曹仁超 投資者日記 2006-06-30 恒指更能代表股市升降

曹仁超 投資者日記 2006-06-30 恒指更能代表股市升降

6月29日，週四。恒生指數升122.56，收15865.22；成交二百七十八億九千四百多萬元。6月期指結算，收15881點，升126點；7月期指收15905點，升116點。股市從6月13日極度失望中漸漸回升，最惡劣日子系咪已成過去？

　　9月恒指改革，將加入H股。響咁嘅情況下，將削弱恒指成分股所佔比重，類似盈富基金（2800）等投資基金須減持恒指成分股，而增持部分新納入嘅H股，其中最有可能成為恒指成分股者有安徽海螺水泥（914）、馬鋼（323）等。依家上市H股有八十四隻，部分納入恒指後，可令恒指更能代表股市升降。最受影響系滙控（005），喺金融股中佔比重達57.6％，日後可能降至37.9％；最大可能系加入建行（939），去年10月上市至今已較招股價升47％。更多內地銀行股來港上市，即恒生金融分類指數將會不斷納入新銀行股作為成分股，造成滙控未來所佔比重一降再降。另一隻系中移動（941），依家所佔比重亦大，日後亦將下降。未來恒指將反映中國經濟而非香港經濟，一如日經平均指數反映日本經濟而非東京，道指反映美國經濟而非紐約。7、8月股市表現部分受恒指改動成分股影響。

技術超賣開始糾正

　　6月13日股市技術上出現嚴重超賣，依家情況已漸漸糾正。熊市殘忍之處，系不但喺熊掌之下好友損失慘重，同時亦將沒耐性者趕出去並加以懲罰，包括過去利用跌市拋空者，因為熊嘅責任就系令大家唔見蚊年！5月份懲罰完好友後，6月14日起懲罰拋空者。至於未來大方向？相信下周會清楚呢次到底系熊市中反彈抑或整固後再升。呢次喺極度超賣下反彈，一般無法重返五十天線之上，即16200點死線無法再見；反之如第二次跌穿二百五十天線便得小心，代表鐘擺又擺向另一邊【圖】。如無意外，反彈市本周完成，擔心7月3日重演5月10日嘅事件，即加息後引發一輪拋售潮。Unwind行動仍未結束，只因6月13日股價偏低而一度暫停。2月10日至6月12日日本銀行共抽走一千八百六十七億八千萬美元，平均滙價115.432日圓，6月14日起擔心日經平均指數跌幅太大，近期已放回七萬五千億日圓入金融體系內。7月份起日本銀行又再抽資。

　　每天超過一百萬人研究股市方向，但沒人肯定知道明天或下周股市會點樣，反而中長線方向較易掌握。例如2002年10月開始嘅美股反彈今年5月結束。現今股價相信已反映6月29日加息四分一厘，但有沒反映進一步加息？愈嚟愈多人相信聯儲局將利率推上五厘七五甚至六厘，7月19及20日貝南奇將出席銀行委員會聽證會發表言論，對後市有一定影響。貝南奇2月1日上任後表現得優柔寡斷，引發2月至5月金價上升及天然原材料價格上升；5月10日突然表現強硬，令金價及天然原材料價格回落。至於6月29日表現如何？本文見報日大家已知道。作為教授可以隨和D，但做官必須有官威……。貝南奇2月至5月嘅表現，令美元滙價回落6％，通脹預期增加三十基點（從TIPS反映）；佢最大破壞系喺4月27日響國會嘅表現，以及其後對CNBC女記者講外界誤會咗佢嘅意思。好彩5月份起聯儲局其他成員紛紛出面而且態度強硬，才撐回美元滙價，6月5日喺國際金融會議上則表現不俗，但喺6月15日芝加哥經濟學會表現仍失分；睇落貝南奇仲未習慣做聯儲局主席。做教授系講理論，做聯儲局主席系講市場成效；書生論政頭頭是道，書生執政卻一塌糊塗。
如果佢要對抗通脹，將它壓至目標通脹率（1％至2％），就去做吧！如果擔心影響樓市，請唔好講通脹目標啦！金融市場系講實力唔系講道理嘅地方，小心走上1976至79年前聯儲局主席米路士之路（最後人人當佢沒到，令美元國際地位一落千丈）。金融市場缺乏耐性，如六個月內貝南奇都沒料到就系咁先。如佢欲洗刷2002年摣直升機擲銀紙嘅形象，擔心呢次加息潮將過猶不及。

輸錢千萬別趕注

　　你今年賺唔到蚊年咩？唔好難過，今年好多人陪你。今年相信系2003年以嚟最難賺錢嘅一年，唔少人今年利潤早喺5月8日至6月13日跌市中失去。作為炒家，最討厭沒嘢做，股價波動而自己沒貨的確幾沒癮，此乃6月13日至今股市不斷波動嘅理由，目的只系消耗各位手上嘅購買力。如果你覺得悶，最好同你另一半去旅行，例如坐火車去西藏（7月1日通車），而唔系喺金融市場手多多。炒上炒落，遲早撞板。週五香港才知聯儲局嘅決定，站喺風險回報率睇，現水準港股仲系博唔過！捕捉上落市有如同影子玩捉迷藏，輸家永遠系你自己。如果你沒sell in
May，你可能憎個市累你輸錢，甚至憎走勢（太多買入、賣出訊號），但千萬唔好趕注。賭仔輸大錢嘅理由系趕注，將好錢擲落壞咗嘅投資專案上希望打和。一旦輸錢，最好離場（唔怕磨爛蓆，只怕塘邊鶴）。蝕本唯一應對策略系計數離場，第日再玩過。

　　世界不停在變，1987年股災好似系昨天嘅事，原來轉眼就快二十年。1997年好似過咗沒耐，原來已經九年啦。樓價喺1997年後首六年回落65％，最近三年又上升65％，但仍然唔少人要蝕本（由一萬元一呎跌65％見三千五百元，上升65％後亦只有五千三百元）。香港勞工薪金自從1980年起漸漸失去議價能力，因為工廠內移，令一百一十萬製造業工人須重新就業；加上每年嚟自中國三萬六千多新移民加入競爭。1997年起香港中層打工仔亦漸漸失去議價能力，因為服務業後勤基地內移，估計最少一百萬中級職員須重新搵工。通縮往往由工資及薪金停滯不前（或回落）引發，因為產品及服務愈嚟愈難搵買家。勞工階級薪金不前，只令香港廉價產品無法加價，但中級職員再就業困難，才系香港1997年起樓價回落嘅元兇（唔系八萬五政策）。分析未來樓價，主要睇未來中級職員就業機會，便可大概知道。

　　投資首重方向，如方向錯誤，一切都枉然。其次系唔信市場貼士，只有酒樓服務員或的士司機才要人畀貼士，市場貼士十之八九系流言（真嘅消息別人唔會話你知，講你聽嘅通常系假消息）。最好唔好感情用事，投資需要理性而非感性，恐慌時沽出者，事後都證明系做錯；每次受貪念支配入市，事後亦付出代價。　　1997年8月後，行業盛衰較大市方向更重要。我老曹擔心商品喺5月11日見頂回落，黃金見七百三十美元後有排搞。每一代人都有難忘嘅惡夢，影響整個人嘅邏輯思維。例如經歷過文化大革命嘅一代，喺1982年聽到中國政府宣佈收回1997年7月1日主權，引起莫名其妙嘅恐慌；或睇過1967至97年樓價由幾十元一呎漲至過萬元一呎，即使經過六年樓價回落期，只要有錢仍會去買樓一樣。睇過1980至2001年黃金變爛銅者，亦系打死佢都唔會再去買金。每個人都有自己嘅惡夢，系無法解釋嘅結。

