最多嘅一週），代表大戶仍睇淡後市。上週散戶睇好、大戶繼續睇淡，雖然散戶唔一定輸、大戶唔一定贏，不過你幫邊便?!

　　PE參考價值一落千丈

　　喺波動市中不應趁低吸納，只應等待大市穩定下來才再作打算。依家唔系表現勇氣嘅日子，請向英女皇學習「donothing」（無所事事），或向畢非德學習「等！等！等！」。別人會告訴你加息冇影響，佢只系告訴你真相嘅一半。例如2004年6月至今年4月加息的確冇影響，5月10日加息後利率已高出核心利率（三個月三釐二、六個月二釐八）二釐，踏入「有」影響期。何況6月29日利率見五釐二五機會已接近100％，到時絕對有影響；8月8日加息機會亦已升至50％。高息令股份O進入回落期，加上今天恆指成分股純利中包括太多物業重估利潤，令O參考價值一落千丈。

　　今天日本銀行宣布唔會延遲取消零利率政策（過去十二個月，日本銀行已從市場減少日本商業銀行15％流動資金）。照依家趨勢睇，呢次抽資行動響秋季之前唔會停止。唔好估，只要等！上述公布令日股進一步大跌。

　　中國國務院發展研究中心金融所所長夏斌（亦系最早要求政府提高法定存款準備金嘅學者之一）估計，呢次商業銀行人民幣存款準備金上升0.5％，至8％，
一次性可凍結流動資金一千五百億元人民幣；加上人行近期兩次向商業銀行發行二千億元票據，即市場流動資金短期內減少三千五百億美元，對第三季度中國經濟肯
定產生不利影響，但唔會產生巨大影響，因商業銀行流動資金仍然充足，只系會減慢信貸上升速度。

　　中國貿易順差反映儲蓄率太高

　　夏斌話如甲、物價仍逐月上漲；乙、投資增長仍快嘅話，下一步調控時機系今年7、8月份之後，中央會否進一步採用其他措施，便睇7、8月份宏觀數據。呢次提升法定準備金率，肯定會推動市場利率上升。

　　摩根大通認為，中國人行繼7月5日將存款準備金上調0.5％後，如7月份經濟報告持續強勁，將有更多貨幣緊縮政策出台。摩根大通中國研究部主管龔方雄話，中國人民銀行最少仍有1％調整幅度去令經濟降溫。

　　分析家指出，中國經濟並非過熱，而系內外失衡。5月份城鎮固定資產投資增速30.3％，系投資結構唔平衡。以國有銀行為核心，金融體系傾向國有控股企業優先融資，形成資本市場扭曲配置。呢點可透過將國有銀行市場化去糾正（中國早已咁做，只系速度唔夠快）。服務業去年只升10％；消費需求只佔中國GDP52％。消費需求不振，因整個社會保障不足，令居民收入唔少被儲蓄起來。呢類預防性儲蓄造成中國高儲蓄率及消費不振，中國必須建立良好社會保障才能
糾正。5月份中國貿易順差一百三十億美元，就系反映中國儲蓄率太高、消費不足外，亦反映人民幣值偏低，造成流動資金過剩，單靠加息未能阻止資金到處流竄，造成樓價上升等不良現象。糾正內外不平衡有賴人民幣有秩序地升值，令中國經濟由過分外向轉為內外平衡，多D服務本土經濟。

　　首創置業（2868）停牌。

　　漢國置業（160）停牌，宣布發行可換股債券。

　　新海能源（342）停牌，簽訂合作協議。

　　■新威國際（058）6月23日；修身堂（8200）、新銀集團（988）26日；新怡環球（1094）28日；開明投資（768）7月3日；進智公共交通（077）12日；東潤拓展（467）17日；北方興業（736）25日公布業績。

投資者日記曹仁超2006-06-20 成交大減開始抖暑

投資者日記曹仁超2006-06-20 成交大減開始抖暑

曹Sir - 投資者日記

　　6月19日，週一。恆生指數跌73.79，收15768.86；成交大幅減少至一百六十四億六千四百萬元。6月期指跌91點，收15747點。人行提升商業銀行儲備金，令建行（939）股價跌2.2％，見三元三角；中國銀行（3988）跌1.5％，見三元三角七點五仙。

