港股高潮就在今天 2006年10月28日

曹仁超 投資者日記 港股高潮就在今天
2006年10月28日 18:06

10月27日，週五。恒生指數一度見18465.54，收市18297.55，較週四跌56.19；全 日成交高達七百六十億一千八百萬元。10 月期指跌25點，收18393點；但11月期指下跌130點，收18299點。大量成交而價位微跌，乃大跌先兆，情況有D不妙。工行（1398）首天上牌 升15%，收三元五角二仙；建行（939）跌3%，見三元五角三仙；中銀香港（2388）跌1.7%，見十七元六角四仙。
中石油（857）跌1.2%，見八元六角，紐約油價週四跌1.7%，見六十點三六美元。國泰（293） 逆市升0.8％，見十六元八角二仙；南方航空（1055）升3.9%，見二元三角九仙，因第三季純利上升51%，達十二億九千萬元人民幣，估計第四季進一 步上升（因10月1日起增加燃油附加費）。港交所（388）則下跌3.6%。相信港股高潮就在今天。

派發日子唔短只等訊號
技術上睇，6月14日開始慨上升（或反彈）最低限度已完成90％，或者系另一個5月8日（指數見17328點後出現大調整）。如系有留意，股市派發日子已經唔短，只等候訊號；今天上述訊號已出現。
歐洲央行高級行政人員喺日本警告各位歐羅利率仍會上升，不但如此，未來高利率時間將十分長。相信12月歐羅利率將由三厘二五升上三厘半。歐羅利率上升，可進一步延長美元利率停留喺五厘二五水準。
根據美國商品期貨交易委員會資料，油價7月14日回落後，8月4日開始未平倉合約不跌反升到上週五為止 共增加十萬零五千七百八十張或5％（每份合約代表一千桶原油），其中大部分乃非商業性（即投資者持有），即唔少投資者8月開始博油價回升或反彈。11月1 日OPEC正式減產一百萬桶，能否真系令油價回升？7月14日起油價回落系另一個泡沫爆破或中期調整？事後才知道。11月起美國漸入冬季，石油需求又點？ 去年起大量投機資金流入石油期貨市場，今年更進一步，投機資金可擴大價格波動，但決定油價大方向仍系供求因素。高油價令產油國今年多賺八千億美元，上述油 元繼續喺金融市場到處流竄，形成金融市場一片興旺。但油價自7月14日起回落，OPEC於11月1日起減產，明年嚟自油價慨收益將唔及今年，上述因素何時 才由股市反映？
9月份美國中價新樓價較一個月前降9.7％，系過去三十五年內最大跌幅，平均售價每單位二十一萬七千美 元（8月份二十三萬九千三百美元），系2004年9月以來最低，跌幅系1970年12月以來最大。二手樓價較一年前跌2.5％，亦系近四十年內跌幅最大慨 一個月。建屋商8月起減價推樓，令9月份新樓銷升5.3％，系連續第二個月銷量回升；但同去年9月比較仲系減少14.2％。新樓9月份存貨五十五萬七千 間，較8月份慨五十六萬八千間下降，仍較過去平均數（六點四個月存量）為大。

香港情況亦一樣，發展商開始為一手樓大幅劈價去增加銷量，依家二手樓價跌幅唔大；孫明揚話年底將公佈2007年居屋銷售細則。美國一手樓自今年5月起滯銷，8月利用減價促銷，9月樓價減幅較大，令銷量出現較大回升，聽講10月銷量亦不俗，證明價低有承接力。

恒指新高系假慨
貝南奇10月5日估計美國樓價回落，令今年下半年GDP增長率起碼少1％。美國政府已公佈第三季GDP 增長率只有1.6％（第二季2.6％），系 2003年以來最低慨增長率；核心通脹平減指數估計系2.5％（第二季2.7％），仍超過貝南奇要求2％或以下。物業價格回落速度加快，令聯儲局冇起士再 加息。

2003年起慨經濟復蘇主要由資產再升值（Asset driven）帶動。本港樓價由2003年低點至今年上半年升幅高達60％（豪宅升幅更超過100％）。恒生指數由2003年4月8331點起步，至今升 幅達120％。資產升值刺激消費欲望，消費占全港GDP 68.5％，投資占本港GDP 26.5％，兩者加起來已占全港GDP 95％，可見影響力之大。香港物業升值潮今年上半年結束，至於股市上升潮亦進入尋頂期（First in , Last out）。恒生指數2003年4月起步上升，本港樓市2003年9月才上升；本港樓市今年上半年見頂，股市又點？恒指今天最高見18465.54，已超過 2000年3月28日高點18397點；今天美匯指數只有86點，2000年3月系120點，即美元匯價較2000年3月低28.3％。換言之，今天恒生 指數扣除港元過去六年失去28.3％匯率，實際上只系13200點！今天恒生指數創新高，只系港元貶值28.3％所產生，如扣除匯率因素，今天恒指新高系 「假慨」唔系「真慨」。香港經濟高潮仍系1997年8月，唔系2000年3月，更加唔系2006年10月。只系大部分人用「港元」角度去睇恒指，才會認為 今天恒生指數已創新高。

恒生指數創歷年新高。工商銀行（1398）H股股價較上海A股股價高，系咪港人對H股睇得太 好？2001年內地 A股高出本港H股甚多，引發內地A股熊市、港股H股牛市；到咗今天，唔少H股股價較內地A股股價更高，但工商銀行A股只有一百三十億股，H股卻有三百五十 三億八千萬股，A股供應量唔及H股，點解H股股價反較A股高？1984年工行由中國人行中分割出來，令人行可以成為中央銀行。依家工商銀行分行一萬八千 間，員工三十六萬，客戶一億五千萬，系中國最大慨國有股份銀行。