黃金低潮應在7月

　　2001年起嘅通脹，唔系需求超過供應推動（中國、印度、東歐及前蘇聯重返世界經濟體系，令全球物資供過於求），而系中國過分投資固定資產，刺激天然原材料價格上升。其後對沖基金加入，將原材料價格升幅進一步誇大，其中包括泡沫成分在內。今年「十一．五」規劃下，中國決定改變經濟增長模式，只系一時未見效。今年5月系咪改變嘅開始？如果全球經濟自由化（而非1945年戰後有一半國家採用社會主義及共產主義式制度），即重返三十年代、四十年代環境，所有物資長遠而言系供過於求。更何況利率回落期引發嘅金融資產升值潮由1980年開始，2003年結束。1990年開始日本一再出現通縮，1997年8月起香港亦出現過通縮，貝南奇卻要對付通脹，系咪唐吉阿德嘅風車？如果利率再加多二、三次，恐怕殺死嘅唔系通脹，而系全球經濟繁榮。商品派對5月10日到底系中途歇歇抑或系尾站？仍搞唔清楚。最難分辨系中期調整與死貓反彈，往往要事後才睇得清楚。扣除通脹，1999至2001年商品價格系近二百年最低，今年5月
商品價格（扣除通脹）相等於1974年12月高價時嘅三分一價格，情況有如1982至87年股市上升後，1987年10月股災曾令股市失去40％市值（恒生指數跌幅更超過50％），但股災之後牛市繼續。金價由二十六年高位七百三十美元回落到五百四十二美元，系咪相等於1987年10月股災？真系唔知道真正答案。由去年5月31日四百一十三點八美元，升至今年5月12日七百三十點四美元，如調整61.8％，應下跌一百九十五點六美元，理論上可見五百三十四點八美元。呢次金價見五百四十二美元，算唔算已完成調整？技術上睇，黃金低潮應喺7月，即下月才系決定性嘅日子。

　　UBS、雷曼兄弟、美國銀行分析員不但相信8月8日再加息，而且相信今年內仲會加息！咁不但會令今年下半年GDP增長率放緩，亦將令明年增長率進一步放緩，但又不致引發衰退。如果未來利率唔系止於五厘半，而系五厘七五甚至六厘，明年經濟放緩嘅程度的確有D令人擔心。喺波士頓市哈佛大學附近嘅住宅，已由年初售價三十二萬九千美元回落到二十九萬九千美元，仲未賣出，此乃1999年以嚟首次。美國二手樓價不但停止上升，而且正在回落，5月份美國二手樓交易只達年率六百六十七萬間，而利率仍在上升中。

壓制中國不如投資中國

　　美國新任財長保爾森認為，對中國施壓應轉向要求金融系統開放，而非人民幣升值。1900年歐洲到處都講美國威脅論。英國諗到嘅方法最好，唔系遏制美國崛起，而系到美國大量投資（If you can’t beat them, join them！）。

　　二十一世紀中國將和平崛起，限制中國嘅策略已沒用，點解唔到中國投資?!

　　咁做不但符合美國利益，同時亦符合中國利益。站喺中國立場，引入外資會否危及國民經濟利益？滿清政府時代外資進入中國，賺走中國人嘅白銀，引發通縮，令滿清政府走向滅亡。1900年歐洲資金進入美國，卻令美國日益強大。換言之，引入外資應同時引入技術、管理等，令自己強大，不然中國經濟最終將被外資控制。今天中國引入外資，唔系喺船堅炮利之下嘅協定，而系兩國對等下嘅貿易關係，應該系良性而非惡性。中國應歡迎外資進入，協助內地銀行改革，然後嚟香港上市，吸收更大資金，進一步做大做強中國金融業，而非滿清政府時代中國企業被外資吞掉。

　　美國、歐洲、澳洲、加拿大及其他國家都在加息，連日本亦可能喺7月份加息，人民幣可以唔加息咩？為咗對抗資金流入，人民幣實際利率已接近零（如非產能過剩令產品無法加價，恐怕中國已進入九十年代香港式負利率時代）。中國喺L快速增長及原材料漲價壓力下，已令樓價失控地上升，但因流動資金過剩，加息空間唔大。5月份貸款利率上升零點二七厘效果沒乜；擴大存貸利率差，反而鼓勵銀行增加貸款。美元與人民幣利率差擴大，更多銀行利用利率差進行套利操作，令內地銀行純利大升。

　　瑞信陶冬認為，中國經濟有三「過」：
一、投資過熱；
二、產能過剩；
三、房價過高。
上述都系流動資金過剩造成利率偏低嘅結果。貨幣環境一日唔回復正常化，利率水準亦無法正常化。中國呢三「過」暫時無法改，甚至人行亦老鼠拉龜。唔正常嘅貨幣政策（與美元長期掛鈎）造成唔正常滙率；唔正常滙率形成唔正常利率；唔正常利率造成投資過熱、產能過剩、樓價過高。中國依家情況同八十年代嘅日本、九十年代嘅香港一樣，最後系走上日本之路抑或港式通縮？木宰羊。

券商唔睇好電盈賣資產

　　響金本位制度下，任何國家長期貿赤，都將面對別國把黃金提走，因此不能長期出現貿赤。1971年12月改用浮動滙率制度下，已沒咗上述威脅，形成美國可以不斷印刷鈔票（或信貸）。1972年至今美國收支赤字已超過三萬億美元，資金供應過剩，便喺世界各地製造一個又一個泡沫（1971至73年港股系第一個泡沫）。全球經濟進入Boom & Bust期，股票市場、物業市場既可狂升又可暴跌，形成財富急速地轉移。1980年中國加入國際資本流，漸漸成為世界工廠，壓抑全球通脹上升速度，引發全球利率回落期，美國經濟因此進入另一次繁榮期（1983年開始，2000年結束）。2000年TMT股泡沫爆破，美國經濟應該進入衰退期，但2001年1月起美國利用減息及弱勢美元政策避過咗衰退期，新增貨幣卻被中國吸收咗（透過外貿賺返嚟或透過直接投資中國而流入），造成2001年至今中國固定資產投資迅速增加，帶動全球原材料漲價。美國增加貨幣所產生嘅通脹壓力，都去曬中國。

　　《京華時報》報導，繼網通就電盈（008）擬出售資產發佈反對聲明後，作為網通主管部門及大股東嘅信產部及發改委亦開始介入。由國資委和信產部官員組成嘅七人小組，專程來港對電盈出售資產進行評估，以及分析對網通造成嘅影響，形成事件迅速政治化。美林證券、百富勤等表示，呢次電盈出售資產，因為不明朗因素過多而唔睇好，預計電盈股價可能持續下跌。