投資失敗理由系怕閒

　　今年暑假，無論地產經紀或股票經紀都要抖暑，因為樓市及股市踏入7月相信會好靜。股市惡性拋售6月13日理論上完成，上週完成挾淡倉後，本週冇嘢搞。至於樓市，早喺5月份起已開始靜，因為香港利率已略高於CPI增長率二釐，加上一連串數據公布，人們決定都系睇世界盃舒服D。

　　英女皇喺八十歲生辰時話，任何人都會老，能夠做嘅事系令自己儘量長壽！英女皇嘅吸引力便是無所事事，人地批評佢嘅女兒，佢唔表示意見；人地批評佢嘅兒子，她同樣唔表示意見。畢非德認為，投資失敗理由系怕閒（ShyofLaziness）！佢一生人都在等，等候入貨時刻，等候合適對象出現……。投資唔系打足球，唔使跑嚟跑去，反而應學習英女皇嗰份休閒。幾多人喺股市走出走入，結果得到乜嘢？本週開始，我地開始學習享受休閒。

　　鐵礦石談判方面，可能系中國首次成為價格制定者。全球多家鋼鐵生產商已同意巴西淡水河谷公司加價19％嘅要求，只有中國態度一直強硬，聽講雙方可能達成協議，最後只加價10％。

　　上海銅價今天帶頭下跌，令倫敦3月期銅一度下挫一百六十美元或2.3％，成六千八百二十美元一噸，跌幅大於上海1.6％。理由系人行提高商業銀行存款準備金0.5％，至8％。倫敦銅價自上月創新高後，至今已回落31％。

　　跌市或延續至第四季

　　東方航空（670）客運量連續第十六個月上升，5月達二百八十七萬人次，較去年同期升82％；客座利用率亦升四點一個百分點，至68.4％。國際航空運輸協會估計，2009年之前中國客運市場年均增長率可達9.6％，高於世界平均水平。

　　5月份香港失業率降至4.9％，系近五年新低。今年首季消費較去年同期升4.5％，系一年嚟升幅最大嘅一季。

　　分析界認為，2000年1月14日道指見11750點，有如1966年2月9日道指見995點，系超級大牛市結束。今年5月10日道指見11670點，相等於1971年4月見950.82；其後到1971年4月回落至11月嘅797點，跌幅16.18％；再由1971年11月低點升至1973年1月1051.7新高，之後才再大跌。如1971年道指走勢有參考價值，今年5月10日開始嘅跌市可能一直延長到今年第四季，然後上升，及至2008年年底、09年年初道指創新高後，才再大幅回落。雖然過去歷史唔保證喺將來重演，但1971年道指走勢實在有一定參考價值【圖】。

　　美國樓市感受加息壓力

　　本週trader努力搵出上週股市低點，即恆指6月13日15204點及黃金低點五百四十二美元等，呢個底到底有幾可靠？

　　週二美國公布5月份新屋建造及批准數字，根據ThomsonFirstCall統計，分析員估計5月份新屋建造系年率一百八十六萬間，批准數字系年率
一百九十六萬一千間。經過十六次加息（相信月底出現第十七次），美國房地產終於感受到壓力。根據美國商業部資料，4月未售出房屋高達四個月供應量，另有十二萬八千間新屋在建造中，系歷史上新高。七十一個大城市中，40％單一家庭住宅售價被視為極之偏高。

　　5月份CPI上升0.4％（核心通脹0.3％），令五年、十年、三十年期債券孳息率紛紛高出五釐。股市自5月10日起回落，令金融市場投資者如果唔系變得悲觀就系無心戀戰，經上週末強烈反彈後，跌市繼續。

　　本週四公布5月份領先指數估計回落0.4％（4月份回落0.1％）。美國克利夫蘭聯邦儲備銀行行長SandraPianalto將發言，此乃6月28、29日公開利率協議前最後一位聯儲銀行行長髮言，對股市有一定影響。

　　上週日本銀行宣布維持零利率，令日圓滙價進一步回軟。十五位分析員中，有九位相信7月份日本銀行將加息，49％日本民意認為日本銀行行長福井俊彥應辭職，13％認為唔使。睇嚟日圓滙價喺6月份繼續受壓，新元素系北韓可能試驗飛彈及發展核武（1998年北韓試驗長程導彈飛越日本上空，落喺太平洋，其後只試驗短程導彈。呢次將系第二次試驗長程導彈）。