去年6月交通銀行（3328）上市首天升13％；建設銀行（939）去年10月上市，上市首天冇升跌； 中國銀行（3988）今年6月1日上市，首天升15.3％；招商銀行（3968）今年9月22日上市，升25％。以上市首天升幅計，工商銀行同其他內地銀 行接近。本港公開認購獲七十八倍超額認購，因此啟動回撥機制，由原先占上市總數5％上升到10％，內地A股獲四十九倍超額認購。機構投資者認購方面，H股 獲五十倍超額認購，A股部分獲十四倍超額認購。
工商銀行上市後，11月份香港股市點睇？宜進一步保守。道鐘斯工業平均指數與交通平均指數已出現背 馳，11月份美股走勢令人憂慮。股票市場已進入極度競爭性慨時代，贏家系嗰D每週願花七十小時至八十小時慨職業投資者，而非一段業餘投資者。嗰D只曉睇走 勢而唔曉實力分析者早已處於劣勢。

太多人懂慨東西通常都唔值錢，例如洗衫、煮飯、買餸、做家務好辛苦，但外傭每月只收三千多元已可一腳踢。換言之，工作回報率同你份工系咪辛苦無關。唔少人依賴股票經紀或財經演員提供意見去決定買入或賣出股票，而非自己下苦功做功課，你信唔信咁容易便可以發達?!

1967 至97年或者仲可以，因為嗰段日子香港經濟進入上升期；但1997年後絕對唔可能，只有精明投資者才能繼續保持每年資本升值20％。請停止短線投機（因為 普通人絕對唔系職業投資者慨對手）、減少買賣次數，學習捕捉趨勢而唔系只睇走勢。升得愈高，跌得愈重！恒生指數見新高點，後市仍可再上升幾多？6月14日 至今股市已上升四個多月，今時今日連6月份睇淡嘅淡友亦早已改口做咗好友。喺恒指萬八點以上買賣股份，絕對系走鋼線行為（必須藝高人膽大）。6月份股市內 太多人睇淡，今天又太多人睇好（個別股份例外），VIX已由今年6月中嘅高位回落，至今又十分接近今年5月低位，代表對後市睇好慨人太多，各位小心一次大 調整快出現（甚至已經開始）。

11月1日，電腦直接製版機器等七項有利技術創新及生產製造節能產品慨入口稅，由依家1％至7％降為零 至 3%；煤炭、成品油、氧化鋁等二十六種資源類產品，稅率由3％至6％降至零到3％；合成氨等十六項化肥慨稅率由3％至5.5％降至1％；尿素等三種化肥稅 率降為1％。
西藏已不再神秘
出口方面，磁灰石、稀土金屬、礦砂等出口稅率改為10％；煤炭、焦炭、原油等出口稅5％；銅、鎳、電解 鋁等十一項有色金屬出口稅15％；鋁合金、生鐵、鋼坯等三十項鋼鐵產品出口稅10％；稀土化合物、木地板、一次性筷子等二十一項出口稅 10％。本港上市股份受不同影響。繼火車進藏後，西藏亦開放領空，東航（670）、南航（1055）、海航、川航宣佈開闢十多條航線；西藏已成為國內旅遊 首推路線。今年首三季海內外遊客共一百九十萬人次，較去年同期升29％，估計第四季增幅更大。西藏已唔再神秘，反而經濟全面起飛！
日本核心通脹率9月只升0.2％（8月份升0.3％），令日本下一次加息最快明年才出現。過去十六年日本經濟不前，理由系經濟經常陷入通縮，核心通脹率回落，令日股投資者擔心日本經濟又再度重陷通縮。
響「十一．五」規劃期間，中國要解決慨問題可以分為三大類：
甲、體制問題。共產制度下一切歸公，連賣豬肉慨人亦有權決定畀邊個肥肉、畀邊個瘦肉，亦可造成貪污腐 敗。市場經濟制度就系將公權轉為私權，形成八十年代「倒爺」盛行（將物資由公家手中攞返家喺市場上賣高價）。今天內地消費者要買肥肉或瘦肉自行決定，分別 只系售價唔同。由公轉私問題許多方面仍未解決，例如擁有壟斷資源開發權、土地等地方政府，呢D資源及土地由公轉私慨過程中出現貪污、腐敗涉及金錢，較賣豬 肉時形成慨地方政府與中央政府矛盾更為巨大。中央政府仍在努力解決壟斷資源開發權、土地等由公轉私問題。
內地鐵路未來五年高速興建

乙、三農問題、城鄉差距問題、地區差距問題。過去中國系農業社會，1978年改革開放後才全面向工業發 展。但農村收入好難大幅度提升，結果成為低技術勞動力慨提供者，人口由農村轉移到城市。隨著工人收入日益提高，但農村收入無法上升，收入差距漸擴大。部分 地區因資源問題、交通問題，令工業無法興旺起來，經濟漸漸落後於其他地區。「十一．五」規劃下，中央已減免農民大部分稅項，另補貼醫療及教育畀低收入慨農 民，並透過大量投資公共交通去解決地區差距問題。「十一．五」規劃中，將加強鐵路建設力度至「空前」，保證2010年全國鐵路營業里程達九萬公里，即期間 加建一萬七千公里（「十．五」期間只加建七千七百公里），其中七千公里系高速客運專線，另將八千公里既有鐵路改為複綫；一萬五千多公里既有鐵路改為電氣 化；快速客運網路規模達二萬公里以上，投入資金一萬二千五百億元人民幣。可以講，未來五年系中國高速興建鐵路期。

丙、公共政策嘅缺陷。OECD國家政府可透過稅收制度，做到社會收入再分配，目的系向低收入階層提供醫 療、教育、住屋補貼，更有金錢補貼（例如香港慨綜援），令窮人可以生活落去。問題系中國80％打工仔都系低收入階層，政府無法向佢地抽稅，唔似OECD國 家有龐大中產階級可成為稅收來源，向中產抽稅、補貼下層社會人士。中國社會上有80％系低收入人士，叫餘下慨中產階級點樣負擔？換言之，政府慨醫療補貼、 教育補貼、住房補貼資金必須另想辦法獲得。依家內地企業稅率已達35％（外資15％），即無法透過加稅去增加收入，以免打擊投資意欲，影響經濟增長。政府 想做慨事好多，但資金來源卻很少，如何是好？