　　畢非德格言：畀子女「做事」嘅資本，唔好畀子女「唔做事」嘅資金。我老曹極之同意上述諗法！將太多財富留畀子女，只系逼佢地做二世祖，從此不事生產。畀佢地「做事」嘅資本，讓佢地為自己嘅事業努力同奮鬥，從而享受賺錢過程，咁才系盡責嘅父親。

　　銀創控股（706）配售非上市認股證。

　　■嘉禹國際（1226）、信星集團（1170）7月10日；辰罡科技（8131）13日；有利集團（406）17日；英皇娛樂酒店（296）、英皇國際（163）、東方表行（398）19日公佈業績。

曹仁超2006-06-26投資者日記 第十八次加息機會高

曹仁超2006-06-26投資者日記 第十八次加息機會高

　　6月25日，周日。香港少見嘅藍天白雲呢幾天再現，我老曹心情亦開朗好多。不過，上周股市反彈十分短癮，主因係股市冇乜動力（momentum），恒生指數只喺15200至16000點之間游弋。在此環境下，一般人以少做少錯為守則，除非你有內幕消息（但上述做法係犯法嘅，因此擁有內幕消息嘅人士，唔會講你知，講你知有內幕消息者十之八九係假消息）。如果你想賭，可以賭波、賭馬甚至過澳門賭，上落終歸有限；金融市場才係賭身家地方，隨時一鋪清袋。由於6 月13日美股RSI低於30，MACD進入超賣區，引發股市反彈，到今天止，呢次反彈仍十分短癮。

農產品唔受加息影響

　　利率改變，要六個月後（甚至更長）才生效。如6月29日將利率推高至五厘二五，令短期息率再次高出美國核心通脹率二厘，可令明年首季美國核心通脹率受控制，但聯儲局有冇耐性？會否喺8月8日再加息？5月12日起美元已止跌回升，並6月5日形成雙底反彈，理由係同二百天線距離太遠。由於4月份美滙指數五十天線已跌穿二百天線，確認美元進入熊市，6月5日嘅回升只係反彈，估計可維持到7月或8月，美滙指數相信喺88.5附近再遇阻力。黃金、白銀及工業用金屬例如銅、鎳等，今年5月起進入調整期，取而代之係農產品例如小麥等，相信新一輪漲價潮由農產品帶動，例如棉花同橙汁等。上述商品唔受加息因素影響，而最關鍵係天氣。

　　美元短期上升周期6月已開始，可維持幾耐仍木宰羊。上述改變令商品價格受控制、新興股票市場股價回落，令出口股再度被睇好，起碼短期係咁。

　　今年5月如你冇喺股市及金市獲利回吐，可能已砸頭埋牆；如你依家揸住現金，不妨等6月29日之後再算。4月份美國耐用品訂單減少4.8％，睇嚟美國經濟已開始軟着陸。由於油價仍企喺七十美元一桶之上，放寬銀根在可見將來唔會出現。5月份係咪同牛講拜拜，同熊打交道？美股由2002年10月、港股由2003年3月進入小牛市，到今年5月雙方都有Ｄ疲態。熊已被吵醒，開始由洞穴中爬出來；新興市場股市由5月8日至今已跌20％，小熊市一期似乎已開始，至6月13日完成，然後係上落市，但大方向係反覆向下。未來將係耐性嘅考驗，過早入市者未必着數。如根據四年周期理論，今年5月開始進入回落期（過去美國中期選舉，道指平均回落8.4％，標普五百指數回落13.4％）。5月份道指見高位時，只有7.02％股份創新高，17％股份早已回落20％，通用汽車更回落40％，上述乃大市改變大方向嘅訊號。

　　美國十年期債券出現1984年5月以來最長嘅一次跌市。上周五出現連續第八個交易天回落，孳息率見五厘二二嘅四年高位。市場除咗相信6月29日加息四分一厘，愈嚟愈多人相信8月8日再加息，人數已達85％（上周仍然係五五波），並估計8月8日十年期債券孳息率可見五厘四。美元升至八星期高位，成1.25美元兌1歐羅及1美元兌116.57日圓。換言之，聯儲局不但有第十七次加息行動，第十八次加息機會更達85％。摩根大通分析員估計，新興股市將進一步受壓，南非蘭特已跌至三十三個月最低位，冰島、土耳奇、紐西蘭元等跌幅亦唔細。

　　日本十年期債券孳息率見一厘八七，估計7月份取消零利率後，可見二厘至二厘一。

　　MSCI亞太區股市上周跌0.6％，見121.23；5月8日至今跌幅15.4％。

樓市交投回升屬低價出貨

　　5月份香港銀行批出新住宅按揭貸款較4月升19.7％，達一百三十七億港元；二手樓貸款升12.9％，達一百億元，代表5月香港樓市交投回升，但相信係低價出貨。

　　至今為止，我老曹仍唔清楚6月14日道指10698點係拋售高潮抑或跌市中途島，上述分析結果可令你未來十二個月變得更富有或較貧窮。技術上睇，道指5月10日至今仍係一浪低於一浪；標普五百指數喺6月14日更創今年新低才反彈；納指五十天線已低於二百天線，出現死亡交叉；股市訊號繼續係有反彈冇上升。股市舊領袖（商品股、新興市場股及二線股）已回落超過20％，代表熊市已開始，股市新領袖一如三位博士，仍在依賴伯利恆之星引領，尋找「新生王」。依家處境係舊浪已進入退潮，新浪卻未開始。五窮六絕已肯定、7月能否翻身？則木宰羊。　　5月10日加息後，股市已感到痛，6月29日如再加息，會否喺傷口上擦鹽？另一方面，每片黑雲都鑲有銀邊，睇來睇去，未來經濟只係增長率放緩，而非陷入衰退，因此前景亦不應睇得太灰。踏入下半年業績公布期，今年上半年企業純利仍有增長。換言之，7月唔係冇賺錢機會，只係需要努力Ｄ去發掘！我老曹嘅責任係努力令你更富有，方法係捕捉每次潮流嘅改變。當然，不如意事十常八九，雖然大潮流方向冇睇錯，但喺轉捩點方面掌握仍唔係咁準，呢方面仍在努力提升中。人誰無錯？過去睇啱，唔代表將來一定睇啱，反之亦然。每一次都係新體驗及新挑戰，投資呢一行吸引力便是每天都有新事物要分析，往往令人唔知老之將至。

　　做我地呢一行，能知過去容易，預測將來卻難。唔少人用盡種種方法，結果仍係時啱時唔啱。近年錯得最離譜就係波浪理論派，由1990年起一直預測美國經濟衰退，但至今仍未實現。必須承認，我地呢一行只係能知過去，至於預測將來，至今為止冇一個人可做到，不過當有訊號出現時，小心Ｄ係必須嘅。任何人告訴你佢能知未來，請立即離開佢，因為佢唔係騙子就係白癡，因為先知早喺二千年前已死晒，自耶穌誕生後，世上再冇先知。