　　5月當七十六歲老人家都問我老曹應否將10％儲蓄用嚟買金時，我老曹知道金價無可避免將出現大調整。當時柏克萊環球推出白銀ETF，至今已回落26％。ETF至今已有二十多年歷史，令投資者更方便買賣商品。當冇去過印度嘅人都加入投資印度基金行列之時，我老曹知道印度股市亦逃唔出下跌嘅命運。

　　世界盃、惡劣天氣，加上下週暑假開始，相信股市好快靜下來，進入冇方向感期。上週末三個交易天上升，估計只系挾淡倉。喺跌市中唔少人乘機空倉，上週五完成平倉後，本週股市又再回軟。不過，經過上週挾淡倉後，淡友氣燄收斂。後市恆指15200點暫時有得守，估計好淡雙方喺呢個水平出現爭持機會好大。

　　印度股市雖然已回落，但德銀亞洲、美林亞太區、摩根大通、野村仍認為偏高，即使回落25％仍唔夠（印度股市由5月10日至今回落22％），目前O十五點二倍（5月10日O二十點五倍），相較MSCI新興指數O只有十二點二倍，印度股市仍然太貴。5月11日至今海外投資者淨拋售二十四億美元股票（即拋售大於買入），今年1至4月淨買入五十億美元股票。野村證券策略員SeanDarby認為，印度股市7000點才合理，即較上週五仍可跌多29％。怡富資產管理公司持相反睇法，GraceTam認為，印度長線增長十分好，並認為已可吸納。霸菱資產管理HayesMiller亦認為，印度股市開始尋底。

　　國企、紅籌股面對人行7月5日起增加商業銀行存款儲備比率至8％（2004年4月以嚟首次），估計可吸收唔少過剩資金，代表銀根抽緊。今年首五個月內地房地產投資仍升21.8％（首四個月升21.3％），5月份房地產投資不但冇減少反而上升。

　　內地游資過剩皆因人民幣偏低

　　人行4月增加貸款利率零點二七釐，似乎未能限制貸款增長；5月政府一連串稅務措施增加房地產交易成本亦失效。至於7月5日抽緊銀根後又如何？睇嚇點！歸根到底，問題喺人民幣滙價偏低引發國際游資湧入，造成銀行流動資金過剩，信貸膨脹。

　　由1842年南京條約將香港割讓畀英國開始，中國成為西方列強眼中嘅肥肉，要瓜分而後快；加上滿清政府無能，過去百多年中國人受盡西方侮辱。建立新中國已成為大部分有識之士嘅共同願望；第一次有組織對抗系洪秀全搞嘅太平天國，利用宗教力量威脅滿清政府政權，可惜洪秀全等人未成事已爭權；加上滿清政府獲西方國家財力及武器上支持，好快將太平天國平定了。不過，滿清政府依然唔長進，更任由西方列強喺中國予取予攜；最後喺孫中山領導下推翻滿清政府，除之而來卻系軍閥割據，到後來日本入侵，國民政府未企穩便要先應付大軍閥，然後領導國民八年抗戰。國民政府未上軌道先腐敗，最後由毛澤東領導下嘅中國共產黨將蔣介石領導下喺國民黨趕去台灣。1949年新中國成立，並以蘇聯為藍本，建立社會主義制度下嘅中國，強調「自力更生」。可惜毛澤東喜歡唔按經濟規率辦事，六十年代更發動文化大革命，將本來已經十分脆弱嘅中國經濟，進一步搞到一窮二白。

　　由1842年起至1976年呢一百三十四年，作為中國人真系好苦。由西方列強瓜分中國，到太平天國、八國聯軍入侵、大軍閥割據，到八年抗戰、國共之爭、文化大革命，中國人喺外國人面前真系抬唔起頭來！七十年代初期我老曹首次到華爾街「朝聖」，美國人叫我「Japs!」 （Japanese），佢地認為穿西裝住得起高級酒店嘅亞洲人一定系日本人。當年我老曹感覺真系想喊！