香港由1945年共花咗三十年時間，經濟才由貧窮到小康；1975年起再花三十年時間，才由小康到富裕 社會。中國1978年改革開放至今只有二十八年，已由貧窮走向小康。2006至2020年中國將實現全面小康目標，未來十五年GDP保持喺7.5％增長， 由2005年十八萬億元人民幣上升到五十四萬億元人民幣；人均收入由2005年一千七百美元升到四千八百美元。再畀中國三十年時間，到時中國人民生活水準 可接近家嚇香港人慨水準。

2012年中國成全球第一經濟大國
法國保險集團AXA估計到2012年中國將成為全球第一經濟大國！目前GDP慨計算系基於美元單位基礎上，如以實際經濟總體計，早已超過德國及日本，2012年將超過美國（美國人口三億、中國人口十三億，即使中國GDP超過美國，兩個人均收入仍差距好大）。
平均每四個香港成年人便有一個相信發達靠運氣，此乃本港賭風咁盛慨理由（子曰，唔賭唔知時運高也）。一千個香港人之中，只有五十個明白發達之道在於追隨趨勢，怪唔得發達慨人數咁少。
五、六十年代系香港工業黃金期；七、八十年代系香港地產業黃金期；九十年代開始系香港金融業黃金 期；2007年起又會點樣？中國同印度正迅速現代化，即占全球三分一人口兩大國慨中產階級迅速湧現，將形成汽車需求、房屋需求、出國旅遊需求。未來二十年 商機系點樣喺中國（或印度）捕捉趨勢。自1997年後，投資重心已由香港逐步移向中國及印度。

威高股份（8199）、上海商貿控股（1104）、德信科技（1228）、TCL多媒體（1070）、深圳控股（604）停牌。
漢傳媒（491）股份合併。
■華彩控股（8161）、復旦張江（8231）、浪潮國際（8141）、新意網集團（8008）、友成 控股（8319）、浙江世寶（8331）11月8 日；東江環保（8230）、埃謨國際（8149）、中遠威生物制藥（8019）、藍帆科技（8166）、慧峰集團（8228）9日；神州資訊 （8206）、長安民生物流（8217）、駿科網路訊息（8081）、匯盛（8108）、研祥智慧（8285）、金鼎軟體（8190）、海天天線 （8227）、華夏醫療（8143）、優能數碼（8116）、泰達生物（8189）、博軟（8096）、天元鋁業（8253）、中裕燃氣（8070）10 日；大陶精密科技（8041）13日；輝煌科技（8159）14日公佈業績。

2006年10月27日 終於打破前高點

曹仁超投資者日記 終於打破前高點

2006年10月28日 18:09

10月26日，週四。恒生指數升195.80，收18353.74；成交三百三十八億七千多萬元。10 月期指升269點，收18418點。以收市指數計，恒指已創歷年新高（2000年3月28日收市指數18301.69），但未破最高點18397.56 點，經過六年半努力，恒生指數終於打破前高點。升幅較大有思捷環球（330）升3.3％，見七十四元六角；中海油（883）升1.7％，見六元五角七仙； 中移動（941）升3.8％，見六十二元六角。新濠國際（200）升7.3％，見十九元一角八仙；中興通訊（763）升5.5％，見二十九元。

分析界睇好 短期或調整

道指早已創新高，但扣除美元匯價回落慨因素，道指必須見15000點才系真正新高（基於港元跟隨美元匯價回落，恒生指數情況亦一樣）。如以購買力計，2000年至今貨幣購買力以每年3％慨速度消失，因此亦未創新高。

週三美股VIX跌至近期最低，代表分析界已過分睇好，後市宜小心，短期或有調整。

9月份美國二手樓買賣較8月份少1.9％或年率六百三十萬間，售價較去年同期跌2.5％。週三聯儲局開會後宣佈利率維持不變，仍系五厘二五。由於美國樓市已放緩，喺投鼠忌器下，美國利率唔可能推高至七厘去打擊通脹率，令今年5月開始股市進入半生不死慨現象。

美國樓市今年3月起進入調整期而非崩潰期，唔系1990年日式樓市泡沫爆破，更加唔系1997年8月後 港式慨八萬五房屋政策，而系慢慢咁完成軟著陸。9 月系美國房價連續第六個月回落，平均樓價系二十二萬美元一間，較去年同期慨二十二萬五千美元低2.2％；較今年3月高峰期回落6％（美國樓價以每月溫巴仙 慨速度回落）。如參考過去例子，呢次樓價調整幅度估計喺20-30％（過去美國樓價十年上升超過100％），以每月1％速度回落，調整期需時兩年到兩年半 才完成，即美國樓價低潮喺2008年下半年，不但回落速度慢，而且需時較長。

雖然近年通脹率在回升中，但仍處於可接受水準，唔似七十年代式通脹率，似乎唔受政府控制。商品價格在上 升中，但美國樓價已進入退潮，企業純利增長率在放緩但唔系下跌，冇出現類似2000年3月慨科網股泡沫爆破。後市展望大市仍系平穩發展，升降只發生喺個別 行業及個別股份身上，整體經濟仲好穩定。

油價由7月14日七十八點六*四美元回落到10月4 日慨五十七點七美元才反彈，跌幅近26.63％，商品大好友羅傑斯認為只系商品期貨市場長期牛市中一次短期調整，10月份應趁低吸納，佢堅信商品牛市可持 續十年或以上（響佢慨著作《熱門商品投資》中，佢認為歷史上最短慨商品牛市十五年，最長慨二十三年，依家商品牛市只有七年）。但大摩羅奇睇法相反，佢認為 羅傑斯睇法只系一廂情願，過去商品價格上升主因來自中國，例如鋁、銅、鋼鐵需求一半以上來自中國，錫和鎳85％來自中國。今年中國開始走節約型經濟，將一 步步響商品價格上反映出來。