1997年後行業衰多盛少

　　八十年代初期，中國經濟由封閉式走向開放式，引發出口同入口需求，中國經濟由八、九十年代資金流入式經濟，漸漸變成今天資金雙向流動。香港經濟由八十年代以盛衰循環為主，轉化為個別行業各有各精采。今天香港經濟本身愈嚟愈穩定，唔會出現過熱亦唔會過冷，但個別行業升降卻極之驚人。有人認為呢個係對沖基金運作嘅結果，亦有人認為行業性盛衰取代整體經濟繁榮與衰退，才令對沖基金急速成長，到底有雞先抑或有蛋先？我老曹對呢項爭論冇興趣，只知上述現象1997年後已成主流。唔少人只知1997年8月後香港經濟不前，其實早喺1997年前，唔少行業已進入惡性競爭期。例如電腦硬件生產商自1984年起邊際利潤走下坡，至今超過二十年，情況未改善；至於飲食業（尤其酒樓），1987年起便走下坡；報業自1994年起走下坡；航空業1997年起走下坡；半導體生產業2000年起走下坡；甚至房地產項目中，寫字樓亦早喺1994年走，1997年回落嘅只係住宅樓價。今年係咪商品股見頂及國際性跨國銀行股見頂（本地業務為主嘅銀行股，唔少早在1997年見頂）？未來邊Ｄ行業進入繁榮期？我老曹正在努力找尋中。

　　資產升值後，必然帶嚟資產值回落期。香港樓價由1984年起步至1997年上升十三年，調整50％亦需六年半時間；到2003年第三季，時間上已脗合，此乃2003年第二季我老曹叫大家買豪宅嘅理由。見底後必反彈，但唔代表另一上升周期開始，其他行業亦一樣。例如香港酒樓七十年代開始愈開愈多，至1987年達到高潮，1987年10月股災後，香港酒樓業便開始走下坡，過去二十年內亦有起有跌，但跌嘅日子長、起嘅日子短，今天香港酒樓數目較1987年減少一半或以上。再以報業為例，1994年前大部分報館皆欣欣向榮，1994年後卻需要喺萎縮中嘅空間爭取生存機會，邊際利潤大幅回落，甚至進入惡性競爭，最後進入寡頭經濟，即只由幾份大報紙壟斷市場，其餘報館唔係艱苦經營便係被淘汰出局。不但報業如此，其他行業如電影業亦早已走下坡，而且速度更為嚇人，連出現寡頭經濟嘅機會都冇，變成野貓式經營（例如有好劇本便埋班開戲，不然便散Band），連影后都要到電台兼職做DJ，同六十年代電影業比較真係差天共地。香港電影業七十年代開始自從無線電視普及已走下坡，其後出咗個李小龍，曾令電影業一度強力反彈，自李小龍逝世後，電影公司便買少見少。仲有旅行社亦早喺八十年代開始走下坡。我老曹出嚟社會做事快四十年了，睇住唔少行業性盛衰，1997年前盛嘅行業多、衰嘅行業少，1997年後卻係衰嘅行業多、盛嘅行業少。

　　今年下半年又在敲門，未來展望如何？大前提係香港GDP增長率今年第二季起放緩，但通脹率第三季仍上升，要到第四季才放緩，加上7月份日本銀行可能放棄零利率政策。索羅斯話，過去數月日本中央銀行已從市場抽走二千億美元，引發新興股市5月份起急跌，上述資金不但唔會重新投入市場，恐怕日本7月份起仲會進一步抽走資金。過去三十年日本央行有三次貨幣供應出現負增長：第一次1981年、第二次1992年、第三次2000年；今年4月係第四次。前三次都令日經平均指數大跌，相信呢次亦唔例外。過去日本貨幣政策對世界經濟影響唔大，但2001年起日本實施零利率政策，成為唔少對沖基金嘅資金提供者，形成呢次日本銀行抽資影響力咁大。何況今年4月起嘅抽資行動係環球性，美國、歐洲甚至中國都加入（估計英國亦好快加入），目標係對付高油價，但油價仍頑強地抗跌，睇落呢次環球性中央銀行抽資行動，距離結束日子仍遠。

　　我老曹相信，1999年（或2001年）開始嘅原材料上升周期今年5月結束，呢點由銅價近日下調可證明。但CPI上升速度今年第三季才見頂，令利率上升周期極可能維持到8月8日或以
後；經濟放緩期今年第二季或第三季才開始，明年才結束。黃金反覆上升期由2001年開始，今年5月結束，上阻力七百三十美元，下支持五百四十二美元，喺可見將來估計都喺呢個框框內玩上落市。本周四美國將加息四分一厘兼美元進一步上升，能否將金價喺7月份內逼降至五百四十二美元形成雙底？並唔清楚。

　　奧地利已故畫家克林姆（Gustav Klimt）1907年所畫嘅《黃金畫作》（Adele Bloch-Bauer
I）6月18日以一億三千五百萬美元（十億五千萬港元）賣出，不但超越2004年5月畢加索嘅《拿煙斗的少年》售價一億四百萬美元，折合八億一千萬港元，同時超過1990年5月日本商人以一億一千萬美元（八億五千八百萬港元，加上通脹因素計）購入梵谷（Van Gogh）嘅《向日葵》。日本股市喺1990年1月回落，房地產1990年6月回落，2004年5月環球股市曾一度回落。呢次《黃金畫作》以超高價賣出，美國金融市場及樓市未來的確有Ｄ令人擔心。

盈大北京地產項目受負面影響

　　巴黎係個好地方，例如每周兩次街邊小販售賣嘅蔬果，都係剛由田上摘回來，路邊嘅小型音樂會令人感覺舒暢，河畔旁嘅漫步令人有重返戀愛時期感覺，路旁嘅午餐令人有游閒感覺，同香港熙熙攘攘、匆匆忙忙、分秒必爭嘅情景比較，給人另一種生活感覺。到咗巴黎，真係可以完全忘記金融市場的波動、衍生市場嘅拚命……。但喺巴黎生活，費用絕不便宜，一個路邊午餐隨時要你三十至五十歐羅（淨係食pizza亦要十歐羅）。換言之，欲享受巴黎嘅浪漫，你必須喺香港金融市場投資成功才可負擔，非一般打工仔可以負擔得起。法國人比較熱情，唔似英國人嘅「撲克」面孔，初見面已可一起午餐兼吹水，天南地北講餐懵（一般都識英文），但亦到此為止，上述只係霧水友誼，絕不可靠。

　　父親節前，我老曹兩個女兒決定每人送件衫畀我。我老曹兩年前答應太太每月減一磅，至今體重已輕咗二十六磅，形成衣服唔合穿，目標係再減五、六磅才停止。不過，點解減肥過程中為何要添新衣呢？由於衣不稱身，兩個女兒認為我老曹愈嚟愈似倒霉嘅寫稿佬，唔似成功嘅投資者！唔知係咪年紀大咗，我老曹早已失去扮靚興趣，最後拗唔過女兒才添咗兩件新衣。唔知其他父親係咪一如我老曹，好怕去百貨公司揀衣服。我老曹感覺係揀衫較揀股票更難，反之女性卻好喜歡喺商場內留連，隨時可花半天時間仍未夠喉，而喺選股票方面卻不願浪費超過十分鐘。我老曹經常笑自己太太係Penny Wise, Pound Stupid！（小錢精明，大錢糊塗），唔知其他女性係咪亦係咁。