　　全球商品跌價利好中國

　　1978年鄧小平提出改革開放政策，最先系「三來一補」，深圳成為香港輕工業加工基地；到2003年中國加入WTO成為世貿成員。不足三十年光景，中國經濟迅速由農業社會轉型為工業社會。依家中國農民雖然仍佔總人口50％，但以中國人口咁多，上述改變亦算驚人成就。要迅速工業化，產品必須有市場，唔似西方國家過去以軍事力量佔據市場及原材料來源，中國只有利用價廉物美去開拓市場。所謂和平崛起，主要仍系OEM（代加工）喺國際市場上賺取微薄加工費。工
業化亦需要原材料，初期中國本土仍可供應，隨著需求一再上升，便只有依賴入口。2001年開始引發全球原材料漲價，今天中國三分一原油依賴入口、過半鐵礦石依賴入口；四十五種原材料中，只有九種可以自給自足。去年中國喺全球工業原材料用量增長中所佔比重令人矚目：鋁佔全球增長率50％、鐵礦石佔84％、鋼材佔108％、水泥佔115％、鋅佔120％、銅佔307％、鎳308％，呢D趨勢可持續落去咩？上述情況七十年代曾喺日本出現，日本響石油危機後決定走
向高科技，唔再依賴OEM，發展自己品牌，並以高新科技作為日本產品競爭力嘅後盾。今年中國「十一．五」規劃亦指明中國欲走呢條路線，只系由OEM業務走向高新科技，仍有一大段痛苦日子，亞洲四小龍中亦只有南韓成功。至於香港嘅科技園、數碼港、工業園……到底為香港帶來乜嘢科技？

　　5月10日開始全球商品價格急跌，對中國經濟而言系一個好消息。中國喺重新平衡經濟增長與發展方面，雖然強調向消費傾斜，但趨勢仍唔明顯。擔心GDP增長率放緩速度太快，迫使中國領導層延長其投資及出口為導向嘅增長戰略，形成依家拉鋸局面。中國去年不但成為全球最大銅、鎳及鋅耗用國，而且增長率極之驚人。中國政府明白上述升幅唔可能長期維持，點樣喺經濟轉型中保持高增長（例如年率7.5％）並唔容易。今年首季中國GDP升10.3％，令唔少基本金屬價
格出現近乎拋物線嘅增長，代表投機者並唔相信中國可平衡經濟。新五年計劃未見真正落實，點樣令經濟同時出現此消（高耗能粗放型加工產品放緩）彼長（零售、貿易、批發、國內運輸、物流等行業增長），而令GDP未來五年保持7.5％年率上升？喺日本、南韓等，轉型過程中亦曾出現青黃不接期。中國喺原材料需求增長今年首季相信已達最高峰，第二季開始進入增長放緩期，未來幾年更顯著下降至低增長！只有咁樣才能緩解工業原材料市場目前所承受嘅價格壓力。

　　中國經濟增長今年不但面對能源及商品價格大升嘅影響，同時亦面對環境約束。過去二十八年有三億農民轉到城市安家就業，令城市人口上升一倍，為城市提供大量廉價勞動力嘅同時，亦令城市面對環境壓力，如未來增長模式不變，2015年中國要消耗三十一億噸煤，石油進口依存度達65％。中國根本上無法向其他國家進口足夠能源及原材料，而本身環境污染亦成為大問題，燒煤所造成嘅酸雨2003年令中國經濟損失達一千一百億元人民幣，90％河流受污染、75％湖泊出
現負營養化。酸雨已影響全國三分一種植面積，全國大城市60％空氣未及二級標準；全球十大污染城市，中國佔六個！依家中國須每年投放二千六百億元人民幣
（相當GDP1％）去控制污染，但情況未見改善。

　　泰國金融風暴後否極泰來

　　中國走日本之路已無選擇權。日本自1978年起全國耗油量開始下降，至今日本耗油量仍低於1978年，令油價由1980年四十五美元一桶降至一度低於十美元！以一美元GDP計，美國耗油量系日本一倍，中國系日本八倍，即美國同中國節約用油方面仍有很大餘地。非不能也，實不為也！

　　天津市濱海新區被國家批准為改革試點區，發展高新科技，令中國加工業為主嘅模式轉型到高新科技；浦東則協助長三角由加工產業走向金融服務業，以迎接2008年中國金融開放時代來臨。中國經濟會否轉型成功？過程系咪順利？會否出現青黃不接期？中國政府正努力推動轉型，我地嘅投資邏輯思維應否隨著「十一．五」規劃而改變?!