二羅商品後市睇法大比拚

上述令人諗起1980年美國兩位經濟學家保羅及埃爾裏奇認為金屬為不可再生資源，將因逐漸耗盡而令價格 無止境地上升；樂觀派經濟學家朱利安．西蒙則認為人類喺科技上進步，不但可搵到代替品，而且勘探及開採技術創新，最終會令任何商品價格長期回落！佢地以十 年為期，到1990年誰勝誰負？大家都有答案。

同樣情況今年出現，只系呢次專案唔系金屬改為石油，羅奇唔相信油價可見一百美元，建議大摩客戶喺能源項 目上獲利回吐；今年更多一個理由，就系有七百億美元對沖基金資金喺石油市場炒賣。我老曹系羅奇支持者，認為人類喺科技上進步，最終可解決石油危機，近日油 價回升只系跌後慨技術反彈。任何事物都有盛衰迴圈，呢點我老曹絕對同意，但冇人知道時間表及幅度，因為影響因素太多。1980年起全球經濟逐步環球化後， 再用1980年前慨例子去推算未來，可信性有幾多？如睇近日農產品價格升幅，我老曹反而擔心商品價格上升已近尾聲。當然，呢場二羅大比拚，最後系羅奇抑或 羅傑斯正確？只有時間可告訴大家。

油價進入反彈期，股市進入炒賣二線股期。油價回升唔系因為需求上升，而系11月1日起OPEC減產，努 力維持油價喺六十美元一桶之上。油價反彈令金價亦上升些少，不過呢次商品價格上升慨主角輪到農產品，代表通脹上升週期已近尾聲，未來六至十二個月資金將去 曬炒農產品（今年8月起計）。農產品價格上升，令未來CPI增長率仍保持喺高水準（能源及食品價格唔計入核心通脹內），人們感覺到通脹仍高，此因素可令減 息時間表一再延遲，即利率保持喺五厘二五慨日子將十分長。

各位唔好期望減息會早于明年第二季出現（有可能維持六個月或以上）。呢次加息週期最後一次加息系今年6 月，唔排除第一次減息明年6月才出現（過去三次利率會議中，裏奇蒙聯儲銀行行長萊克一再要求加息四分一厘；雖然佢系唯一一個委員要求加息，但亦代表減息機 會暫時唔存在）。

今年12月中國金融業將全面向外資開放，內地中小股份制商業銀行所面對競爭壓力較國有銀行大。金融業全面開放後，中國經濟將進一步融入全球化體系中，國際經濟變化將更快通過匯率、利率變化而影響中國。過去中國經濟半封閉式運行時代結束，經濟週期波動將更為明顯和頻繁。

「以客為先」內地銀行有排學

　第一、雖然中國GDP全球排名第四，但相對美國仍然好細（只及美國GDP八分一）。響美國經濟所產生慨漣漪來到中國可以變成巨浪（例如1997年發生慨亞洲金融風暴）。過去中國經濟系半封閉式，1998年仍然感受壓力，何況今年12月進入全開放型！

第二、競爭變成多元化。過去國有銀行與中小股份制銀行之間慨競爭系閉門一家親，大有大做、細有細做。未 來競爭卻系外資銀行、國有銀行及中小股份制銀行之間慨競爭；中資銀行已好難再獲政府特殊保護與支持，必須喺市場上同跨國巨無霸外資銀行爭客、爭市場佔有 率，未來競爭一定白熱化。

第三、中國銀監會必須與國際接軌，監管要求國際化。例如銀行資本充足比率、呆壞賬撥備標準、各種各樣約束、會計準則、規管要求等都要達到國際水準。過去國有銀行職員「做官咁做」慨服務態度，必須轉化為「以客為先」慨服務態度；單系呢一點，內地中資銀行已有排學。

第四、金融市場開放後，企業可發行債券直接向資本市場集資，唔一定依賴銀行，令銀行作為融資慨仲介功能 受到一定削弱。另一方面，貸款客戶競爭白熱化（例如香港銀行對住宅樓按揭利率，已由1997年前慨最優惠利率加二厘，到家嚇最優惠利率減三厘），淨息差收 窄令貸存業務利潤下降。要考慮點樣透過發展收費服務去增加銀行收入，例如發行信用卡、提供個人理財、推銷基金、保險、代客買賣外匯、股票及金融產品等。

第五、消費者選擇增加，對銀行服務要求上升，例如私人貸款及其他增值服務。消費者議價能力提高，變相削弱銀行議價能力，必須提供更有競爭力慨條件才能留住客戶。

內地銀行過去一直受政府保護，應對經濟週期波動慨能力如何？反觀香港銀行六十年代面對擠提潮、1967 年暴動、1973-74年股災、1981年樓價回落所造成慨呆壞賬、1987年股票市場停市，以至1997年亞洲金融風暴！香港六十年代有幾多銀行倒閉？ 八十年代有幾多銀行被政府銀監處接管？到1997 年才建立健全銀行機制。反觀亞太區甚至日本在內，面對經濟週期波動，所付代價唔輕。今年12月中國金融市場開放後情況會點？尤其風險管理方面，內地銀行整 體對抗風險慨能力相對國際大銀行為差，當全球經濟環境出現變動時，內地銀行（尤其中小股份制銀行）應變能力將面對考驗。

今天外資銀行提供慨各種服務有如「金融超級市場」，內地銀行不但中小銀行缺乏呢方面優勢，甚至大型國有銀行喺提供服務方面亦未夠多元化。

面對今年12月中國金融市場開放，一則以喜（中國金融市場終於同國際接軌了），一則以懼。日本及東南亞 國家喺金融市場開放過程中付出代價唔輕。香港 1987年股災及98年外資炒賣聯匯，距離今天日子唔遠，唔少人記憶猶新，中國未來面對國際間經濟波動時，應付能力如何？國有銀行響服務多元化方面，又能 否與國際銀行一爭長短？