　　北京6月25日消息，電盈（008）日前提議將旗下電訊資產出售，未獲中國網通（906）同意，已影響盈科大衍（432）喺北京開發房地產項目嘅計劃，包括北京朝陽區建設呼家樓電話局（該地產屬中國網通集團所有）；其次係一個價值十億元人民幣嘅豪宅項目；電盈佔盈大61％股權。冇中國網通協助，令盈大喺北京地產項目上受負面影響並唔奇怪，投資者宜小心。

曹仁超2006-06-24投資者日記 賺錢唯有與群眾諗法唔同

曹仁超2006-06-24投資者日記 賺錢唯有與群眾諗法唔同

　　6月23日，周五。恒生指數跌17.89收15808.81；成交一百八十四萬四千多元。6月期指收15780點，低水。電盈（008）跌4.4％，見五元五角，因為第二大股東網通（906）反對改變現狀。電視廣播（511）升6.8％，見四十九元五角，因《明報》報道電盈打算收購。電視廣播去年營業額四十一億七千六百多萬元，較2004年上升9.4％，獲利十一億八千萬元，上升64.1％，其中一億四千八百多萬元來自出售金融資產。每股獲利二元六角九仙，O十八點四倍，去年廣告收入二十六億八千多萬元，只升3.2％，可見此一市場未來增長空間十分有限。去年純利八億五千九百多萬元，來自電視廣告純利較2004年升65.46％，主因是去年香港經濟復甦，令廣告收入升3.2％（或二億二千九百多萬元）。電視業喺開支上比較固定，純利升降極受廣告收入影響。無線電視營運開支大約十五億元一年，超過上述數目便是集團來自廣告收益溢利，至於O十八倍以上值唔值得博？各位自己諗啦！小心又係另一次貴買而須他日賤賣。依家電視廣播股權由邵氏兄弟（080）持有，係邵氏兄弟最重要收入來源。邵氏兄弟其他業務則得啖笑，如出售TVB後真係冇嘢搞，邵爵士會好悶。相信今天唔少前電話公司股東仍後悔2000年冇趁市好出售香港電訊股份而接受電盈收購，變成今天嘅局面。

　　投資者自1997年至今可以話面對多次大上大落，先有亞洲金融風暴，然後又來TMT股熱潮，隨之係科網股泡沫爆破、「九．一一慘劇」、英隆事件、沙士疫症。2003年3月起開始自由行、CEPA及炒商品股熱，可以話過去十年既有大生亦有大死，既有機會賺到盤滿缽滿亦有機會一鋪清袋。有些投資當時睇落無限商機，結果陰溝翻船；有D投資似乎山窮水盡，轉眼又柳暗花明。過去十年地球愈轉愈快，真係十年人事幾番新。1997年至今投資市場訊號很清晰，如果你要
賺大錢，必須與群眾諗法唔同。當佢地樂觀時退出、悲觀時入市，不要怕與別不同，此乃賺錢方法。建立自己嘅目標及計算自己承擔風險能力；如果你嘅目標只係賺取 10％利潤，小心結果係損失慘重及戀上失敗項目。你應該搵那些有機會賺取50-100％項目及唔好忘記把止蝕盤訂喺虧損10-15％水平！

　　恒生指數15200點到底係牛市嘅腳抑或跌市中途島？暫時未清晰。二百五十天線移動平均數仍在上升中代表投資者情緒仍然樂觀。必須見到五十天移動平均數低於二百五十天線才確認熊市，只係上述訊號出現時已太遲。值得注意嘅係，納指上周五十天線已跌穿二百天線【圖】（外國習慣用二百天），即納指已確認熊市。不過，標普五百指數及道指尚未出現上述情況。恒指亦未出現五十天線低於二百五十天線。

銀行股已出現頭肩頂

　　過去十年成功市場分析員都係嗰D着重個別行業分析者而非只睇大市方向者。投資係一項唔易賺錢嘅項目，以恒生指數計，今年上半年跑輸定期存款利息（1997年7月1日至今快九年了，恒生指數長期跑輸銀行定期存款回報）！1929年有人問洛克菲勒後市點睇？佢嘅回答係：後市永遠波動！1997年7月1日時相信冇人諗過未來九年港股並冇提供回報只提供波幅（除非係精於選股才可賺錢），情況已較房地產好，1997年7月1日至今除豪宅外，全部都跌價。

　　2006年5月後股市點睇？VIX（Volatility Index）自2003年5月起一直回落，但2006年5月起卻急升，即2006年5月起投資股票風險大幅上升。

　　從走勢表現睇銀行股已出現頭肩頂，代表銀行風光嘅日子已成過去。各位認為最安全已嘅地方，事後發現可能係最危險嘅地方。

　　新興市場連續五星期面對淨沽出（即沽出大於買入），至6月21日止被抽走資金一百五十四億美元（上周抽走二十億美元）。今年首四個月淨流入（流入減流出）三百二十九億美元，其中一百五十四億美元已被抽走。全球有一萬五千個基金，控制資金超過七萬億美元，投資項目唔少涉及新興市場投資，5月8日至今MSCI新興市場指數跌20％。基金喺新興市場嘅投資減少25％（5月10日最高峰時揸三千零四十八億美元）部分理由係減持，更大理由係所持股份跌價。影響較大有東歐、中東、非洲及拉丁美洲。

　　
2003年3月起，資金大量流入新興市場，2006年5月起又從新興市場流走。資金流入令新興市場出現一片繁榮，資金流走後又會點？2003年至今年4月能源股同資源股出色表現會否喺今年5月結束？呢方面意見依家好分歧，尤其係油價方面，唔少人仍相信油價遲早見一百美元一桶，亦有人認為可回落至五十五美元一桶，睇好者強調中國因素同印度因素，睇淡者認為油價咁高，需求正在放緩中。我老曹並非石油專家，只有做旁觀者。油價係一切通脹之本，如油價升，其他商品回落亦只係調整；如油價跌，可確認今年5月起商品價格見頂。

　　根據TIPS債券表現，未來通脹率應受Contained，因此呢次銀根收緊應該好溫和，估計利率上升止於五厘二五至五厘半。一旦油價受控制後便停止上漲，加息趨勢便停止。換言之，利率上升期極有可能今年8月8日便結束。

　　經濟學唔係物理學或化學，冇定律可言。嚴格而言唔係科學，阿當斯密喺格拉斯哥大學教心理學，佢地巨著《原富論》討論群眾心理多於科學分析。例如恐懼與貪念、希望與嫉妒、仁慈與瑣碎、愛與恨及旁觀主義，都可以對經濟造成影響。美其名為自由市場，任何人喺法律範圍內可做任何事，佢地嘅行為事後決定成功與失敗。理論上，市場愈自由，代表每個人獲更公平待遇，因此政府不得偏幫任何人、任何財團甚至任何行業。

　　現代科技改變咗人類溝通方式、投資方式及貿易方式。例如世界盃已取代香港人睇精工對南華，沙士疫症曾令香港經濟陷入低潮。人與人之間已變得這麽近又那麽遠，5月9日由原材料價調整開始，喺五星期內對金融市場又可造成咁大破壞。利率、通脹、股市、外滙、商品價格、衍生工具及分析員言論影響都無遠弗屆，只要貝南奇喺美國講一句話，全球經濟可以出現大波動；5月8日至6月13日所帶嚟嘅經濟破壞甚至去年泰國海嘯至今仍未回補及唔知幾時補回。