　　1997年亞洲金融風暴後，被擱置嘅曼谷建築物近年已紛紛建為酒店或寫字樓。上週五星級、五百四十三個房間嘅希爾頓酒店開幕（上述項目早喺十年前動工興建，因亞洲金融風暴而停建，今天終於落成。新業主系新加坡郭氏家族，過去兩年郭氏家族動用二億美元購入泰國四個項目，上述是其中一個）。郭氏另一項目系四十二層高嘅ExchangeTower，當年已建成90％才放棄，今年6月可完成。

　　其他有WorldTradeCenter，響2002年12月由泰國最大嘅商場建築商以二億三千四百萬美元購入及改建。

　　1997年亞洲金融風暴令泰國股市回落55％，泰銖滙價大幅下滑，1998年泰國GDP萎縮10.5％。泰國股市1998年9月起回升，至今上升三倍；泰銖1998年1月起回升，至今上升45％。雖然2000年再一次回落，2003年又復甦。去年泰國吸引一千二百萬遊客，估計今年再升36％。

　　潮起潮落1997年至今泰國一如香港，不知幾多人喺1997年後變得一無所有，但同時為另一批冒險家提供機會！浪淘沙，不知淘盡多少英雄好漢，又有多少人能以平靜心情，笑看朗日清風。

　　■民生國際（938）、江山控股（295）、林麥集團（915）6月28日；中港照相（1123）、嘉利國際（1050）、葉氏化工集團（408）29日公布業績。

曹仁超2006-05-12投資者日記 丁蟹劇集可賣埠中東

曹仁超2006-05-12投資者日記 丁蟹劇集可賣埠中東! G! [( ~4 g- N( i& H+ H6 D1 k

$ R6 b, x% o! B) U　　5月11日，周四。恒生指數升60.19，收17140.78；成交四百四十七億九千多萬元。期指升132點，收17074點，低水情況收窄。* t' `/ J. i- j2 v4 d% A% m. Z

% x, a! c% V3 r( m5 p- S- z中國大手吸納天然資源
. @" y! y7 g3 m& S, Q* h. y# m i+ p6 S) z; a
　　能源股同天然資源股繼續炒上，江西銅業（358）喺銅價升穿八千美元大關（最高見八千二百四十一美元一噸）後，再升三角，見九元四角；鋁價亦升上十八 年內最高，睇嚟金屬價格仍在狂升。中國國土資源部表示，為滿足需求增長和預防供應中斷，中國將建立包括鈾、銅、鋁在內嘅礦石戰略儲備，並加緊勘探國內礦產 資源，到2010年將增加鐵礦石儲備五十億噸。近期金屬及貴金屬價格紛紛創新高，相信同中國大手吸納有關，例如銅價今年已升83％，估計最少有一千一百億 美元對沖基金响期貨市場搵食。中國和平崛起，計劃用出口賺得嘅美元搜購資源，由鈾、銅、鋁、鐵、石油到黃金，令天然資源供應國如澳洲、巴西、智利、加拿 大、贊比亞、南非等國家經濟亦欣欣向榮。
$ U* G1 n7 i7 g" J+ t; k$ O3 q; u u+ R& W; u- Z- x, D" z( \- F; @
　　1999年曾預測天然資源進入牛市嘅Jim Rogers認為，呢次天然資源牛市中，金價可見一千美元，即天然資源牛市仍有一段日子走。另一方面，投資者亦準備接受大起大落嘅日子。中國已超過日本， 成為全球第二大石油消耗國及第一大銅、鐵及水泥消耗國；今天中國鋼鐵消耗量超過美國、日本同歐洲加起來！中國地大人多但物不博，差唔多所有資源都要入口； 加上1980年開始天然資源經歷二十年熊市，資金已好少响呢方面投資，面對中國強大需求，形成天然資源股重新出現牛市。另一方面，經過七年上升後，今年便 比較難分析，因為高價刺激下，資金重新投資礦產勘探，新供應來源將陸續出現。Jim Rogers係量子基金創辦人之一，其後同索羅斯分手，成立自己嘅基金Rogers International Index Fund，專投資天然資源，再次證明佢眼光獨到。
6 i; `8 [8 g6 o% ?
2 g% ]3 n1 s3 _" ]' Z9 L　　中國銀行上市，計劃出售二十二億六千萬美元股份畀十二家企業投資者，作為呢次上市集資七百六十七億港元嘅一部分（包括香港地產富豪），下周公開招股。
% q; Q) `# J. @2 D2 q! u- i! L' p. M. F, O5 h T
　　聯儲局加息四分一厘後，問題係6月29日會否出現第十七次加息？九十一位分析員中，40％認為會，認為8月8日才加息四分一厘者佔85％。依家美元利 率已係OECD國家中最高，但失業率4.7％加上首季GDP增長4.8％，理論上仍有加息需要，尤其市場認為貝南奇表現太軟弱（4月27日國會聽證會後， 美元回落3％）。十年期債券孳息率已較美國核心通脹率高二厘七，理論上應該有力阻止美國通脹率進一步上升。短期展望：可變因素太多，冇清晰方向。
, J S0 p, E' g X; F6 A, L/ J: R1 L. a6 G- O. \$ |1 p
美元或藉加息反彈5 n7 r; h5 ~* U" h) G4 N: i* r4 h; m