越南將成第三個經濟奇跡

越南喺1994年申請加入WTO，本月25日響日內瓦獲批准，並獲四十三個成員國通過最後協定文本，等11月7日喺召開慨世貿組織總理事特別會議正式批准，三十天內如冇其他國家反對，12月8日起越南可成為WTO正式成員！

1990年越南糧食失收，令成千上萬人民食不果腹，逼使越南政府走上經濟轉型道路。經二十五年努力，越南去年GDP增長率已超過泰國、馬來西亞、臺灣及南韓，成為中國、印度以外第三個經濟「奇跡」！

首創置業（2868）、冠亞商業（104）停牌。

中油燃氣（603）10月26日起名稱由日本亞太事業投資有限公司改為中油燃氣集團有限公司。

■I.T（999）、資本出版（8155）、JESSICA（8137）、世紀陽光（8276）、物美 商業（8277）11月7日；安捷利實業（8298）、A-S China（8262）、中國基建港口（8233）、年代資訊影視（8043）、交大慧穀（8205）、山東墨龍（8261）、萬全科技藥業（8225） 8日；中華資料廣播（8016）、英皇娛樂（8078）、亞科資本（8088）9日；海王英特龍（8329）、新利軟體（8076）10日；億勝生物科技 （8151）13日；大賀傳媒（8243）、愛達利網路（8033）14日公佈業績。
*******************************************************

2006-10-27

四改三重量不重質

2006-10-06
四改三重量不重質



　　10月5日，周四。恒生指數升278.46，收17907.67；成交四百三十三億六千八百多萬元。10月期指高水，升307點，收17979點。聯 儲局主席貝南奇估計，美國樓市將出現調整，令下半年經濟增長率減少一個百分點，同時影響明年GDP增長；上述消息令明年3月利率降至五厘機會上升至 60％。油價回升，令南方航空（1055）股價跌3.2％，收二元三角九仙，另一理由係瑞信集團將該公司評級降至落後大市。

　　任新郎預測，人民幣六個月內同港元率睇齊機會高達50％；不過，即使以人民幣同港元出現一兌一計，升幅仍然唔大。

明年3月減息機會大

　　今年6月13日恒生指數跌穿二百五十天線日，唔少人呱呱叫熊市重臨……，至今恒生指數由15204點上升至17902點，升幅已達17.74％，但仍有人唔同意本港股市行業盛衰早已取代牛熊市，奈何！

　　聯儲局副主席科恩認同美國樓價進入軟陸期，代表十七次加息已足夠，並唔認為通脹率會惡化，上述亦係我老曹今年第三季睇法。美國CPI相信已今年 第三季見頂，其後利率係向下炒而非向上炒（即炒幾時減息）！分析界估計，今年10月減息機會只有2％，12月減息機會亦只有8％；不過，明年1月減息機會 40％，3月份為60％，即明年3月才出現減息機會較大。

　　9月份香港房屋銷售大增62％，達十一個月高點。住宅樓成交共二百八十九億七千萬元，較去年同期升62％；買賣戶數九千八百一十一戶，升38％（較今年8月升40％）。上述消息令新地（016）股價升2.4％、長實（001）升1.6％。

　　道指見11727.34，打破2000年高點；三十隻成分股中，有十三隻創新高。表現最出色有Altria，股價較2000年上升四倍， Caterpillar、United Technologies及波音公司升幅亦超過一倍，落後股如柯達、AIG、輝瑞、英特爾、AT&T則較2000年高價低50％或以上！

　　黃金同石油2000年至今大升，金價今年5月見七百三十五美元後回落，油價7月14日見七十八點四美元後回落。OPEC努力令油價六十至七十美元之間上落，部分成員國已開始減產。過去OPEC既冇能力阻止油價上升，呢次又係咪有能力阻止油價回落？

　　依家投資者只有10％曾經歷過七十年代金市。金價由1974年12月二百美元跌至1976年中一百零四美元，跌幅接近50％才再上升；呢次金價調整 幅度有幾大？唔好估，只要等。隨美國樓價進入軟陸期，相信商品價格亦進入中期調整，通脹率升幅將逐步放緩，估計明年第二季最低。

　　周三油價一度低至五十七點七五美元，為2月16日以來最低，較7月14日七十八點四美元高價回落23％才反彈，收市五十九點四一美元。科威特石油部長 宣布支持減產；沙地阿拉伯雖然唔乃奇自動減產計劃，為表支持，亦宣布每日減產二十萬桶。周三油價回升，主因係尼日利亞爆發暴力衝突，武裝人員攻佔尼日利亞 東南一帶產油區，影響意大利石油公司Eni SpA。不過，上周美國原油存量上升三百三十萬桶，至三億一千八百一十萬桶；汽油存量上升一百二十萬桶，至二億一千五百一十萬桶，較去年同期高9.6％； 經提煉油存貨上升二十萬桶，至一億五千一百五十萬桶，較一年前多18％。

　　黃金方面，至9月26日止歐洲央行共售出三百九十三噸，同原先計劃10月1日前出售五百噸仍差20％以上。現水平歐洲央行亦唔急於出售手上黃金。

銅價跌穿敏感三角形

　　今年上半年新成立能源及商品基金數目，超過2004及05年兩年加起來總和，情況同1980年上半年十分相似，講來講去都係中國因素、印度因素刺 激。上述因素唔係今年上半年突然出現，而係一直存在；當去年航運費下跌時已變相告訴大家，中國開始抗拒鐵礦砂價格上升，而其他原材料格價上升，亦令中國開 始減慢原材料入口了。