投資法國物業稅負重

　　2004年起我老曹開始減持倫敦物業，當時曾經考慮將資金轉投巴黎房地產，但因為自己唔識法文而放棄。同倫敦比較，巴黎物業便宜一半，近三年每年升值10％左右（2004年前升幅有限），但法國稅率都幾重。例如要付增值稅（TVA）係物業淨買價19.6％，或可選擇付TTC係總買價嘅16.4％。如喺二十年內將物業出售，政府可退回TVA或TTC；如超過二十年，政府便唔再退回。契約費用政府收樓價2－3％（睇樓價高低而定），如做按揭，銀行收樓價1.5％作為手續費，如要翻譯成英文，代價二百五十歐羅。最高可按樓價80％（包括TVA），還款期最長二十五年！如出租，一般租約可長至九到十一年。租金收入25％係稅（但可扣除利息開支、會計費、保險費及地稅），買傢俬可分十年扣稅，物業減除土地成本後價值可分二十五年扣稅。依家一房一廳單位（約四百五十方呎），一般售價二十五萬歐羅（約二百四十萬港元），租金回報率五厘左右，按揭利率三厘七五。付20％首期（80％按揭）仍有錢落袋。

　　如非歐盟居民喺出售物業時抽33％資金增值稅，按年遞減至十五年後為零（即持有十五年以上，甚至非歐盟區居民亦不用付資本增值稅）。

　　由於巴黎嚴格限制重建，因此大部分都係幾十年前舊樓，樓高七至九層，只有新區才有大廈式建築物，反而唔及舊樓值錢（交通比較冇咁方便）及以新移民為主。過去三年巴黎樓價已升值30％，如扣除各種稅項開支、手續費等，仍冇幾多錢落袋。同英國唔同，英國地產法例同香港接近一樣，尤其係非英國居民（唔使付增值稅）。租金收入可以喺利息開支中全部扣除（接近唔使畀稅），物業買賣政府收費好平，律師費亦便宜，最貴係物業代理佣金，一般係樓價4－6％，由買賣雙方各佔一半（如樓市旺時可完全由買方承擔，如樓市淡時亦可完全由賣方承擔）。

　　巴黎同倫敦唔同地方係倫敦樓價只要升10％，便開始有錢賺；巴黎樓價要升30％，才打和。

　　中國增加商業銀行存款準備金至8％，業內人士認為因大量期票到期；加上外滙存款不斷流入，增加存款準備金並唔意味流動資金會抽緊，尤其係近期新股重新認購更加大銀行間資金波動。去年人行發行一年以內短期品種債券，今後八個月內平均每月有三千二百九十八億五千萬元票據到期，以4月份銀行總存款三十二萬二千八百億計，即每月可為商業銀行提供1％流動資金。換言之，7月5日增加存款準備金未必能抽緊內地銀根。

　　首部規範企業投資嘅規章快出台，將嚴格規定三類企業必須上報審核：一、包括資產負債券為65％以上企業。二、非主業投資超過總投資5％企業。三、非主業資產超過總資產5％企業。相信「中央企業投資管理暫行辦法」出台後，可減少公司從事非本業項目，大大降低企業嘅投資風險。國資委主任李榮融曾表示，唔少國企喺證券或貸款上非主業領域投資損失，一直係導致企業虧損重要原因之一，例如南方航空（1055）母公司炒股票造成巨大虧損。此一例一出，代表政府唔鼓勵企業多元化發展。

內地地產代理進入冬季

　　「國六條」出台後，再加十五項細則，開發商開始沉默，6月20日深圳國土局頒布了全國首個地方房地產調控落實細則之後，廣州市國土局出手向三十四家單位追繳土地出讓金，發出閒置土地回收公示，宣布收回二十五宗面積總計三十二公頃閒置土地，要求未入房屋管理系統嘅四十七個專案必須7月30日之前換證上網。北京市建委和規委亦根據「國六條」相關內定制定實施細則方案已報市政府，不日公布。上海樓市亦靜待地方細則出台。呢次國六條後地政府紛紛出手，睇嚟內地樓市又再下調。唔少代理行已掛出招租或轉讓告示，睇落內地地產代理開始進入冬季，唔排除實力有限嘅小型開發商及地產代理被市場淘汰出局。從呢次地產商選擇沉默睇，證明呢次調控有威嚇力！

　　中國十三億人口，真正有消費力者只佔15％，約一億九千五百萬，相等於美國人口40％。大部分四十五歲左右係改革開放下受惠者，又以居住喺沿海省市為主，記得1998年有人話十三億中國人口每人每天飲一支可口可樂，可口可樂便發達，因此推介可樂股份，八年後可樂股價卻一跌50％。原來中國有一半人口係負擔唔起日日飲可口可樂，中國唔係美國，到咗今天，好少中國人每天飲一支可樂！

外資很難建立連鎖店

　　喺內地推銷消費品，發現中國係各處鄉村各處例。每個省市都有本身文化及習俗。美式連鎖店經營方式喺中國行唔通；甚至珠三角消費模式同長三角唔同，喺中國好難建立全國性連鎖店。今天相信有五十萬香港人住喺珠三角，有五十萬台灣人住喺上海一帶，只係呢點，已令兩地有好多地方唔同。

　　國家統計局綜合司宣布，今年1月至5月全國工業實現利潤六千二百九十四億元，較去年同期上升25.5％，升幅大者有石油、有色金屬、電力、部分重化工業及交通運輸設備製造業。

　　前後五輪，整整七個月談判，結果仍係中國接受鐵礦石價格漲19％！最大買家反而一再被敲竹槓！歸根到底係中國鋼產無序增產，又忽視對鐵礦石海外投資；反觀日本上世紀五十年代末期已開始投資國際鐵礦石，喺巴西、澳洲都有直接或間接控股公司，鐵礦石加價，荷包跌落肚兜，嚟自上述公司純利對沖進口多付外滙，反觀中國最近才學會咁做，形成喺原材料上都被別國敲竹槓，銅係咁，鐵係咁，石油係咁，結果中國以高價入口原材料，低價將產品出口！自己做死，別人笑死。

牛熊分界線毫無根據

2006-06-15 投資者日記 牛熊分界線毫無根據

曹Sir - 投資者日記

　　6月14日，周三。恒生指數一度反彈162點，見15396.5，可惜下午一開市又再跌過，收市見15247.92，只升13.5。6月期指低水，收15241點，跌31點，睇大市仍未能企穩，理由係股市跌得太急，唔少購買力15600點以上被綁。

　　核心通脹率只係落後指數，如以它作為加息減息指標，咁不但6月29日要加息，8月8日亦須加息，到時會否過猶不及？技術上睇，股市漸進入「風眼」，應有一段比較上平靜日子。自5月8日至今恒指已回落12％，過度超賣下平靜，冇乜用。