, _* c: w1 T4 m3 _　　美元滙價無論強弱，對短期股市方向 影響唔大。如2003、04年美元弱勢股市上升；去年美元強勢，股市亦上升；到今年至今美元弱勢，股市照舊上升。另一方面，美元由去年11月起回落至今， 已極度超賣，跌幅係2004年12月至去年11月升幅嘅61.8％，理論上一次反彈快出現，會否利用呢次加息四分一厘去製造另一次反彈？換言之，現水平唔 好再拋空美元去揸外幣了。美元弱勢有利內地工業股，起碼較其他國家出口有利。

　　呢次黃金升幅不但跑贏股市、跑贏油價，甚至跑贏銀價！證明There is no fever like gold fever！現水平計金價係唔係貴？答案係非也，但技術上如此超買，一旦調整來臨，幅度可以好大，但冇人事前知道喺邊個水平調整才開始。有智慧不如趁勢， 一旦趨勢形成便有如海嘯，任何人阻住佢去路都被佢沖走。因此我老曹告戒各位：黃金可獲利回吐（最多賺少D），但千祈唔好學人拋空！
* A& C- R c/ M& n' }6 W
* l* ]- p% K9 q/ H3 W　　美元通常係good- time girl，正如有些女性喺你好環境時常常陪伴你左右、討你歡心。黃金卻係共患難嘅夫妻，例如1975年越南失陷，若你持有黃金便可離開西貢（今天胡志明 市）。中國人嫁女之時必有黃金做嫁粧，作用係「以備不時之需」。我老曹投資組合中永遠有5－15％黃金，理由亦在此，因為股票可變廢紙，物業可變負資產， 只有黃金一如共患難嘅夫妻，永遠喺你最需要嘅時刻仲喺你左右。今天美元已變成隔夜麵包（幾惡啃！）黃金再受歡迎，唔通真係患難見真情？金價已衝上雲霄，見 七百二十二美元。
5 Q2 E. a) B3 W$ v5 b' c2 _5 b& t# S0 S7 r5 h2 H
　　我老曹感覺近期股市搵食十分困難。至於喺衍生工具市場搵食便更困難，因為「買入後持有」已唔管用，而trading一向係散戶弱項。全球八千多個對沖基金到處搵賺錢機會，一般人又點係佢地對手？理由係佢地用嘅係OPM（別人嘅錢），輸贏冇感情。投資大忌就係感情用事。3 Y3 c. b0 V f8 \
( c1 `, d9 a" _0 Z7 d4 a
　　1932年羅斯福總統以「強政勵治」作為競選口號而獲壓倒性選票上台。上台後第一招係美元兌黃金貶值；第二招將黃金收歸國有；第三招採用英國經濟學家 凱恩斯理論，實行赤字預算案。隨着第二次世界大戰勝利，美國對付經濟衰退嘅方法全球各國政府亦採用，尤其貨幣貶值呢招。1989年六四事件後，中國經濟急 速降溫，亦利用人民幣貶值令經濟復甦。1994年日本亦將日圓滙價由八十兌一美元重新貶值，去刺激經濟增長。2001年美國亦利用美元又再貶值去刺激經濟 增長，後遺症係貨幣長遠而言購買力不斷下降。今天全球經濟往往出現過熱，甚至出現泡沫，泡沫一旦爆破便引發經濟衰退，政府又將貨幣貶值至某一水平，再次刺 激經濟復甦，引發另一個泡沫。以香港為例，1997年係樓市泡沫，2000年係科網股泡沫，今天係天然資源股泡沫，投資者便喺泡沫與衰退間找尋機會。5 z" k$ I9 Y% G0 A# A
3 S, p1 i# a; M/ M
　　現今道指已漸接近2000年1月14日高點11732點，到底係反彈市最後嘅上升抑或破新高後再升？技術分析只能用於解釋過去，卻不能預測未來。當然 分析過去有助了解將來，如你一如我老曹學習走勢已三十多年，便知道走勢經常時準時唔準，最弊係通常你信嗰一次便唔準，唔信嗰一次便準！2000至06年道 指係咪1966至73年股市翻版（指數創新高後才大跌）？冇人事先知道。2002年10月道指上升至今，已極之接近2000年1月14日嘅11750點高 點，同期標普五百指數只見1322點，較2000年3月24日高點1552點差14.8％；納指見1108點，較2000年3月10日高點5132點差距 達78.4％。代表呢次升市集中喺大企業股，技術上睇只係大後抽，情況有如2000年3月恒生指數見18000點，雖然較1997年8月16500點高出 10％，但升市集中喺少數股份身上，隨之而來係另一輪大跌市。
* | {) F6 q# Y
2 J7 Z* Y& f* X9 }7 P2 D( u油元支持不了太高的股市7 Z o5 H8 _5 T y