　　過去過分睇好能源價格而冇及時7月份離開者開始面對壓力；其次，第三季沽售能源股及資源股資金正向其他行業進軍，令其他行業股價上升。展望第四季 資金仍從能源股及資源股項目流出，繼續流向其他項目，未來每次油價反彈都應視作減持能源股及資源股時刻，因為油價已今年7月14日七十八點四美元見頂， 資源股同能源股由過去向上炒轉為向下炒。周三銅價跌穿敏感三角形下支持【圖】，各位應小心。

　　市場與經濟都離唔開boom & bust，油價既可以六年上升685％，自然亦可以出現大幅回落，1980年係咁，1991年係咁，2006年亦應該會係咁。市場無錯對，只有方向！大 摩羅奇係依家少數睇淡商品價格者，其他分析員仍偏向睇好，到底呢一次係咪又係少數贏大多數？

道指升幅集中大藍籌

　　道指雖然創新高（扣除通脹率仍較2000年低20％）。2001年全球一度擔心日本式衰退美國登陸，格蛇將利率由六厘半降至一厘，以及殊仔提出大幅 退稅，將上述憂慮擊退，其後全球都面對資金泛濫。過去六年美國樓價升幅超過50％，財富效應一直支持美國消費市場，令全球經濟保持增長！為阻止美國CPI 大幅上升，聯儲局2004年6月起又將利率一步步推高至今年7月五厘二五，令美國樓價今年8月停止上升，但經濟仍然保持興旺。1982年至今聯儲局每次都 能成功阻止bust出現，包括1984、91、94、97及2001年；美國過去二十四年已成功製造booms without a bust，一如只有白天而冇黑夜，似乎完全違反奧地利經濟學派所謂「規則」。1913年聯儲局被創造出來，1971年美國廢除金本位制度，令聯儲局干預經 濟能力大增，終於八十年代至今創造另一經濟奇（連續二十四年繁榮冇衰退）！

　　美國8月份樓價較一年前跌1.7％，係1995年5月以來首次，令8月8日及9月20日聯儲局兩次公開利率協議皆停止加息，分析界預測明年第一季尾將 開始減息！低利率加上低能源價格，可支持美國GDP明年保持2.5％或以上增長……。由於未來利率睇跌，加上CPI增長率受控制，令債券價格睇漲（我老曹 9月初公開研討會已提出上述睇法）。雖然GDP增長率放緩，但冇衰退威脅，令股市繼續上升，形成8、9月（甚至10月）債券同股票價格齊升局面，十年 期債券孳息率由6月30日五厘二二跌至四厘五五（即債券價格上升14.7％）。現水平債券息率較2004年6月聯邦基金利率一厘之時更低；長債利率下跌有 助美國樓市軟陸，大大減低樓市對經濟影響。美國2004年5月至今年6月有30-35％樓按採用ARM（即首兩年樓按利率四厘二五、第三年六厘二五、 第四年起按市場利率計），由此可見供樓壓力漸漸浮現，投資者已由樓市退出轉投股市。

　　雖然道指創新高，但標普五百指數仍較2000年高點低12.5％，代表呢次道指出現新高，升幅集中在少數大藍籌身上。

　　索羅斯最喜歡講：「風險來自無知！」1997年8月後，點解本港樓市產生咁多負資產人士？最大理由係「無知」！唔少人唔明白1984年7月至1997年7月呢十三年本港樓價反覆上升背後理由，亦唔知道「八萬五」房屋政策威力。如你了解箇中道理，點解唔逃避風險？

　　索羅斯亦同我老曹一樣，十分喜歡概念；將一個概念化作投資核心。例如2001年起睇好資源價格成為呢幾年投資核心概念，今年5月起才改變上述睇法。 其次索羅斯亦喜歡止蝕盤（佢甚至將止蝕位訂在5％；我老曹將止蝕位訂在10％或以上，最多15％）。索羅斯傳奇係佢能將一個十分簡單概念嵌入一連串投 資策略內，而將利潤大幅擴大，呢點係我老曹應該學習地方，即是一旦贏便贏得大、一旦輸便輸得少。

　　索羅斯唔主張分散投資，反而喜歡集中攻擊一點！今天索羅斯個人財富達七十二億美元，2006年《福布斯》雜誌估計佢係全球第七十一位富人！佢 1969年與羅傑斯（Jim Rogers）合創量子基金，1969年如各位在量子基金上投資一千美元，今天已變成六百萬美元（同期標普五百上升340％，即一千美元變成三萬四千美 元）；量子基金年增長率達28％！

索羅斯係偷師對象

　　好多人以為索羅斯係賭徒，其實剛剛相反。佢投資十大原則：
一、保本為投資首要項目。
二、討厭冒險。
三、建立個人投資哲學。
四、佢認為冇兩個成功投資策 略係相同。
五、學習建立個人選股（或外）系統，唔盲目投資。
六、分散投資係一般基金經理工作，其他人唔使學。
七、努力避稅但不可逃稅。
八、只投資自己 了解項目。
九、制訂個人投資標準，因為冇一個人係萬能。
十、努力鑽研並且找尋別人未留意項目。

　　熟讀唐詩三百首，唔識吟詩亦曉偷！索羅斯絕對係我地學習及偷師對象。索羅斯在今年提點大家，小心嬰兒潮危機（Baby Boom Crisis）。隨戰後嬰兒進入退休期，將引發一連串經濟變化，其中有危有機。

　　每當談及貧富懸殊問題，便有聲音要求政府向富人抽稅、向窮人提供補貼或保障。我地似乎忘記毛澤東時代中國共產黨將富人財產充公去分配畀窮人，結果係 點？六十年代中國出現大饑荒！1978年鄧小平政策係乜？先讓部分人富起來。毛澤東政策行二十八年，中國經濟係點？鄧小平政策行二十八年，中國今天經 濟又會點？