　　倫敦銅價跌6.7％，令江西銅業（358）股價跌4.2％，見五元六角五仙；德昌電機（179）因銅價下跌而升6.48％，見五元七角五仙。

中國經濟失衡開始糾正

　　2001年1月開始，流動資金被人為地推高，引發過去三年股市強勁增長，帶動全球GDP上升，部分增長係透支未來。隨流動資金開始正常化（例如美元利率重新高於通脹率二厘或以上），未來GDP增長率放緩機會好大。流動資金過剩令投資者過去曾忽視部分新興經濟體（如印度）收支赤字狀況，資產泡沫亦令企業盈利睇落去比實際更大（例如2005年香港因會計制度改變，地產公司及銀行業紛紛重估本身固定資產，令去年純利大升）。隨流動資金逐步被抽走，呢D企業今年純利將走下坡，而D收支出現巨大赤字國家貨幣終將急跌，令通脹率上升，所以各國央行不得不抽緊銀根，以避免通脹惡化，但GDP增長率因此放緩。

　　熊市轉捩點，由美國聯儲局開始力打擊通脹，令流動資金由金融體系中被抽走開始。換言之，5月10日美股回落，同2004年春季及去年秋季拋售，本質上有所唔同，上兩次拋售，美國聯儲局及其他國家央行未對通脹表示擔憂。事實上，去年起通脹漸成一個大問題，但全球央行一直以「核心通脹」仍處於低位而輕輕帶過。隨金價狂升至七百三十美元一盎斯，美元價急跌，動搖全球對美元信心，貝南奇只有迅速改變態度，引發呢次全球性拋售。MSCI新興市場指數由2003年3月12日至今年5月8日共升228％，但5月8日至今跌幅只有20％，相對巨大漲幅仍唔算得乜。有人以O唔高，認為後市跌幅有限，上述睇法係唔，今天企業純利如地產股及銀行股，透過重估固定資產而被誇大；資源股亦因商品價格上升而誇大收益，上述都係流動資金過剩產物，一旦流動資金水平恢復正常，便會出現糾正，例如中東海灣股市過去跌幅便達50％至70％。

　　值得注意係，今年起中國經濟增長模式改變。過去中國經濟由固定投資及出口拉動，兩者佔中國GDP75％，都需要大量資源及商品消耗去支持，大摩羅奇認為，咁樣再發展落去，商品價格上升將令成本升至令人卻步階段（即遲早國內工廠只能做蝕本生意！）
「十一．五」規劃今年剛上馬，成績未見，目的係實現一個「低商品消耗、高科技投入」增長模式。未來中國經濟增長將由私人消費及高新科技產品出口帶動，就似依家日本及南韓，並以環渤海作為經濟增長第三引擎。中國人民銀行4月下旬已收緊貨幣政策，遲早內地經濟上反映出。中國GDP增長率將由過去二十五年平均每年9.5％，漸漸調低至2010年GDP增長率7.5％，以及GDP每單位能源含量每年降低4％（即2010年共降低20％），即中國今年起經濟增長由過去高耗能、高商品消耗經濟增長模式，逐步轉為低耗能、低商品消耗經濟增長模式。全球能源及商品需求正出現改變，而且中國正開始大宗商品交易中行使「話事權」，例如呢次鐵礦石價格談判，以及最近出售存銅去壓價。羅奇預言中國經濟失衡現象今年起開始糾正，若干程度上緩解全球能源及工業原材料市場所承受壓力。

　　英國BP石油公司首席執行官布朗大膽預測，五年內國際油價將跌至四十美元一桶、十年內跌至二十五至三十美元！高油價係咪到轉捩點?!

　　本文見報日，美國已公布5月份CPI，估計升幅0.4％，較4月份0.6％為低。對美股影響如何，會否趁勢反彈？

支術反彈快將出現

　　聯儲局做法係用昨天數據（5月份CPI）去決定明天利率。例如2002年10月美股回升後，聯儲局到2003年6月才停止減息（相差九個月）。
5月10日美股已開始回落，聯儲局幾時才停止加息？站聯儲局立場，往往寧可殺錯不可放過，往往過猶不及。道指MACD短期已進入超賣區，技術上睇可支持一次短期反彈，之後係點便見步行步。

　　超級大熊市由2000年年初開始，熊市一期至2002年10月完成，然後出現熊市中最大一次反彈，相信今年5月10日完成，並進入熊市二期。標普五百已跌穿二百天線、MACD進入負11、RSI指出短期超賣、ROC（Rate of Change）係負4，一切都顯示一次技術反彈快將出現。不過，股市大跌之後，唔代表未來唔會再跌！估計短期反彈只係風眼。

　　VIX已升至22.8，係2003年以新高，代表低波幅時代今年4月結束，高波幅時代今年5月第二個星期開始，投資股票風險大幅上升。依家投資者對前景十分憂慮，平均每四十五萬份puts才有十萬份calls。以上述情況，反彈隨時出現，只係反彈完成後，唔排除股價可以再跌10％或以上。廣度指標（breadth Index）係四比一（即每四手成交係照買家價成交才有一手成交照賣家價成交），代表投資信心十分弱。

　　股市如出現大反彈，宜拋售高增長股及周期性股，改高息股及低負債股。聯儲局成員未宣布暫停加息前，仍不宜大舉入市。

　　高負債本身係通縮源頭（1990年日本及1997年7月香港已證明呢點）。如果唔係聯儲局2001年1月大幅減息，今天美國經濟可能早已進入通縮而非憂慮通脹。當聯儲局將聯邦基金利率上調到五厘二五後，令投資者對承擔風險戒心上升，O回落，上述因素足可阻止指數重返今年5月高位，即今年高點已見。自1997年8月至今，贏家係保守投資者而非進取投資者。D年收入一百萬港元以上家庭，今天經濟狀況較1997年7月前更好；反之，年收入四十萬港元以下家庭，今天經濟狀況卻較1997年7月前更差；至於四十萬至一百萬元收入家庭便有上有落。大趨勢係社會上20％家庭富者愈富，其餘卻貧者愈貧。

　　呢次金價大跌，係因為各國央行聯手對付對沖基金，明知佢地利用槓桿去炒，於是收緊銀根（4月開始）兼加息（5月開始）雙管齊下，殺到對沖基金兵敗如山倒。空美元金、銅、油者，依家只餘下油者仍頑強抵抗。七十年代石油危機，令北海油田、阿拉斯加油田被開採，當年美國同歐洲唔係冇石油資源，只係開採成本昂貴。今天中國同印度已成為石油消耗大國，但同時本身冇龐大石油資源，未來結果必定係美國同歐洲讓出部分石油資源同中國、印度共享。美國人再唔可以室外溫度零下二十五度時讓室內溫度保持攝氏二十五度，美國人應放棄使用SUV汽車、停止大量耗用汽油及停止用油發電，而搵出清潔用煤發電方法……。
不然高油價期將長期維持，最後摧毀西方國家消費力，令全球再次進入經濟衰退。