# d# A& m2 D& J0 Z3 P! a; b: k　 　中東各國股市已進入大熊市。杜拜指數由去年11月9日1267.32，跌至5月10日478.81，跌幅62.28％；沙地阿拉伯股市由今年2月25日 20634點，到5月11日見9650點，跌幅53.3％【圖一、二】，無線電視播緊藝人夏雨嘅「中東之行」，向港人炫耀杜拜人幾有蚊年，但相信今天唔少 杜拜人已做咗股蟹，丁蟹嗰套《大時代》可賣埠中東！嚟自出售石油嘅資金，亦支持不了太高嘅股市。1973年香港大熊市事件喺中東重演（杜拜股市喺六個月內 下跌62％，沙地阿拉伯股市喺兩個半月內失去53％市值）。同期金價、銅價、鋅價卻急升。資金已喺中東股市飽食遠颺，去咗金屬商品市場炒賣。一個泡沫已爆 破，另一個泡沫在形成中。9 a5 `, q, z% {# {% z

8 h1 K* [7 [) a- t; I　　1983年10月香港實行聯 滙制度；加上1985年4月起聯合聲明限制港府每年賣地五十公頃政策，令香港樓價由1984年每呎六百元升至1997年8月一萬二千元，然後爆煲。 1994年1月人民幣同美元掛鈎，一美元兌八點七元人民幣，今後許升不許跌，至今升至八元兌一美元。內地房地產亦十分熱但同香港1984至97年比仍唔算 得乜嘢。以上海樓價計，1998年淮海中路最便宜之時，亦要七百元人民幣一呎，今天約四千元一呎，上升五倍，主因係內地土地供應仍充足。去年上海樓價下 調，今年起又再上升，估計高潮喺2008年北京奧運。1 D. Y, U1 K: t3 U1 d9 {: T" F

# r) l2 x4 d& f1 `- r0 p　　去年中央對過 熱城市地產進行宏調，上海樓價應聲回落。中央希望殺雞儆猴，但猴子唔受嚇，仍然跳上跳落，炒樓資金離開上海，又到各大城市去炒，今年再回流上海，令一度冷 卻嘅上海樓市又再活躍起嚟，你說怎麽辦？以居民收入計，內地房價已脫節，但喺炒賣人民幣升值大前提下，資金繼續湧入中國，阻都阻唔住。中央已陷入困局，如 第二次調控出台市場冇反應又點？外傳新調整係將首期提高到樓價四成至五成，到時效果將如何？! x, ~& R& G- C' l. S7 h