　　金錢三大功能：儲蓄、投資與消費。最原始資本自儲蓄，只曉儲蓄不曉投資，只能以平均五厘息計，如二十歲開始儲蓄到六十歲，本利和亦只有七倍，如扣除 每年平均通脹率4.5％，今天六萬元購買力相等於1966年一萬元，即實質收益好少。因此，有資本後，必須進入第二階段，例如索羅斯將資本每年升值 28％，如果你亦可以，一萬元本金四十年後變成六千萬元！當然，金錢最終目的係消費，到底一萬元好使抑或六千萬元好用？（讀者一定以為我老曹傻，咁問 題都會問？）

　　毛澤東所犯經濟上錯誤，就係將富人手上一百萬元充公分畀一千個窮人消費，社會上富人少、窮人多，最後富人被消滅掉，整個社會只有愈來愈窮。鄧小平 做法係讓有能力人將一萬元留起來作投資，二十八年後變成一千萬元（以年率28％速度上升），社會上漸漸富有人多了，佢地為賺更多錢，便提供大量就 業機會畀其他人，整個國家亦富起來。

　　劫富濟貧結果必令社會日漸貧窮。基於種種因素，社會上總有20-25％人口需要照顧，可能係因為不幸（例如老、弱、傷、殘），或工作能力不及別人（例 如自幼家貧，失去求學機會）或其他因素（例如性格上不進取，好逸惡勞），呢D人需要政府提供照顧，以達致和諧社會，以免出現有人冇飯食、冇屋住、冇書讀、 病冇錢醫等人間慘劇。此乃為何社會必須提供一定福利作為保障理由；但絕對不可有均富想法！

　　政府責任係提供一個公平競爭環境，只要肯努力，定有出頭天，而唔係一味劫富濟貧，不然便打擊創富欲望，結果唔係均富而係均貧。過去香港政府實施政 策就係提供只要肯努力、定有出頭天環境，令香港自七十年代開始經濟起飛；其後提供各種福利，已為超過25％人口提供照顧，甚至濫用情況日漸嚴重。如再推 出銷售稅、最低工資等，特區政府政策便一步步走向劫富濟貧之路。

全球大學生質素下降

　　今天無論歐洲、加拿大及部分亞洲地區，都為大學改制，由四年改為三年，理由係依家經濟環境需要大量大學生，但大學一時之間無法大量增加，「四改三」後 可令大學生供應量短期內增加25％，而毋須同時增加大學經費，聽落似乎有D滑稽，但實情的確如此。大學不但「四改三」，同時收生資格亦放鬆，以便更多年輕 人可進入大學。

　　不過，美國四百五十多間大學卻對「四改三」制度有所保留，調查結果只有37％大學同意，22％堅持唔改。Downsizing不但商界進行，連大學亦無法避免，結果全球大學生人數增加25%，但質素可能下降，此乃全球現象：一味追求「量」而忽略「質」。

　　今年起係首批戰後出生嬰兒踏入六十歲（即退休年齡），未來將有愈來愈多接受較良好教育工作人口退休。雖然大學「四改三」，但剛畢業大學生能否取代 工作經驗豐富戰後嬰兒職位？專家警告，2010到2020年全球因為有經驗工作人口大量退休而無法補上，可能引發經濟危機！其中最缺乏係有經驗護 士，全球將面對護士荒；家全球護士平均年齡五十歲，十年後大量退休！理由係護士工作甚至較醫生辛苦，但薪金卻低許多，形成入行人少。上述只係其中一 項，擔心不出十年，全球將面對人才荒，到時會否影響經濟?!

　　嘉里建設（683）、佑威國際（627）、九方科技（8129）停牌。

　　智富能源（1051）更改董事會會議日期。

每月供樓愈欠愈多?! 2006-10-05

2006-10-05
每月供樓愈欠愈多?!

10月4日，周三。恒生指數升22.68，收17629.21，創今年新高；成交四百三十一億九千多萬元。10月期指見17672點，升28點。

　　瑞安房地產（272）首天掛牌，較招股價高10％，以五元九角收市；中海油（883）跌3.4％，見六元二角五仙。資金繼續由能源股及資源股流到其他項目。

油價見頂論信徒唔多

　　10月2日共有四十二萬九千多人抵港，自9月29日至10月2日來港人數超過一百二十一萬人，較政府估計為多，相信與中秋節假期同「十．一」黃金周連 在一起有關，估計黃金周進出香港人次可達五百六十七萬。中央政府宜考慮把每年長假由打工仔自行決定，以免過分集中「五．一」黃金周、「十．一」黃金周 及春節，如此一來旅遊業受惠更大。

　　周二油價跌至七個月內新低（雖然委內瑞拉同尼日利亞宣布減產），11月期油見五十八點六八美元。估計美國依家已提煉油產品存量較去年同期多15％、汽 油存量多9％、原油存量多5％。颶風季節漸過去（估計11月30日前仍有兩個颶風）。今年墨西哥灣只有九個颶風，較去年二十八個大減，傳與厄爾尼諾現 象有關，主要係太平洋區中心海水較往年溫暖，較難形成颶風。油價進一步下跌，令石油好友面對考驗，人們開始相信7月14日油價見頂說法。由能源股至今為 止抗跌能力仍十分強睇，代表油價見頂論信徒唔多。美聯社報道，8月份美國消費者減少0.1％消費，係近一年內最大跌幅（上一次係去年9月，減少 0.3％，主要受颶風影響），但未能肯定美國消費已進入回落期。

　　今年第二季美國物業按揭增加二千二百零三億美元（上半年增加四千三百六十四億美元）。2001年1月至今美國物業按揭金額由六萬九千九百億美元，上升 到今年6月十二萬億美元，升幅達71.7％；美國家庭負債由四十二萬億美元上升到五十四萬億美元；換言之，新增負債50％來自物業按揭。2002年開始美 國GDP復甦，樓價升值影響好大，財富效應成為推動呢次經濟繁榮其中一項重要因素；不過，上述因素今年8月起逆轉。過去五年美國人均收入升幅十分細，但開 支卻以年率12％速度上升，一旦樓價停止上升，點樣令美國GDP增長率完成一次軟陸？有一定困難。