　　去年四個颶風襲擊美國海岸，摧毀一百一十三個鑽油台及超過四百條油管，尤其卡特里娜更造成超過一千億美元財物損失，係美國有史以來最大一場風災。今年估計大西洋及墨西哥灣有四至六個大型颶風襲擊美國，冇人可事前知道有冇事發生。颱風季節由6月1日開始，11月30日結束，呢段日子好少人有膽大量拋空期油，形成油價現今仍企得住。各國央行聯手拮穿黃金泡沫同商品泡沫，但油價仲高企，如6月29日同8月8日再加息，將刺穿石油泡沫，但必須考慮樓市承受力，以免沙塵滾滾殺錯良民，短期估計油價六十五至七十美元上下擺動。

　　每次孳息曲線倒轉，都可產生「奔向優質」（flight-to-quality）情況，至於會否引發經濟衰退？情況每次唔同，唔係咁簡單。今天十年期債券孳息四厘九六、二年期債券五厘，引發高風險項目被拋售，代表資金繼續收緊，商品同黃金出現unwind；新興股票市場相對美股亦係高風險，亦出現unwind，一如納指跌幅大於道指道理一樣。

　　金價已跌穿二百天線、RSI進入超賣區，ROC更跌至負12，相信進入尋底期，拋售潮已近尾聲。我老曹再強調一次，二百天線（或二百五十天線）唔係牛熊分界線，移動平均線係1973年7月《信報》鄭植林兄由外國引入香港，並證明十分有用，但依家太普及，而引發好多誤解！移動平均線一如猜測指數、動力指數及RSI，係擺動指數（oscillator），並非乜牛熊分界線，呢D毫無根據笑話，真係笑死鬼佬。一如過去有人認為減息股市升、加息股市跌一樣咁荒謬！換言之，升穿二百天線（或二百五十天線）唔代表牛市誕生，跌穿二百天線（或二百五十天線）亦唔表牛市死亡。日經平均指數去年5月首次跌破二百五十天線，事後冇任何發生【圖一】。5月12日金價七百三十點四美元，拋離二百天線33.7％引發調整；今天金價見五百四十二點五美元，略低於二百天線，代表拋售告一段落，代表呢個水平購入黃金風險唔大，後市展望下跌風險只有5-10％。去年7月黃金亦跌穿二百天線，黃金牛市亦未死（牛市中，跌穿二百天線係入貨訊號，代表五百四十六美元或以下可考慮重新吸納黃金！）如果係牛市，好少低於二百天十個交易天，即黃金由五百四十二美元回升機會十分大，當然亦有例外。分辨牛熊、利用道氏理論，涉及大量基本因素須考慮。

　　恒生指數5月8日17328點拋離二百五十天線13.5％，調整便出現；6月13日跌穿二百五十天線，代表拋售告一段落，便出現反彈【圖二】。同黃金唔同，黃金係牛市，跌穿二百天線後入貨係安全位。至於恒生指數，因為處熊市（2000年已開始），跌穿二百五十天線只係出現反彈水位，二百天線（或二百五十天線）並唔係牛熊分界線。

　　決定牛熊市，應用道氏理論，唔係用移動平均線理論。鐘擺理論亦有助分辨牛熊市。牛市中，鐘擺往往向上擺（即拋離二百五十天線愈愈高），只有好少時間低於二百五十天線，即使低於二百五十天線，一般只低5-10％便又再次向上擺動。有人將二百五十天線作為牛熊分界線，相信係出於上述誤會。熊市一期，恒指由極度偏高（例如拋離二百五十天線25％或以上）進入極度偏低（例如低於二百五十天15-20％）才完成熊一，依家處於熊市二期，通常二百五十天線
之間穿梭，上限係15％，下限係低於250天線10％。經過一段好長日子（熊市二期十分長），才進入熊市三期，到時恒生指數每次高出二百五十天線5％都要拋售，直到有一天低於二百五十天線15－20％，便完成整個熊市。

今年冇夏日戀情

　　上述才係正統移動平均線理論，書本上從來冇講二百五十天線係牛熊分界線。股市有如天氣，驟晴驟雨，冇人可肯定話你知明天天氣會點樣。5月策略係Sell in May，6月策略係Just wait相信軟陸剛開始，唔同行業都在調整去適應軟陸前景，急唔。相信整個夏季都係Dog’s
day！（做牛做馬日，既辛苦又搵唔到銀）！相信今年冇夏日戀情。

　　美國房屋建造股指數由高位至今已下跌40％，個別跌幅超過50％，美國房屋建造業已陷入衰退。雷曼兄弟第二季純利升47％，但股價仍下跌；高盛、美林股價亦下跌。以高盛為例，有四分三純利自trading……。證券公司自己炒賣證券去賺取利潤，而非代客買賣賺佣金，係咪好令人擔心？因為金融市場冇常勝軍。雖然高盛純利達二十三億一千萬美元或每股四元七角八仙（較去年同期八億六千五百萬美元或每股一元七角一仙大幅上升），但股價一度回落4％，代表股票
經紀行業好景不再。

加國兩岸浮現樓市泡沫

　　美國房地產亦開始令人擔心，全國大約有超過四百萬間一手及二手樓仍未售出，存貨量正在上升，估計未來十二至二十四個月存貨仍將上升，最終引發美國樓價
向下。根據《USAToday》研究，今年首季美國有七十一個城市樓價太貴，全國有34％樓價太貴、39％偏高。上述物業主要分布加州及佛羅里達州，平均售價三十八萬三千
美元，偏高102.6％。最便宜達拉斯（Dallas），過去電視劇《錦鏽豪門》便以達拉斯為背景，講油價高企後八十年代豪門恩怨，今天樓價仍九萬四千美元，估計偏低24％。依家美國偏低樓價只佔全美1％。

　　加拿大西岸（例如溫哥華）樓價已出現泡沫現象，其次係卡加利今年樓價再升30％。溫哥華平均樓價要五十萬加元，主要係就業情況理想，令大量人口湧入，因能源及資源有價。隨能源及資源價格回落，擔心溫哥華樓價亦盛極而衰，同樣大細物業多倫多只值三十五萬加元，離多倫多一小時車程馬克姆同樣一千八百
呎四房一廳住宅，只賣十二萬加元。

　　If you’re not Healthy, you’re not
Wealthy！冇健康，所有財富都係零；有健康，便係零前加個一字！荷包腫脹冇問題，肚腩鼓脹大問題！今天超級富豪冇一個有肥肚腩，如果你仍擁有，請設法五十歲前搞掂佢，不然你幾難活到八十歲。今天中年男士及女士有60％以上超重（包括我老曹），我老曹兩年前已努力去掉肥肚腩，並漸見功效。做法好簡單，就係少油、少鹽、少糖兼少澱粉質食物。活得健康，財富才有意義，尤其是我地呢一行，平日已精神緊張，如再加上煙酒，你即係同自己過唔去。無論點忙，請每天做三十分鐘出汗運動，保證你活到八十歲！

　　新鴻基公司（086）、聯合集團（373）、聯合地產（056）停牌，宣布重大收購。

　　招商迪辰（632）停牌，宣布發可換股債券。

　　永成國際（850）、天地數碼（500）停牌，宣布發行新股。

　　■邵氏（080）6月22日；訊通控股（8082）、衛科創業（8172）23日；FlexSystem（8050）、毅興科技（8047）、銀河映
像（8130）26日；百富國際（8272）、豐盛創意（8136）27日；即時科研（8119）、富士高實業（927）28日；鐳射國際（8173）
30日公布業績。