4 e) Q) D( l! C6 u; q　　美國冇指控中國操控人民幣，並同意世界銀行建議，由中國本身決定人民幣滙價，嗰D炒人民幣升值者又一次失望，過去嘅些微升幅，甚至唔及美元同人民幣嘅利率差。
7 ~/ F( D' A6 n, ~: n1 V g7 z9 g3 r1 @% M3 z3 h( s3 ^
　　中國GDP上升愈來愈依賴固定資產投資；反之，生產成本上升令製造業已開始向印度、斯里蘭卡、越南、柬埔寨等低成本國家移動。中國「一孩政策」令中國 年輕勞工供應高潮過去。中國雖有人口十三億，但少於二十歲嘅年輕小伙子唔夠四億，佔人口總數30％；印度人口十億，少於二十歲嘅年輕小伙子卻有四億五千 萬，佔人口總數45％。中國2038年便進入人口迅速老化期，但印度冇上述問題。今天喺美國嘅中國留學生共六萬二千多個，但印度卻有八萬個。中國過去經濟 成就有賴外資投入，情況有如九十年代東南亞國家，財富大部分喺外資（或港、澳、台胞）手中，內地人大部分只係賺取工資，一旦外資抽走資金，影響會好大。印 度卻係本土經濟，企業都係印度人自己擁有，因此印度股市十分興旺；而中國股票要到香港上市才多人炒，內地股市2001年已爆煲。7 Y4 \) _( v6 p( g

1 K9 P# f, P% K, \% |+ r9 x B中國低工資工業轉向印度
& N" T) J9 S5 F' k* v. T# ~# T( ?
# g* @5 X0 S9 a- E7 F, E9 h　　金價已升穿七百 美元一盎斯，但同七十年代唔同，當年新興工業國只有日本同德國，生產力不足應付全球需要，原材料價格上升壓力迅速轉嫁到產品身上，形成全球CPI急升。今 天中國同印度仍有龐大廉價勞工資源，原材料價格上升大部分由廠家承擔，產品加幅極之有限，因此全球CPI升幅仍然唔大，唔使過分推高利率，估計美元利率止 於五厘二五或五厘半，美國CPI升幅喺3.5％左右。中國改革開放政策始於1978年較印度經濟改革早十四年，今天中國人均收入一千六百美元，兩倍於印度 五百美元，形成低工資工業由中國向印度轉移。. e. g0 [% B0 l8 S+ l

; r/ a2 G0 U1 T e& e+ `4 m　　另一方 面，中國為減少人民幣升值壓力，去年宣布減少出口退稅及減少入口稅一半至6％，大家漸見到中國今年起出口增長率放緩及入口增長率上升，即中國外貿盈餘唔再 大幅擴大，形成資金喺製造業上投資漸減，進一步湧向中國房地產！如政府唔採取合適措施，擔心將重演香港Boom & Bust式經濟，一如內地A股喺2001年炒爆嘅情況一樣！& `& d" n% M$ f* v' q

! T9 h! v/ p& C　　旭日環球（353）停牌，宣布發可換股債券。
1 D2 {0 E$ g, A2 U. ~" i' r( D# n- n8 ]7 @+ a) H6 Z9 f
　　友力投資（674）停牌。
0 \2 w+ Y" N, Q" j( d, E) b3 J. h/ [9 r* w9 X! R
　　變靚D（8079）停牌，宣布配售新股。
5 J1 h1 l' Y9 ^; L
. \% ^! |5 b0 m- b4 k* y& @! }　　奧瑪仕（959）停牌，宣布發行新股。6 W5 p6 t9 U6 p

+ y9 f% g# N L& S　　華智控股（8065）改名中國海景。5 H1 \' h( }" D2 }
$ s: Y0 x5 ^% P1 h
　　中訊軟件（299）一股拆為四股。( ~2 @5 r( X+ Y% w( z% S8 [7 F

/ |0 W$ k @$ ^6 W0 `! |2 Y　　■中遠威生物製藥（8019）5月15日；ROJAM（8075）26日公布業績。