資金由美樓市轉投股市

　　依家美國總負債數字係 GDP 300％，貝南奇正努力去避免美國經濟出現衰退，不然情況較九十年代日本更差（因日本人一向有高儲蓄率，而美國人儲蓄率極低）。比較上好算係美國企業手頭 現金充足，並冇資產上作過度投資，亦冇向員工作出過大幅度加薪；加上7月14日起油價回落，亦起到莫大支持作用。雖然係咁，投資者亦唔應該因為道指創新 高而過分亢奮，睇大市只能維持個別發展。雖然道瓊斯工業平均指數創新高，但交通平均指數卻不肯確認，此乃大市轉弱先兆。

　　許多人唔明白ARM係乜？以借入二十萬美元計，首年每月供款六百四十三美元，許多家庭都供得起；然後逐年上升，到第六年每月供款升到一千五百七十八美 元，而負債亦升到二十一萬四千八百五十七美元！點解層樓係咁供，所欠本金反而上升？理由係每月供款連利息都唔夠！美國銀行監管機構完全明白ARM係乜 一回事，但唔少物業買家卻唔明白。為減低2004年6月起加息對樓市影響，美國銀監處視而不見，令大量連利息都供唔起家庭過去兩年做業主。過去兩年 利用ARM買樓小業主亦高興，因為樓價上升，直到今年樓價停止上升，唔少小業主才驚覺原來自己每月供樓，不但所欠銀碼冇減少，反而增加！美國樓價下調壓 力今年8月起逐步浮現，近日因油價回落而抵銷其影響，令道指仍有力創新高，因為資金正由物業市場流向股票市場！一個管理良好基金今年回報率可達20％， 上述回報物業市場絕對難求，形成投資者由物業市場退出轉投股票市場；今年物業市場尋求3％至5％回報亦唔容易，令物業市場變成用家市場。

五厘息的魔力

　　1966年（香港暴動前）本港樓價約六十五元一呎，今天住宅樓價一般約四千五百元一呎，四十年樓價上升670％或每年平均上升4.9％。值得注意 係，1967至97年係本港高通脹期，但1997年後香港進入低通脹期。過去四十年樓價平均每年上升4.9％，唔代表未來四十年本港樓價仍保持上述速度上 升，例如1997年8月至2003年7月樓價係按年下跌。各位應漸明白五厘息威力：如存錢入銀行而收到五厘息或以上，可達保本目的；今年5月美元利率重 返五厘，係令金價從此失色理由，因為存款利率五厘或以上令金者冇數！至於物業，家租務回報（稅後）一般有三厘，如樓價只上升3％，仍無法同定期存 款競爭。任何項目係咪值得投資，往往係相對性而非絕對性。例如2001年未減息之前利率六厘半，金價動彈不得；一旦利率低於五厘，資金便流向黃金市場，直 到利率重返五厘或以上為止。上述係簡單風險╱回報基數，並唔係乜家傳祕方，人人都可獲得，問題在於你信唔信。

　　最近銅價亦出現大幅回落，影響之下，CRB商品指數出現較大跌幅；商品價格今年5月至8月見頂分析又多一項有力支持。

　　2001年1月開始減息，美指數到2002年2月才開始轉弱，時差十四個月；2004年6月開始加息，去年1月美指數才開始轉強，去年10月至今年5月又轉弱，相信係中期調整。今年5月起美又轉強，技術上睇，呢次美強勢可一直維持至明年首季。

　　升市強勢先行，2002年10月美股最先上升；跌市弱勢先行，今年4月起日經平均指數開始回落。2002年10月美股上升後八個月，日經平均指數才上 升；日經平均指數今年4月開始回落，美股哪一個月才見頂回落？要時間老人才能告訴大家，我地只能耐心等候。港股主要受美股影響（港股2003年5月才起 步，理由係受沙士疫症影響），如美股轉弱，港股就得小心。

買航空股沽能源股成大贏家

　　以依家玩法，拋售一個行業股份買入另一個行業股份，呢類輪流炒遊戲可維持幾耐？木宰羊。8月份吸納航空股、沽出能源股者已成為大贏家。2001年 「九．一一慘劇」令航空業大受打擊， 2002年香港經濟陷入衰退，2003年沙士疫症影響旅遊業令飛機乘客大減，2004年起受航空油價大升影響，航空股可以講已衰足五年，今年第三季應該係 航空股大翻身日子，目前除短期技術超買因素外，未來三至六個月航空股仍可繼續睇好；內地航空股更有奧運概念，未來睇好日子相信唔止六個月！有人認為第 四季係炒科網股日子（過去十年，每年第四季科網股皆跑贏大市，除1997及2000年；今年又會點？），但納指最近出現出貨訊號，今年第四季科網股又 點睇？雖然今年首三季科網股皆跑輸大市，能否輸家食尾糊，又係另一回事。

　　畢非德日常娛樂係睇上市公司年報，然後從中找尋投資概念。唔好因為手上有現金而投資，應該搵到機會才決定投資，如果冇機會寧可唔投資，有時無所事事更 好！大部分散戶皆因有錢而手痕，太冇耐性啦。李實發七十年代曾講過，投資行為應該如「鷹」，大部分時間只係空中飛翔，發現目標物便以高速前進，一擊即 中，然後又再飛返空中。投資成功唔係因為你有錢，而係因為你能審時度勢，利用最佳機會出擊。

　　畢非德出售理由有三：
一、投資項目同最先持有時環境有變。
二、搵到另一個更佳投資項目而需要資金。
三、發現自己分析出錯而止蝕。佢從來唔會因為獲利而回吐。

　　大部分投資成功人士，皆因佢地愛上呢個遊戲，投資過程中搵到人生樂趣。你係咪愛上投資遊戲抑或只對金錢有興趣？